Gado e du ferwondru sani
1Gi a tiriman fu a singigrupu fu a tempel. Wan psalm. Wan Singi.
Heri grontapu, meki wan prisiri babari gi Gado!
2Singi fu gi a nen fu En grani,
gi En glori èn taki fa A bigi.
3Taigi Gado taki:
“Den sani di Yu e du bigi.
Yu makti bigi sote,
taki den feyanti fu Yu mus fu gi Yu grani.
4Heri grontapu e anbegi Yu,
èn den e singi gi Yu,
singi fu opo a nen fu Yu.” sela
5Kon luku den sani di Gado du!
Den bigi sani di a e du e meki libisma ferwondru.
6A meki a se tron drei gron,
nanga futu a pipel fu En ben hari psa ini a liba,
drape A meki wi prisiri.
7A e tan na makti fu têgo fu di A tranga,
den ai fu En e luku san den folku e du.
No meki den sma di no wani dini Yu kaka den futu gi Yu. sela
8Folku, un prijse a Gado fu wi,
un gi En grani trangatranga,
9bika na En hori un na libi,
na En hori un tnapu.
10Bika Gado, Yu tesi wi,
Yu krin wi, leki fa den e bron solfru puru ala a doti.
11Yu tyari wi go fasi ini wan net,
Yu poti wan hebi lai na tapu un skowru.
12Yu meki sma rei psa na un tapu,
wi psa bun tranga ten,
ma Yu tyari un go pe sani de bogobogo.
13Mi sa bron meti leki ofrandi gi Yu,
te mi e go ini Yu oso,
mi o du san mi ben pramisi Yu,
14den sani di mi mofo ben taki,
den sani di mi ben taki ini nowtu,
15taki mi sa bron meti leki ofrandi gi Yu,
meti di kweki wan spesrutu fasi,
wan ofrandi nanga wan switismeri
fu den man skapu di mi o bron gi Yu.
Mi sa srakti bulu nanga bokoboko. sela
16Un ala di e lespeki Gado, un kon, un kon arki,
mi o ferteri un san A du gi mi.
17Mi no ben kari En langa srefi,
wan singi di e gi En grani ben de tapu mi tongo.
18Efu mi ben abi takru prakseri ini mi ati,
Masra no ben o arki mi.
19Ma Gado yere mi fu tru,
A arki di mi begi trangatranga.
20Mi e prijse Gado bika A piki a begi fu mi,
èn A sori mi a bigi lobi fu En.
