1Gi a tiriman fu a singigrupu fu a tempel. A mus singi a srefi fasi leki: Yedutun. Wan psalm fu Asaf.
2Na Gado mi e kari trangatranga,
Na Gado mi e kari fu a arki Mi
3Te mi de na ini benawtu mi e suku Masra,
te neti mi e opo mi anu go na En
sondro fu weri,
sma no abi fu kon trowstu mi.
4Te mi e prakseri Gado,
mi e dyeme,
te mi e prakseri En
mi e lasi ati. sela
5Fu Yu ede mi no man tapu mi ai,
sani e dangra mi ma mi no sabi san fu taki.
6Mi e memre fosten,
den yari di sani ben e go bun.
7Mi e memre te neti fa mi ben e prei tapu mi instrumenti,
ma now mi e prakseri go mi e prakseri kon,
mi e aksi misrefi taki:
8MASRA sa poti wi na wan sei fu têgo?
A no sa du bun sani gi wi moro?
9Na kba a bigi lobi fu En kon na wan kba fu têgo?
Na teri den pramisi fu En no e teri moro?
10Na fergiti Gado e fergiti fu sori wi a bun-ati fu En?
Na tapu a atibron fu En tapu a sari-ati fu En? sela
11Na dat' meki mi taki: San e hati mi
na taki a makti fu a Moro Hei Gado
no de a srefi moro.
12Mi sa memre den wondru di MASRA ben du,
Iya, mi sa prakseri den wondru fu bifo baka,
13mi sa memre den wroko fu Yu,
kari ala den bigi sani di Yu ben du
kon ini prakseri baka.
14Gado, ala sani di Yu e du santa,
sortu gado bigi leki a Gado fu wi?
15Yu na a Gado di e du wondru,
Yu meki den folku si a makti fu Yu.
16Nanga a tranga anu fu Yu,
Yu ferlusu a pipel fu Yu,
den bakapikin fu Yakob nanga Yosef. sela
17Gado di den watra si Yu,
di den si Yu den ben frede,
a se seki te na a moro dipi pisi.
18Den wolku ben lusu watra kon na gron,
dondru ben de fu yere na a heimel,
a faya fu Yu di e koti na loktu ben psa leki peiri.
19A babari fu a dondru fu Yu ben de fu yere nomo,
a faya di ben e koti ben krin grontapu,
grontapu ben beifi, a ben seki.
20A pasi fu Yu ben e psa ini a se,
a ben e psa ini bigi watra,
ma den futumarki fu Yu no ben de fu si.
21Yu tyari a pipel fu Yu
leki fa wan skapuman e tyari skapu
Moses nanga Aaron ben de den skapuman fu Yu.
