Kon na krin 11

₁Baka dati mi kisi wan tiki san ben gersi wan doitiki, nanga a komanderi, taki: “Opo go marki a tempel fu Gado nanga a altari, èn teri den sma di de na ini a santa presi e anbegi Gado drape. ₂Ma yu no mus marki a opo presi na dorosei fu a tempel, bika a pisi dati na gi den sma di no sabi Gado. Fotenti-na-tu mun langa den o rigeri na ini a santa foto. ₃Mi o taigi den tu kotoigi fu Mi fu weri rowkrosi èn fu taki san Mi o gi den fu taki, wan dusun tu hondro nanga siksitenti dei langa.” ₄Den tu kotoigi na den tu oleifbon nanga den tu tiki di hori olilampu san tnapu na fesi Masra di abi grontapu. ₅Efu wan sma wani du den ogri, dan faya o kmopo ini den mofo, kiri den feyanti fu den. Na so den sma o dede di wani du den ogri. ₆Den man disi o abi a makti fu tapu a alen fu a no fadon, ini a heri pisten san den o taki san Gado gi den fu taki. Den o abi a makti tu fu kenki watra tron brudu, èn fu meki ala sortu bigi ogri kon na grontapu. Den o man du den sani disi te den wani. ₇Dan te den kba kotoigi, a krasi meti san e kmopo ini a olo san no abi gron sa feti nanga den. A sa wini den, èn a sa kiri den. ₈A dedeskin fu den o tan didon na tapu a strati fu a bigi foto. Yeyefasi den e kari a foto disi: Sodom nanga Egipte. Na ini a foto disi den ben spikri a Masra fu den na a kroisi. ₉Dan sma fu ala folku nanga lo, èn fu ibri tongo nanga kondre, o si fa den dedeskin e tan didon drape dri nanga afu dei langa. Den no wani meki den dedeskin fu den beri. ₁₀Den sma di e libi na grontapu o breiti nanga a dede fu den, èn den o prisiri. Den o seni kado gi densrefi, bika den tu profeiti disi ben pina den sma di e libi na grontapu.

₁₁Ma baka den dri nanga afu dei, Gado gi den tu kotoigi libi baka. Den opo tnapu, èn ala sma di si den bigin frede sote. ₁₂Dan den tu kotoigi yere wan tranga sten taki kmopo fu heimel taki: “Un kon dya na loktu!” Ne den opo go na heimel ini wan wolku, èn den feyanti fu den ben e luku den. ₁₃Dan tapu a srefi momenti dati, a gron bigin seki bun hebi. Efu yu e prati a foto ini tin pisi, dan wan fu den tin pisi broko fadon. Seibi dusun sma dede. Den tra sma di tan na libi ben kon frede srefsrefi èn den gi a Gado fu heimel grani.

₁₄A di fu tu ogri psa. Luku, a di fu dri e kon her'esi!

₁₅Di a di fu seibi engel bro na tapu en tutu, tranga sten taki kmopo fu heimel. Den taki: “A Masra fu unu nanga a Wan di A poti fu tron Kownu, kon rigeri now na grontapu leki Kownu. Na En sa rigeri fu têgo èn ala ten.” ₁₆Dan den tutenti-na-fo fesiman di sidon na fesi Gado na tapu den kownusturu, trowe densrefi langalanga na gron. Den anbegi Gado ₁₇taki: “Masra Gado di abi Ala Makti, Yu di de èn di ben de, wi e taki Yu tangi fu di Yu teki Yu bigi makti dan Yu bigin rigeri leki kownu. ₁₈Den folku ati ben bron. Ma Yu ati e bron now èn a ten doro fu krutu den sma di dede. A ten doro fu gi paiman na den profeiti di ben wroko gi Yu nanga den sma fu Yu nanga den sma di abi lespeki gi Yu, pikinwan nanga bigiwan. A ten doro tu fu wai den sma puru na pasi di e pori grontapu.” ₁₉Dan den opo a tempel fu Gado na ini heimel èn a santa kisi fu a ferbontu ben kon fu si drape. Ne faya bigin koti èn mi yere wan lo sten. Dondru bari, grontapu seki, èn furu tranga pis'pisi-ijs fadon na grontapu.