Paulus seni taki sma odi
1Mi wani du wan bun wortu gi wi sisa Febe, di de wan dinari ini a gemeente na Kenkrea. 2Un teki en na un mindri leki wan sma fu Masra, tapu wan fasi di fiti sma fu Gado. Un mus yepi en tu nanga san a abi fanowdu, awinsi san. Bika fu en sei yepi furu sma, èn a yepi mi tu.
3Un taki Priska nanga Akwila odi gi mi. Den e wroko makandra nanga mi gi Kristus Yesus. 4Den sma disi ben kan lasi den libi fu di den yepi mi. Ma a no mi wawan e taki den tangi, ala den gemeente fu den sma di no de Dyu, e taki den tangi tu. 5Un mus taki a gemeente di e kon makandra ini den oso odi tu. Un taki mi lobi brada Epenetus odi gi mi. A de a fosi sma fu Asia di teki bribi ini Kristus. 6Un taki Maria odi tu di wroko so tranga gi unu. 7Un taki Andronikus nanga Yunias odi gi mi tu. Den na mi kondreman di ben de na straf'oso makandra nanga mi. Den man disi na prenspari man na mindri den boskopuman fu Yesus, èn den ben e bribi na ini Kristus fosi mi tron wan bribisma. 8Taki Ampliatus odi. Mi lobi en fu di a e bribi ini Masra. 9Taki Urbanus odi gi mi. Neleki wi, a e wroko gi Kristus. Un taki mi lobi mati Stakis odi tu. 10Taki Apeles odi. A de krin taki en na wan trutru sma fu Kristus. Un taki den ososma fu Aristobulus odi tu. 11Taki Herodion, a kondreman fu mi, odi. Un taki den ososma fu Narsisus odi di de fu Masra. 12Taki den sisa Trifena nanga Trifosa odi. Den e wroko tranga gi Masra. Un taki mi lobi mati Persis odi tu. A wroko bun tranga gi Masra. 13Taki Rufus odi. Masra ben teki en gi Ensrefi. Un taki en m'ma odi, di de leki wan mama gi mi tu. 14Un mus taki Asinkritus, Flegon, Hermes, Patrobas, Hermas nanga den tra brada di de nanga den, odi tu. 15Un taki Filologus nanga Yulia, Nereus nanga en sisa, nanga Olimpas nanga ala den sma fu Gado di de na den, odi tu. 16Un taki makandra odi nanga wan santa bosi. Ala den gemeente fu Kristus seni taki un odi.
Paulus warskow gi kruktu leriman
17Brada nanga sisa, mi e begi un tangitangi fu un luku bun nanga den sma di e tyari prati kon na un mindri, èn di e meki trawan bribi sani san no e agri srefsrefi nanga a tru leri san un kisi. Un no mus bemui nanga den. 18Bika den sortu sma disi no e dini Kristus, wi Masra. Na densrefi den e dini. Nanga moi wortu èn nanga switi taki den e bedrigi den sma di no e si taki na puru den wani puru den tapu a pasi fu Masra. 19Ala bribisma kon sabi now taki un e du Gado wani. Dat' meki mi abi prisiri nanga unu. Ma mi wani fu un sabi heri bun san na bun, èn fu un hori unsrefi fara fu den sani san no bun. 20Gado di e gi freide, sa broko a makti fu Satan her'esi na ondro un futu. Meki a bun-ati fu wi Masra Yesus de nanga unu.
Wantu tra bribisma seni taki sma odi
21Timoteus, di e wroko makandra nanga mi, e seni taki un odi. Lusius, Yason nanga Sosipater, den kondreman fu mi, e seni taki un odi tu. 22Mi Tertius, di poti a brifi disi na tapu papira, e taki un odi ini a nen fu Masra. 23Gayus, seni taki un odi tu. Mi e libi na en oso, pe a gemeente e kon makandra.
Erastus, a man di e luku den moni tori fu a foto, nanga wi brada Kwartus, e seni taki un odi. 24Meki a bun-ati fu wi Masra Yesus Kristus de nanga un alamala. Amen.
Gado mus kisi grani!
25Gado abi makti fu meki un kon tranga. Disi na a bun nyunsu fu Yesus Kristus di mi e ferteri unu. Na wan kibritori di ten na ten sma no ben sabi. 26Ma Gado di e libi fu têgo, taki now taki a mus kon na krin. A ben meki den profeiti skrifi en, fu ala folku kan teki bribi èn du a wani fu En. 27Na Gado wawan, di abi ala koni, mus kisi grani fu têgo fu di A seni Yesus Kristus kon. Amen.
