Odi
1Gi a gemeente fu Gado na Korinte.
Disi na wan brifi fu Paulus nanga brada Sostenes. Mi na wan boskopuman fu Kristus Yesus fu di Gado wani dati. 2A brifi na gi unu di Gado poti aparti gi Ensrefi ini Kristus Yesus, unu di Gado kari fu de sma fu En. Ma a de tu gi ala sma di e kari a nen fu wi Masra Yesus Kristus, awinsi pe den e tan. A de Masra fu den èn fu wi.
3Mi e winsi taki Gado wi P'pa nanga Masra Yesus Kristus sa sori un bun-ati èn gi un freide.
Paulus taki Gado tangi fu den sma
4Ala leisi mi e tan taki Gado tangi gi unu, fu di A sori unu En bun-ati ini Kristus Yesus. 5Bika tapu ala fasi un kisi furu blesi, fu di un de wan nanga Kristus. Un sabi fa fu taki èn un kisi ala sortu koni, 6fu di san wi leri unu fu Kristus ben beri rutu na ini unu. 7Dat' meki no wan fu den presenti fu Gado e mankeri unu ini a pisten san un e wakti fu wi Masra Yesus Kristus sori Ensrefi. 8A sa yepi unu fu hori doro te na a kba, fu un kan de sondro fowtu tapu a dei fu wi Masra Yesus Kristus. 9Gado de fu fertrow. A kari unu fu unu nanga En Manpikin Yesus Kristus sa libi leki wan nanga makandra.
Den bribisma prati ini grupu
10Ma brada nanga sisa, ini a nen fu wi Masra Yesus Kristus mi e begi unu, fu un de wan. No meki prati de na un mindri. Un mus de wan ini denki èn wan ini a fasi fa un e si sani. 11Bika, brada nanga sisa, den ososma fu Klowe taigi mi taki un e meki trobi nanga unsrefi. 12San mi wani taki na tak' iniwan fu unu e taki wan tra sani. A wan e taki: “Mi na fu Paulus.” A trawan e taki: “Mi na fu Apolos.” Trawan baka feni taki den na fu Kefas noso taki den na fu Kristus. 13Ma Kristus no prati ini grupu. A no Paulus ben dede gi unu na a kroisi. Un no ben dopu tu ini a nen Paulus. 14Mi e taki Gado tangi tak' mi no dopu no wan fu unu, boiti Krispus nanga Gayus. 15Dan no wan fu unu kan taki tak' a dopu ini a nen fu Paulus. 16Mi e memre taki mi ben dopu Stefanas nanga den ososma fu en tu. Moro fara mi no man memre taki mi dopu ete wan sma. 17Bika Kristus no ben seni mi fu dopu sma, ma fu ferteri den a bun nyunsu. Èn mi no ben mus du en nanga heihei wortu di kmopo fu libisma denki, fu no meki taki a dede fu Kristus na a kroisi lasi en krakti.
Kristus na a koni nanga a krakti fu Gado
18Bika a boskopu fu a kroisi na wan don sani gi den sma di e go lasi. Ma gi wi di Gado ferlusu, a de a krakti fu Gado. 19Bika a skrifi taki: “Mi o tyari wan kba kon na a koni fu den koniman, èn Mi o meki taki a sabi fu den sabiman de fu soso.” 20Pe a koniman de? Pe a wan de di sabi a wèt fu Gado? Pe den bigi takiman fu a ten disi de? Gado sori den taki a koni fu grontapu na don sani. 21A koni fu Gado de fu si ini ala sani, ma libisma nanga ala en koni, no ben kon leri sabi Gado. Dat' meki Gado teki a besroiti fu teki den don sani di wi e preiki fu ferlusu den sma di e bribi. 22Den Dyusma e angri fu si wondru èn den Grikisma e suku moro koni. 23Ma wi e preiki fu Kristus di dede na a kroisi. Gi den Dyusma, a de wan sani di e afrontu den. Gi den sma di no sabi Gado a de wan don sani. 24Ma gi den sma di Gado kari, awinsi den na Dyusma noso Grikisma, wi e preiki taki Kristus de a krakti nanga a koni fu Gado. 25Bika a don fu Gado, koni moro a koni fu libisma, èn a swaki fu Gado, tranga moro a krakti fu libisma.
26Brada nanga sisa, un prakseri san un ben de di Gado kari unu. Libisma fasi, furu fu unu no ben de koniman. Èn a no ben de so taki furu fu unu ben abi bigi makti, noso taki un ben de sma di kmopo fu prenspari famiri. 27Ma den sma di grontapu e si leki don sma, na den dati Gado teki fu poti den koniman na syen, èn den sma di grontapu e si leki swakiwan, na den dati Gado teki fu meki a fesi fu den wan di abi makti fadon. 28Den sma di grontapu no e si leki prenspari sma, nanga den sma di grontapu e si fu noti, na den Gado teki gi Ensrefi. San no de noti ini a ai fu grontapu, na dati Gado teki fu broko a makti fu den wan di de wan sani. 29Dat' meki no wan enkri libisma kan meki bigi na fesi Gado. 30Gado meki taki un dati de wan nanga Kristus Yesus. Gado meki tu taki Kristus de wi koni. Na Kristus e meki wi kon bun ini a ai fu Gado, na En e meki wi tron sma fu Gado èn na En e ferlusu wi. 31Dan a sa de leki fa a skrifi: “Efu wan sma wani meki bigi, dan a mus du en fu Masra kisi bigi nen.”
