1 Korinte 2

₁Brada nanga sisa, di mi kon na unu fu ferteri unu san Gado taki tak' A ben o du, mi no kon nanga moi wortu noso koni. ₂Bika mi ben teki a besroiti fu no taki fu no wan tra sani, dan fu Yesus Kristus, èn tak' A dede na a kroisi. ₃Di mi kon na unu, mi kon ini wan swakifasi, mi ben e frede, èn mi ben e beifi. ₄Te mi ben e taki nanga unu, èn te mi ben e preiki, mi no ben e du en nanga hebi wortu fu sori bigi koni, ma mi ben du en ini a krakti fu a Yeye. ₅Bika mi no ben wani taki un ben mus bow un bribi tapu a koni fu libisma, ma tapu a krakti fu Gado.

₆Te wi e taki nanga sma di lepi kba ini a bribi, wi e taki nanga koni. Ma dati no de wan koni fu grontapu. A no de wan koni tu fu den makti di e rigeri grontapu. Gado o puru den na pasi. ₇A koni fu san wi e taki, na a koni fu Gado di ben kibri. No wan sma ben sabi en ete. Fosi Gado ben meki grontapu, A ben teki a besroiti kba taki a koni fu En o tyari glori kon gi unu. ₈No wan fu den makti di e rigeri grontapu ben sabi fu en. Efu den ben sabi fu en, den no ben o spikri a Masra fu glori na a kroisi. ₉Ma a de soleki fa a skrifi: “San no wan ai ben si, san no wan yesi ben yere, èn san noiti wan sma ben prakseri ete, na dati Gado ben besroiti fu du gi den sma di lobi En.” ₁₀Ma Gado meki a Santa Yeye sori wi den sani disi. Bika a Yeye e ondrosuku ala sani, srefi den dip'bere prakseri fu Gado. ₁₁Bika suma sabi san wan libisma e prakseri? Na en eigi yeye wawan sabi dati! Na so no wan sma no sabi tu san Gado e prakseri, dan a Yeye fu Gado wawan. ₁₂Wi no ben kisi a yeye fu grontapu, ma wi ben kisi a Yeye di kmoto fu Gado. So wi kon sabi san Gado gi wi ini En bun-ati. ₁₃Fu dat'ede wi no e taki nanga libisma koni fu den sani disi, ma nanga a koni fu a Santa Yeye. So wi kan leri den sma di a Yeye e tiri, den sani fu a Yeye. ₁₄Ma wan sma di no abi a Yeye fu Gado, no e wani teki den sani fu a Yeye fu Gado. A e si den sani dati leki don sani. A no man ferstan den, bika nomo nanga yepi fu a Yeye, yu man krutu den. ₁₅Bika wan sma di a Yeye e tiri man krutu ala sani. Ma no wan enkri sma sa man krutu na en tapu. ₁₆“Bika, suma sabi san Gado e prakseri? Suma o man gi En rai?” Ma wi e ferstan sani na a fasi fa Kristus e ferstan den.