1 Korinte 3

₁Brada nanga sisa, mi no ben man taki nanga unu leki sma di a Yeye e tiri. Mi ben mus taki nanga unu leki sma di e denki wan grontapu fasi ete, leki pikin ini a Kristenbribi. ₂Na merki mi ben abi fu gi unu. Mi no gi un tranga sani fu nyan, bika un no ben man nyan dati ete. Te nanga now srefi un no man nyan en. ₃Bika un e libi ete leki grontapusma. Efu un e dyarusu tapu makandra èn efu un e feti nanga makandra, dan un e libi leki grontapusma. Un e libi leki fa un ben de fos'fosi. ₄Bika efu a wan e taki: “Mi na fu Paulus,” èn a trawan feni taki: “Mi na fu Apolos,” dan un e libi ete leki fa un ben de fos'fosi.

₅Suma na Apolos? Suma na Paulus? Wi na wrokoman nomo di tyari un kon na bribi. Wi e du a wroko di Masra gi wi fu du. ₆Mi prani a siri, Apolos nati a gron, ma na Gado meki a sani gro. ₇A prenspari sma a no a wan di e prani, noso a wan di e nati a gron, ma na Gado di e meki a sani gro. ₈A sma di e prani nanga a sma di e nati a gron, e wroko nanga a srefi prakseri. Ma ibriwan fu den o kisi en pai fu a wroko san a ben du. ₉Bika wi e wroko makandra gi Gado. Èn unu na a gron fu Gado, unu na a oso fu Gado.

₁₀Fu di Gado sori mi En bun-ati meki mi ben man poti a fundamenti leki wan mesreman di sabi en wroko bun, èn wan trawan e bow go moro fara na en tapu. Ma ibri sma mus luku bun fa a e bow na en tapu. ₁₁Bika no wan sma kan poti wan tra fundamenti boiti a wan di de kba. Èn a fundamenti dati na Yesus Kristus. ₁₂Yu kan bow tapu a fundamenti disi nanga gowtu, solfru, diriston, udu, drei grasi noso karu wiwiri. ₁₃Ma a wroko fu ibri sma o de fu si tapu a bigi dei. Bika a faya di o bron tapu a dei dati, sa sori fa a wroko fu a sma ben de, efu a ben bun noso efu a no ben bun. ₁₄Efu san a sma bow tapu a fundamenti disi e tan bun, dan a sma dati o kisi pai. ₁₅Ma efu a sani san a bow bron, dan a o lasi a pai di a ben mus kisi. A sma srefi no o go lasi, ma a o gersi wan sma di lon kmoto ini wan bigi faya.

₁₆Un no sabi dan taki unu na a santa presi fu Gado, èn tak' a Yeye fu Gado e libi na ini unu? ₁₇Efu wan sma pori a santa presi fu Gado, Gado o pori a sma dati baka. Bika a santa presi fu Gado santa, èn unu na a santa presi dati. ₁₈No meki no wan sma kori ensrefi. Efu wan fu unu e prakseri taki a koni grontapu fasi, dan a mus kon don. Dan fosi a o tron wan koniman. ₁₉Bika a koni fu a grontapu disi, na don gi Gado. A skrifi taki: “A e baka den koniman nanga den eigi fatu.” ₂₀Wan tra presi a skrifi taki: “Masra sabi taki den prakseri fu den koniman na soso sani.” ₂₁Dat' meki no wan sma mus meki bigi gi wan libisma. Bika ala sani na fu unu. ₂₂Awinsi na Paulus, Apolos noso Kefas, grontapu, dede noso libi, sani fu now noso den sani san de fu kon, ala sani na fu unu. ₂₃Ma unu na fu Kristus, èn Kristus na fu Gado.