1 Korinte 4

₁Sma mus si unu leki wrokoman fu Kristus di kisi a frantwortu fu luku den kibri sani fu Gado. ₂Ma a sma di kisi a frantwortu fu luku a gudu fu trawan, mus sori taki den de fu fertrow. ₃Mi no abi bisi fa unu noso tra sma e si mi. Mi no e krutu misrefi tu. ₄Bika fu mi sei mi konsensi no e fon mi. Ma dati no wani taki ete tak' mi bun ini Gado ai. Bika Masra na a Wan di e krutu mi. ₅Dat' meki un no mus bigin taki tak' wan sma fowtu fosi a ten. Wakti te Masra o doro. Na En o tyari den sani di de na dungru kon na krin, èn A o meki ala sma sabi fu sanede son sma ben du son sani. Dan Gado sa gi ala sma a grani san a mus kisi.

₆Brada nanga sisa, fu un kan ferstan a sani disi meki mi teki mi nanga Apolos leki eksempre. Mi du disi fu un kan leri fu wi taki un mus hori unsrefi na san skrifi. Dan no wan fu unu no o man meki bigi èn si a wan wrokoman hei moro a trawan. ₇Suma taigi unu taki un hei moro trawan? Ala sani san un abi, na kisi un kisi en. Èn efu na kisi un kisi en, fu sanede un e meki bigi dan leki efu a no de so?

₈Un dati, un no abi noti fanowdu moro! Unu na guduman! Un tron kownu kba, sondro wi! Ma mi ben winsi taki un ben de kownu trutru kba, dan wi ben o de kownu makandra nanga unu. ₉Gi mi a gersi taki Gado gi wi leki boskopuman fu Yesus a presi te na bakasei, neleki sma di mus dede. Heri grontapu, engel nanga libisma e luku san o psa nanga wi. ₁₀Wi kon don fu Kristus ede, ma unu koni ini Kristus. Wi swaki, ma unu tranga. Den e gi unu grani, ma wi den e si leki noti. ₁₁Te nanga now angri nanga watra e kiri wi. Wi no abi nofo krosi fu weri. Sma e naki wi nanga kofu, èn wi no abi fasti tanpresi. ₁₂Wi e wroko tranga nanga wi anu. Te sma e kosi wi, wi e blesi den. Te sma de na wi baka fu du wi ogri, wi e teki dati nanga pasensi. ₁₃Te sma taki takru fu wi, wi e tan abi switi maniri. Te nanga now sma e si wi leki den moro lagi sani di de. Den e teki wi leki den figifutu.

₁₄Mi no e skrifi den sani disi fu meki un firi syen. Ma leki mi pikin di mi lobi, mi wani leri unu wantu sani. ₁₅Bika awinsi un ben abi dusundusun sma di kweki unu ini Kristus, na wan p'pa nomo un abi. Na mi na un p'pa na ini Kristus Yesus, fu di na mi tyari a bun nyunsu gi unu. ₁₆Dat' meki mi e begi unu, un du san un si taki mi e du. ₁₇Fu a sani disi ede meki mi seni Timoteus kon na unu. Mi lobi en leki mi pikin na ini Masra, èn a de fu fertrow. A sa tyari kon ini unu prakseri baka fa mi ben e libi fu di mi de wan nanga Kristus Yesus. A o du en leki fa mi e leri na ala presi ini ala gemeente. ₁₈Ma sonwan fu unu e meki bigi, fu di den prakseri taki mi no ben o kon na unu. ₁₉Ma efu Masra wani, mi o kon her'esi na unu. Dan mi o si san den sma di e meki bigi kan du, noso efu na taki den man taki nomo. ₂₀Bika te yu de ondro a tiri fu Masra, a no tak'taki e teri, ma na krakti. ₂₁Fa un wani taki mi mus waka miti unu? Nanga wan tiki, noso nanga lobi èn ini wan safri fasi?