1 Korinte 5

₁Sma e taki fu a fasi fa son sma na un mindri e gi densrefi abra na takru lostu. Den go so fara taki den e du sani san srefi den sma di no sabi Gado no e du. Wan man na un mindri e libi nanga a uma fu en p'pa. ₂Dan un e meki bigi gi unsrefi ete, ma na sari un mus sari, dan un yagi a man puru na un mindri di e du a sani dati. ₃Bika mi no de libilibi na un mindri, ma ini prakseri mi de nanga unu. Dan neleki mi de na un mindri, mi krutu a man disi kba di du sowan sani. ₄Te mi nanga unu de ini wan yeye makandra ini a nen fu Masra Yesus, dan nanga a krakti fu wi Masra Yesus Kristus ₅wi o gi a man disi abra na Satan. Dan en skin o kisi strafu, ma en yeye no o go lasi tapu a dei fu Masra.

₆A bigi san un e meki no abi no wan warti. Un no sabi dan taki pikinso dyesi sari kba fu meki a heri blon sweri? ₇Un puru a owru dyesi trowe fu un kan de leki nyunyun blon. Unu na brede di meki sondro dyesi. Bika den srakti wi paskalam. Dati na Kristus. ₈Dat' meki un mus meki prisiri, ma no nanga owru dyesi. Un no mus du en tu nanga dyesi fu ogri-ati nanga takru fasi. Ma un mus meki prisiri nanga a brede di meki sondro dyesi, dati wani taki wan krin libi sondro leifasi. ₉Mi ben skrifi un kba taki un no mus bemui nanga sma di e gi densrefi abra na takru lostu. ₁₀Mi no wani taki nanga dati taki un no mus bemui nanga no wan sma ini grontapu di e gi ensrefi abra na takru lostu. Mi no wani taki tu tak' un no mus bemui nanga den gridi sma, den sma di e bedrigi trawan, nanga den sma di e dini kruktu gado. Noso dan un ben o abi fu kmoto fu a grontapu disi. ₁₁San mi e skrifi unu na taki un no mus bemui nanga wan sma di e kari ensrefi wan bribisma, ma dan a e gi ensrefi abra na takru lostu, noso a gridi, a e dini kruktu gado, a e taki takru fu trawan, a e dringi drungu noso a e bedrigi sma. Un no mus nyan srefi nanga sowan sma. ₁₂Bika a no de na mi fu krutu den sma di de na dorosei. Un srefi e krutu un eigi sma nomo! ₁₃Gado o krutu den sma di de na dorosei. Ma un mus puru a sma di du a ogri na un mindri!