Sakaria 7

₁Tapu a di fu fo dei, fu a di fu neigi mun, a mun Kislew, di Kownu Darius ben de fo yari na makti, MASRA gi Sakarya wan boskopu. ₂Den sma fu a foto Betel ben seni Sareser, Regem-Melek nanga den man fu en, fu MASRA sori den En bun fasi, ₃èn fu den aksi den priester fu a oso fu MASRA fu ala sani nanga den profeiti efu den ben mus tan row nanga faste ini a di fu feifi mun, soleki fa den ben e du someni yari kba.

₄Ne MASRA fu ala sani gi mi a boskopu disi. A taki: ₅“Aksi den sma fu a kondre nanga den priester efu na gi Mi den ben e faste ala den seibitenti yari di psa, te den ben e faste nanga row ini a di fu feifi nanga a di fu seibi mun? ₆Aksi den efu te den e nyan nanga dringi efu den no e du en fu di na densrefi wani? ₇Na so a ben den tu di MASRA ben meki den profeiti fu fosi taki nanga den, di sma ben e libi ete na ini Yerusalem nanga den foto lontu en. No wan dyugudyugu ben de. Sma ben e libi tu ete ini a Negebsabana nanga a kontren na den bergifutu. ₈Now MASRA e gi Sakarya a srefi boskopu baka: ₉‘Na so MASRA fu ala sani taki: Koti krutu tapu wan leti fasi, lobi makandra èn sori makandra sari-ati. ₁₀Un no mus pina den uma di masra dede kba, nanga den pikin di no abi p'pa nanga m'ma moro. Un no mus pina sma fu wan doroseikondre tu noso pôtisma èn no prakseri ini yusrefi fu du wan trawan ogri. ₁₁Ma den no ben wani arki. Den kaka den futu èn den tapu den yesi fu no arki. ₁₂Den tranga den ati leki ston fu no arki a wèt nanga den sani di MASRA fu ala sani ben meki En Yeye taigi den fosten profeiti fu leri den. Dat' meki MASRA fu ala sani En ati bron na den tapu. ₁₃Leki fa A ben e kari den ma den no ben wani gi yesi, na so den sa kari tu sondro fu Mi arki den.’ Na dati MASRA fu ala sani taki. ₁₄Mi o wai den go na ala sortu folku di den no sabi, leki fa wan tranga winti e wai sani gwe. A kondre sa tan didon leki wan broko pranasi na baka. Sma no sa go kon moro na ini a kondre.” Na so den meki a moi kondre disi tron wan broko pranasi.