1 Lelakoné Kraton 15

₁Daved nggawé gedong-gedong kanggo dèkné déwé ing kutané Daved; sakwisé mengkono terus tata-tata kanggo panggonan kanggo petiné Gusti Allah lan digawèkké tarup. ₂Waktu kuwi Daved ngomong: “Aja ana wong sing ngusung petiné Gusti Allah, kejaba wong Lèwi, awit wong-wong iki sing dipilih karo GUSTI supaya ngusung petiné Gusti lan sing njaga nganti ing sak lawas-lawasé.”

₃Sakwisé mengkono Daved terus nyeluk wong Israèl kabèh menyang ing Yérusalèm, dikongkon mboyong petiné GUSTI menyang ing panggonan sing wis dityawiské. ₄Daved nglumpukké turunané Harun lan wong Lèwi: ₅Sangka turunané Kéhat: Uriel, sakwijiné penggedéné, lan para seduluré sak brayaté: wong 120; ₆sangka turunané Mérari: Asaya, sakwijiné penggedéné, lan para seduluré sak brayaté: wong 220; ₇sangka turunané Gérsom: Yoèl, sakwijiné penggedéné, lan para seduluré sak brayaté: wong 130; ₈sangka turunané Elisafan: Semaya, sakwijiné penggedéné, lan para seduluré sak brayaté: wong 200; ₉sangka turunané Hébron: Eliel, sakwijiné penggedéné, lan para seduluré sak brayaté: wong wolung puluh; ₁₀sangka turunané Yizhar: Aminadab, sakwijiné penggedéné, lan para seduluré sak brayaté: wong 112.

₁₁Daved terus nyeluk imam Sadok lan imam Abyatar, lan para wong Lèwi, ya kuwi Uriel, Asaya, Yoèl, Semaya, Eliel lan Aminadab; ₁₂kuwi pada diomongi mengkéné: “Hé!, sampéyan para penggedéné brayaté wong Lèwi, sampéyan pada sutyèkké uripmu, ya sampéyan kabèh uga para sedulurmu sak brayaté, terus pada mboyonga petiné GUSTI, Gusti Allahé Israèl, menyang panggonan sing wis Tak tyawiské. ₁₃Awit ing waktu sepisanan sampéyan pada ora ana, GUSTI, Gusti Allah kita, terus nibakké bebendu ing tengah kita, awit kita ora njaluk pituduh kaya sak mestiné.” ₁₄Mulané para imam lan para wong Lèwi terus pada nyutyèkké uripé, awit arep mboyong petiné GUSTI, Gusti Allahé Israèl. ₁₅Sakwisé mengkono turunané Lèwi terus ngusung petiné Gusti Allah nganggo pikulan ditumpangké ing pundaké, netepi préntahé Moses lan tyotyok karo tembungé GUSTI.

₁₆Daved ngongkon marang para penggedéné wong Lèwi, supaya para seduluré sak brayaté pada dikongkon ngadek, ya kuwi para tukang ngidung karo nggawa pirantiné musik, kayata harep, siter lan ketyer, lan supaya pada ngunèkké nyanyian-nyanyian kebungahan sing banter. ₁₇Para wong Lèwi terus ngongkon ngadek marang Héman anaké Yoèl, lan marang para seduluré sak brayaté: Asaf anaké Bérékya; sangka turunané Mérari, para seduluré sak brayaté; Etan anaké Kusaya; ₁₈lan bebarengan karo dèwèké kabèh para seduluré nomer loro: Sakaria, Yaaziel, Semiramot, Yehièl, Uni, Eliab, Benaya, Maaséya, Matitya, Elifelé, Miknéya, lan Obèd-Edom lan Yeiel, para tukang njaga gapura. ₁₉Para tukang ngidung ya kuwi Héman, Asaf lan Etan dikongkon ngunèkké nyanyian nganggo ketyer. ₂₀Sakaria, Asiel, Semiramot, Yehièl, Uni, Eliab, Maaséya, Benaya dikongkon ngunèkké terbangan karo swara duwur, ₂₁nanging Matitya, Elifelé, Miknéya, Obèd-Edom, Yeiel lan Asasya dikongkon ngunèkké siter sing wolung tataran swara luwih endèk kanggo ngiringi kidungan. ₂₂Kenanya penggedéné wong Lèwi, kuwajipané usung-usung. Kuwi dadi penggedéné ngangkati barang, awit ngerti bab kuwi. ₂₃Bérékya lan Elkana kuwi dadi tukang njaga lawangé peti; ₂₄lan Sebanya, Yosafat, Nétanéèl, Amisai, Sakaria, Benaya lan Elièser, kabèh dadi imam, kuwi sing ngunèkké trompèt ing ngarepé petiné Gusti Allah, nanging Obèd-Edom lan Yehia kuwi dadi tukang jaga lawangé peti mau.

₂₅Daved, para pinituwané Israèl lan para penggedéné suradadu 1000 terus pada budal arep mboyong petiné perjanjiané GUSTI mau sangka omahé Obèd-Edom karo bungah. ₂₆Lan awit Gusti Allah ngekèki pitulungan marang para wong Lèwi sing pada mboyong petiné perjanjiané GUSTI kuwi, mulané terus pada masrahaké sapi lanang pitu lan wedus lanang pitu. ₂₇Daved nganggo jubah mori lenan alus, lan uga para wong Lèwi sing mboyong peti mau, lan para tukang kidung, lan Kenanya sing penggedéné ngangkati barang lan para juru ngidung. Daved uga nganggo kotang Efod mori lenan. ₂₈Wong Israèl kabèh pada nggotong peti perjanjiané GUSTI mau karo diiringi surak lan uniné trompèt, nafiri lan ketyer, karo ngunèkké terbangan lan siter. ₂₉Bareng petiné perjanjiané GUSTI tekan ing kutané Daved, Mikal, wong wadon anaké Saul, nginguk ing tyendéla, terus weruh Daved jingklak-jingklak lan jogètan. Mulané sak njeruhné ati ngrèmèhké Daved.