Saul ditampik dadi ratu
1Samuèl ngomong marang Saul: “Kula wis diutus karo GUSTI nglengani sampéyan dadi ratu ngwasani Israèl umaté Gusti; awit sangka kuwi, supaya sampéyan gelem ngrungokké marang tembungé GUSTI. 2Mengkéné tembungé GUSTI, sing ngwasani langit lan bumi: Aku arep mbales marang bangsa Amalèk, kanggo apa sing ditindakké marang wong Israèl, ya kuwi enggoné wong Amalèk ngalang-alangi bangsa Israèl, waktu lunga sangka negara Egipte. 3Mulané saiki lungaa, wong Amalèk kuwi telukna, apa sing ketemu ing wong-wong kuwi entèkna lan aja ana sing kok welasi. Wong lanang, wong wadon, botyah-botyahé lan bayiné, sapiné lan wedusé, untané lan kimaré, kabèh pada patènana.”
4Saul terus nyeluk rayat dikongkon nglumpuk lan terus dipriksa suradaduné ing Telaim: suradadu ing daratan ana wong 200.000 lan 10.000 sangka Yéhuda. 5Bareng Saul wis teka ing kutané wong Amalèk terus mréntah para suradaduné supaya nyegat ing legokan. 6Tembungé Saul marang bangsa Kèni: “Pada lungaa, ngadaha, lan minggira sangka sak tengahé wong Amalèk, supaya kowé aja nganti pada tak entèkké bareng karo para wong kuwi. Kowé apa ora wis pada ngétokké kekantyan karo wong Israèl, waktu pada lunga sangka negara Egipte?” Mulané wong Kèni terus pada adoh sangka tengah-tengahé wong Amalèk. 7Saul terus nggempur lan ngalahké bangsa Amalèk wiwit sangka Hawila tekan ing Sur ing wétané negara Egipte. 8Nanging Agag, ratuné wong Amalèk dityekel ijik urip, nanging suradadu kabèh pada dientèkké karo landepé pedang. 9Nanging Saul lan suradaduné nylametké Agag, wedus-wedusé, uga sapi-sapi sing apik-apik lan lemu-lemu, kabèh tyempé-tyempéné lan samubarang sing ana ajiné, kuwi kabèh ora dientèkké. Mung kabèh kéwan lan barang sing ora ana ajiné tur ala kuwi kabèh pada dientèkké.
10Terus ana tembungé GUSTI marang Samuèl mengkéné: 11“Aku getun ndadèkké ratu Saul, awit wong kuwi wis nyingkur marang Aku lan nglalèkké tembung-Ku.” Samuèl nganti lara atiné, nyebut-nyebut marang GUSTI sewengi muput. 12Samuèl tangi ing wayah ésuk mruput terus nemoni Saul, nanging Samuèl dikèki weruh mengkéné: “Saul wis lunga menyang Karmèl waktu iki lan wis ngedekké tugu pengéling-éling kanggo dèkné déwé; terus budal lunga marang ing Gilgal.”
13Bareng Samuèl ketemu karo Saul, tembungé Saul marang Samuèl: “Sampéyan kaberkahan karo GUSTI; kula wis manut préntahé GUSTI.” 14Nanging Samuèl ngomong: “Yèn mengkéné kenèng apa kok ana embak-embèké wedus lan bengahé sapi sing dikrungu ing kupingku?” 15Semauré Saul: “Kabèh kuwi anggèné nggawa sangka negara Amalèk, awit para wong pada ngéman wedus-wedusé lan sapi-sapiné sing apik déwé, karepé bakal kanggo kurban pasrah marang GUSTI, Gusti Allah sampéyan, nanging luwihé wis pada kita entèkké.” 16Samuèl ngomong marang Saul: “Ya wis: Kula bakal ngomongké tembungé GUSTI marang kula waktu mau wengi.” Tembungé Saul marang Samuèl: “Kono diwedaraké.”
17Sakwisé kuwi Samuèl ngomong: “Senajan sampéyan déwé wis ngakoni tyilik, apa ora wis dijunjung dadi penggedéné para taler Israèl? Lan GUSTI wis nglengani sampéyan dadi ratuné bangsa Israèl? 18GUSTI wis ngongkon ngluruk marang sampéyan, karo paweling: Kowé lungaa, nglurukka wong sing pada nglakoni dosa kuwi, pada entèkna, ya kuwi wong Amalèk. Kowé peranga nglawan wong-wong kuwi, kuwi pada kok entèkna. 19Kenèng apa sampéyan kok ora manut préntahé GUSTI? Kenèng apa sampéyan njupuk barang-barang sing direbut lan nindakké apa sing ala ing ngarepé GUSTI?”
20Saul terus ngetokké tembung marang Samuèl: “Kula apa ora wis manut pitutur-pituturé GUSTI lan wis nandangi sing dipréntahké karo GUSTI marang kula lan kula mbandang ratu Agag, ratu ing Amalèk, nanging wong Amalèk wis kula entèkké kabèh. 21Nanging rayat pada jikuk sing direbut sing rupa wedus, apa, sapi-sapiné sing apik, sing dipisah sangka sing pantyèn bakal dipatèni, bakal dikurbanaké pasrah marang GUSTI, Gusti Allah sampéyan, ing Gilgal.” 22Nanging tembungé Samuèl:
“Apa GUSTI seneng marang kurban obongan lan kurban sing dibelèh
pada karo mbangun turut marang pitutur-pituturé GUSTI?
Mbangun turut kuwi tenan luwih apik tenimbang kurban sing dibelèh,
nggatèkké luwih apik tenimbang gajihé wedus lanang.
23Awit mbruntak kuwi pada karo dosané tukang tenung
lan ora-nurut kuwi pada karo nyembah brahala lan retya.
Awit sampéyan wis nampik marang tembungé GUSTI,
mila GUSTI ya nampik sampéyan, bakal didunké enggèn sampéyan dadi ratu.”
24Tembungé Saul marang Samuèl: “Kula wis nandangi dosa, awit wis nerak préntahé GUSTI lan tembungé sampéyan; awit kula wedi marang rayat mulané kula nuruti penjaluké. 25Nanging saiki muga sampéyan ngapura dosa kula. Gelema mulih bareng mlaku karo kula, kula bakal sujut ngabekti marang GUSTI.” 26Nanging Samuèl ngomong marang Saul: “Kula ora bakal mulih bareng sampéyan, awit sampéyan wis nampik marang tembungé GUSTI; mulané GUSTI wis nampik sampéyan enggèn sampéyan dadi ratuné Israèl.”
27Bareng Samuèl minger arep lunga, Saul nyekel pojokané jubahé Samuèl, nganti suwèk. 28Samuèl terus ngomong marang Saul: “GUSTI wis nyuwèk kratoné Israèl sangka sampéyan ing dina iki lan wis dikèkké marang wong liya sing luwih apik tenimbang sampéyan. 29Apa menèh sing Mahaluhur ing Israèl kuwi ora goroh lan Panjenengané ora tau gela, awit Panjenengané duduk manungsa sing wajip nggetuni.” 30Nanging tembungé Saul: “Kula wis nandangi dosa, nanging sampéyan muga dililani ngétokké hurmat sampéyan marang kula saiki ing ngarepé wong Israèl, kula njaluk mulih barengi kula, kula bakal sujut ngabekti marang GUSTI, Gusti Allah sampéyan.” 31Sakwisé kuwi Samuèl bali mbarengi mlakuné Saul. Lan Saul sujut ngabekti marang GUSTI.
32Samuèl terus ngongkon: “Agag ratu ing Amalèk, kuwi diadepké mréné!” Karo tatak Agag lunga nemoni Samuèl, awit pikirané: “wediné pati wis kliwat.” 33Nanging Samuèl ngomong: “Kaya pedangmu sing ndadèkké wong wadon pada kélangan anak, mengkono uga ibumu bakal kélangan anak ing antarané wong wadon.” Sakwisé kuwi Samuèl ngetok guluné Agag ing ngarepé GUSTI ing Gilgal.
34Samuèl terus lunga menyang ing Rama, nanging Saul mulih menyang ing omahé ing Gibéa-Saul. 35Nganti tekan matiné Samuèl ora ketemu karo Saul menèh, nanging Samuèl banget lara atiné, awit sangka Saul. Lan GUSTI gela atiné, awit ngangkat Saul dadi ratuné bangsa Israèl.
