2 Lelakoné Kraton 33

₁Manasé waktu dadi ratu umuré rolas taun, nanging enggoné dadi ratu ing Yérusalèm suwéné sèket lima taun. ₂Ratu nandangi apa sing ala ing ngarepé GUSTI tyotyok karo penggawéné ala para bangsa sing wis ditundungi karo GUSTI sangka ngarepé wong Israèl. ₃Piyambaké ngedekké puntuk-puntuk pangurbanan menèh sing wis pada dibubrahi karo Hiskia, bapaké; Ratu nggawé mesbèh-mesbèhé kanggo para Baal, nggawé retya-retyané Asyèra lan sujut lan nyembah marang lintang-lintang ing langit kabèh lan ngabekti marang kuwi. ₄Piyambaké ya ngedekké mesbèh-mesbèhé ing griyané GUSTI, senajan kanggo griya kuwi, GUSTI wis ngomong: “Asma-Ku bakal manggon ing Yérusalèm sak lawas-lawasé!” ₅Lan uga nggawé mesbèh-mesbèhé kanggo lintang-lintang suradaduné langit , ing plataran loro griyané GUSTI. ₆Malah para anaké pada dipasrahké kanggo kurban ing geni ing legokan Ben-Hinom; piyambaké olèh ngèlmu ngramal, ngèlmu mbedèk lan ngèlmu sihir, sesrawungan karo para préwangan lan para tukang ngundang rohé nubuat. Ratu nandangi apa sing ala ing ngarepé GUSTI okèh banget, nganti nggawé nesuné ati-Né. ₇Piyambaké uga mernahké retya brahala gawèané ing griyané Gusti Allah, senajan Gusti Allah wis ngomong marang Daved lan marang Salomo, anaké: “Ing omah iki lan ing Yérusalèm, sing wis Tak pilih sangka tangané taleré Israèl, Aku bakal ndèkèkké asma-Ku sak lawas-lawasé! ₈Aku ora bakal ndadèkké sikilé wong Israèl nganti adoh menèh sangka tanah sing wis Tak tetepké marang para leluhurmu, enggoné pada tetep nindakké sak kabèhé pepakon-Ku lantaran Moses, ya kuwi sak okèhé angger-angger, katetepan lan pernatan.” ₉Nanging Manasé nasarké Yéhuda lan para sing manggon ing Yérusalèm, nganti pada nindakké apa sing ala ngungkuli para bangsa sing wis dientèkké karo GUSTI sangka ngarepé wong Israèl.

₁₀GUSTI terus ngomong marang Manasé lan rayaté, nanging pada ora nggubris marang tembungé kuwi. ₁₁Awit sangka kuwi GUSTI terus nekakké para penggedéné suradaduné ratu Asyur, sing nyekel Manasé nganggo gantol, terus dibanda nganggo ranté tembaga lan terus digawa menyang Babèl. ₁₂Ing sak njeruhné kahanan kepèpèt kuwi, ratu ngupaya nglilihké atiné GUSTI, Gusti Allahé; piyambaké ngasorké dèkné déwé tenan ing ngarepé Gusti Allahé para leluhuré, ₁₃lan ndedonga marang Panjenengané. GUSTI terus nuruti pandongané lan nuruti penjaluké. Gusti Allah mbalèkké piyambaké menyang Yérusalèm lan diangkat dadi ratu menèh. Manasé terus ngakoni, yèn GUSTI kuwi Gusti Allah.

₁₄Ratu terus ngedekké témbok njaba ing kutané Daved, ing kuloné Gihon, ing legokan, nganti tekan ing sak tyedaké gapura Iwak, ngubengi ing Ofèl. Témbok kuwi digawé duwur banget. Ratu uga ndèkèkké penggedé-penggedéné perang ing saben kuta sing dipageri watu ing negara Yéhuda. ₁₅Allah-allahé mantya lan brahala pada disingkirké sangka griyané GUSTI, uga sak okèhé mesbèh sing didekké ing gunungé griyané GUSTI lan ing Yérusalèm, kuwi pada dibuwangi menyang sak njabané kuta. ₁₆Mesbèhé GUSTI didekké menèh lan terus kanggo pasrah kurban keslametan lan kurban pamuji maturkesuwun lan menèh ratu terus préntah marang Yéhuda, supaya ngabekti marang GUSTI, Gusti Allahé Israèl. ₁₇Nanging senajan mengkono, rayat ijik pasrah kurban ing puntuk-puntuk pangurbanan, nanging mung marang GUSTI, Gusti Allahé.

₁₈Sak luwihé sejarahé Manasé, pandongané marang Gusti Allahé lan tembung-tembungé para wong tukang ndelok sing pada ngomong marang ratu atas asmané GUSTI, Gusti Allahé Israèl, kabèh kuwi kabèh ing sejarahé para ratu ing Israèl. ₁₉Pandongané lan ketrimané pandongané, sak okèhé dosané lan enggoné ora setia, kabèh panggonan sing diedeki puntuk-puntuk pangurbanan, tugu-tugu brahala lan retya-retyané tatahan, sak durungé piyambaké ngasorké uripé, kabèh kuwi pada ketulis ing sejarahé para wong tukang ndelok. ₂₀Sakwisé mengkono Manasé terus dililani ngasuh nunggal karo para leluhuré lan dikubur ing kratoné. Nanging Amon, anaké, terus dadi ratu, nggentèni piyambaké.

₂₁Amon waktu dadi ratu umuré rolikur taun, nanging enggoné dadi ratu ing Yérusalèm suwéné rong taun. ₂₂Ratu nandangi apa sing ala ing ngarepé GUSTI, kaya sing ditindakké karo Manasé, bapaké. Amon pada nggawé sajèn kurban marang sak okèhé retya tatahan, sing digawé karo Manasé, bapaké lan ngabekti marang kuwi. ₂₃Nanging piyambaké ora ngasorké uripé ngarepé GUSTI, kaya Manasé, bapaké, malah saya mundak okèh kesalahané. ₂₄Para pegawéné terus pada komplotan nglawan marang piyambaké; Ratu dipatèni ing kratoné. ₂₅Nanging sing pada komplotan nglawan Amon mau terus dipatèni karo rayat ing negara kono lan sakwisé mengkono rayat mau terus ngangkat ratu Yosia, anaké, nggentèni piyambaké.