2 Para Ratu 11

₁Bareng Atalya, ibuné ratu Ahazia, ngerti, yèn anaké wis mati, terus tandang matèni sakkèhé turunané ratu. ₂Nanging Yoseba, anak wadoné ratu Yoram, seduluré wadon ratu Ahazia, terus njupuk Yoas, anaké ratu Ahazia, dilungakké sangka sak tengahé para anaké ratu sing arep pada dipatèni kuwi, dilebokké ing gedong simpenan ambèn, bebarengan karo sing ngemong, lan didelikké sangka ngarepé Atalya, dadiné ora katut dipatèni. ₃Nem taun lawasé enggoné ndelik ing griyané GUSTI, bebarengan karo wong wadon mau, sak untara kuwi Atalya mréntah ing negara. ₄Ing taun sing kaping pitu Yoyada nglumpukké para penggedéné suradadu 100, sangka wong Kari lan sangka suradadu penjaga. Kuwi pada dityeluk ing griyané GUSTI, nganakké perjanjian lan sumpah ing griyané GUSTI, terus pada diduduhi anaké ratu. ₅Sakwisé Yoyada préntah marang para suradadu mau: Iki sing kudu kok tindakké: sak pratelon sing wis rampung nglakoni kuwajipané ing dina sabat ing kéné, kuwi pada jagaa ing kraton, ₆sak pratelon menèh anaa ing gapura Sur, lan sak pratelon anaa ing gapura ing sak mburiné suradadu penjaga. Sing jaga ing kraton, kudu tetep ing kono. ₇Déné sing rong golongan, ya kuwi sakkèhé wong sing kuwajipané ing kéné ing dina sabat lan jaga ing griyané GUSTI, ₈kuwi kuwajipan njaga ratu ing sak ubengé nganti temu gelang, lan nyekel gaman, lan sapa sing nyedaki ugeranmu, kudu dipatèni. Sak terusé yèn ratu metu utawa mlebu kudu ditutké.

₉Para penggedéné suradadu 100 kuwi pada nandangi kaya sing dipréntahké imam Yoyada. Pada nggawa wongé, sing wis rampung nindakké kuwajipané ing dina sabat, bebarengan karo wong sing pada mlebu ing dina kuwi, terus pada nemoni imam Yoyada. ₁₀Imam terus ngekèki marang para penggedéné suradadu 100 mau tumbak lan tamèng duwèké ratu Daved sing disimpen ing griyané GUSTI. ₁₁Para suradadu mau terus pada mapan ing sak kiwa-tengené omah lan nganggo gaman, lan ing sak ubengé mesbèh lan omah, pada njaga ratu. ₁₂Sakwisé mengkono imam Yoyada terus nggawa liwat anaké ratu, terus dienggoni makuta lan dikèki layangé ratu. Anaké ratu diangkat dadi ratu lan dijebatani, lan keplok-keplok wong-wong terus pada surak: Urip kanggo ratu! ₁₃Bareng Atalya krungu swarané para suradadu penjaga lan rayat, terus lunga ing griyané GUSTI, nemoni rayat mau. ₁₄Terus ngerti ratu ngadek ing sak tyedaké tyagak kaya adaté, para penggedéné lan para sing nggawa trompèt. Rayat ing negara pada bungah-bungah kabèh karo ngunèkké trompèt. Atalya terus nyuwèk-nyuwèk sandangané lan mbengok: ngiyanati, ngiyanati! ₁₅Nanging imam Yoyada terus préntah marang para penggedéné suradadu 100, ya kuwi sing pada penggedéné suradadu, tembungé: “Wong wadon kuwi gawanen metu sangka barisan! sapa mbélani kuwi, patènana karo pedang!” Awit sak durungé imam wis ngomong: Aja dipatèni ing griyané GUSTI! ₁₆Wong wadon kuwi terus dityekel. Waktu mlebu ing kraton, bareng tekan ing dalan sing kanggo liwat jaran, Wong wadon kuwi dipatèni ing kono. ₁₇Imam Yoyada terus nggawé perjanjian ing antarané GUSTI lan ratu lan rayat, ya kuwi yèn kabèh pada dadi umaté GUSTI; uga antarané ratu lan rayat. ₁₈Sakwisé mengkono rayat ing negara pada mlebu ing omahé Baal kabèh, terus dibubrah. Mesbèh-mesbèhé lan retya-retyané pada diremuki; Matan, imamé Baal dipatèni ing ngarepé mesbèh-mesbèhé mau. Imam Yoyada terus ngangkati wong sing pada njaga marang griyané GUSTI. ₁₉Sakwisé mengkono dèkné terus ngajak para penggedéné suradadu 100, para wong Kari lan suradadu penjaga lan rayat ing negara kabèh, diajak ngetutké ratu sangka Omahé GUSTI, terus pada mlebu ing kraton ngliwati gapura para suradadu. Ratu terus njagong ing dampar kraton. ₂₀Rayat ing negara pada bungah-bungah kabèh, kuta ing kono kahanané terus tentrem, bareng Atalya wis dipatèni karo pedang ing kraton.

₂₁Waktu dadi ratu Yoas umuré pitung taun.