2 Samuèl 23

₈Iki jenengé para penggedéné suradadu abdiné Daved: Isyabaal, wong Hakmoni, komendané telung klompok: kuwi mbabitaké tumbaké nglawan wong 800, sing mati kejojoh ing peperangan. ₉Terus Elasar anaké Dodo anaké wong Ahohi; kuwi kepitung penggedéné suradadu telu mau. Iki sing ngetutké Daved, waktu nantang wong Filistèn, sing pada nglumpuk ing kana arep perang, nanging para wong Israèl wis pada mundur. ₁₀Nanging Elasar tandang lan matèni wong Filistèn okèh banget, nganti keju tangané lan èpèk-èpèké kelèt ing pedangé. Ing dina kuwi GUSTI ngekèki kemenangan gedé. Rayat pada bali nututi dèkné, mung arep ngrayahi barang-barang. ₁₁Terus: Sama, anaké Agé, wong Harari. Waktu suradadu Filistèn nglumpuk ing Lekhi - ing kana ana kebon sak kedok kebak katyang tolo - lan suradaduné wis pada mblayu sangka ngarepé wong Filistèn. ₁₂Sama kuwi ngadek ing sak tengahé kebon mau bisa perang lan nggempur wong Filistèn nganti kalah. Mengkono enggoné GUSTI ngekèki kemenangan gedé.

₁₃Sakwijiné dina ana wong telu sangka tunggalé penggedéné telung puluh sing pada nemoni ing ngarepé Daved, ngarepké mangsa panèn ing sak tyedaké guwa Adulam, nanging suradadu-suradaduné wong Filistèn ana sak kumpulan sing pasang tarup ing legokan Réfaim. ₁₄Waktu semono Daved ing pager watu ing pegunungan lan suradadu jagané Filistèn ing kuta Bètléhèm. ₁₅Daved nduwé kepénginan lan ngomong: “Mbok ana wong ngekèki banyu ngombé marang aku sangka sumur ing Bètléhèm sak tyedaké gapura.” ₁₆Suradadu telu kuwi terus nerjang grombolané wong Filistèn, terus nimba banyu sangka sumur ing Bètléhèm ing sak tyedaké gapura, terus digawa lan dipasrahké marang Daved. Daved ora gelem ngombé, nanging dipasrahké kanggo kurban ombènan marang GUSTI, ₁₇tembungé: “Kula muga edohna sangka nandangi mengkéné duh GUSTI. Kuwi apa ora getihé wong-wong sing pada lunga nanggungké nyawané?” Lan ratu ora gelem ngombé. Mengkono sing dilakoni penggedéné suradadu telu kuwi.

₁₈Abisai, adiké Yoab anaké Seruya, kuwi komendané wong telung puluh. Ya Abisai kuwi sing mbabitaké tumbaké nglawan mungsuh wong 300, sing mati ditumbak. Dadiné wong kuwi olèh jeneng ing antarané wong telung puluh mau. ₁₉Apa ora Abisai sing kajèn déwé ing antarané wong telung puluh kuwi? Pantyèn kuwi dadi komendané, nanging durung madani komendan telung klompok kuwi.

₂₀Terus Benaya anaké Yoyada anaké wong gagah lan rosa lan gedé pelabuhané, sing asal-usulé sangka Kabseel, wong kuwi matèni suradadu gedé loro sangka Moab. Benaya ya tau nyemplung ing luweng lan matèni singa, waktu tibané udan salju. ₂₁Kuwi uga matèni sakwijiné wong Egipte, sing gedé duwur dedekké; wong Egipte kuwi nggawa tumbak, nanging dipapak mung karo nggawa pentung, tumbaké wong Egipte mau, direbut, wongé dipatèni nganggo tumbaké déwé. ₂₂Kuwi sing ditindakké Benaya anaké Yoyada, mulané kesuwur ing antarané suradadu telung puluh kuwi. ₂₃Ing antarané wong telung puluh mau, dèkné sing ajèni déwé; nanging ora bisa madani komendan telung klompok mau. Lan Daved ngangkat Benaya dadi komendané suradadu tukang jaga.

₂₄Asaèl, adiké Yoab, kuwi tunggalé penggedéné suradadu telung puluh mau. Terus Elhanam anaké Dodo, wong Bètléhèm; ₂₅Sama, wong Harod; Elika, wong Harod; ₂₆Heles, wong Palti; Ira anaké Ikesy, wong Tékoa; ₂₇Abièser, wong Anatot; Mebunai, wong Husa; ₂₈Salmon, wong Ahohi; Maharai, wong Netofa; ₂₉Heleb anaké Baana, wong Netofa; Itai anaké Ribai, sangka Gibéa, wong Bényamin; ₃₀Benaya, wong Piraton; Hidai sangka legokan Gaas; ₃₁Abialbon, wong Bèt-Araba; Asmawèt, wong Bahurim; ₃₂Elyakbah, wong Saalbon; Yasyen, wong Guni; ₃₃Yonatan anaké Sama, wong Harari; Ahiam anaké Sarar, wong Harari; ₃₄Elifèlèt, anaké Ahasbai wong Maaka; Eliam, anaké Akitopèl, wong Gilo; ₃₅Hesrai, wong Karmèl; Paerai, wong Arba; ₃₆Yigal anaké Natan, sangka Soba; Turunané wong Gad; ₃₇Sèlek, wong Amon; Naharai, wong Beerot, tukang nggawa gamané Yoab, anaké Seruya; ₃₈Ira, wong Yetri; Gareb, wong Yetri; ₃₉Uria, wong Hèt, kabèh gunggungé ana wong telung puluh pitu.