Pangentasan 6

₁Sak terusé Gusti Allah ngetokké tembung marang Moses mengkéné: “Aku iki GUSTI. ₂Aku wis ngétok marang Abraham, Isak lan Yakub, dadi Gusti Allah sing Mahakwasa, nanging karo asma-Ku GUSTI durung Tak kétokké. ₃Uga Aku apa ora wis nggawé perjanjian karo leluhurmu kuwi, yèn bakal Tak wènèhi negara Kanaan, negara panggonané mantya, ₄nanging Aku wis krungu uga bab wong-wong Israèl enggoné ditindes karo wong Egipte, lan Aku éling marang perjanjian-Ku. ₅Awit kuwi kowé ngomonga marang wong Israèl: Aku iki GUSTI, Aku bakal ngluwari kowé sangka penggawéan peksané wong Egipte, lan nylametaké kowé sangka enggonmu didadèkké batur lan ngentasaké kowé karo tangan sing Tak etungaké, uga karo paukuman-paukuman sing abot. ₆Kowé bakal Tak jikuk dadi umat-Ku lan Aku bakal dadi Gusti Allahmu, supaya kowé pada weruh, yèn Aku iki GUSTI, Gusti Allahmu, sing ngutyulké kowé sangka penggawéan peksané wong Egipte. ₇Uga kowé bakal Tak tuntun menyang negara sing wis Tak janjèkké karo sumpah, yèn bakal Tak wènèhké marang Abraham, Isak lan Yakub, lan kuwi bakal Tak wènèhké marang kowé dadi duwèkmu; Aku iki GUSTI!”

₈Moses terus ngomongké tembung mengkono mau marang wong Israèl, nanging pada ora ngrungokké marang tembungé Moses, awit wis pada semplak jalaran sangka penggawéan peksa sing banget aboté kuwi.

₉GUSTI terus ngetokké tembung marang Moses: ₁₀“Kowé ngadepa lan ngomonga marang Parao, ratu ing Egipte, supaya nglilani wong Israèl metu sangka negarané.” ₁₁Nanging tembungé Moses ing ngarepé GUSTI: “Lah wong Israèl déwé ora gelem ngrungokké marang kula, Parao menèh kepriyé gelem ngrungokké kula, kula iki wong sing kaku ilaté.” ₁₂Mengkono kuwi GUSTI ngongkon marang Moses lan Harun, supaya nemoni wong Israèl lan nemoni Parao, ratu ing Egipte, karo préntah supaya wong Israèl kuwi pada dituntun metu sangka Egipte.

₁₃Iki para turunané kulawargané. Anak-anaké Rubèn, mbarepé Israèl: Hénokh, Palu, Hèsron lan Karmi; ya kuwi turunané Rubèn. ₁₄Anak-anaké Siméon: Yemuèl, Yakin. Ohad, Yakin, Sohar lan Saul, anaké wadon bangsa Kanaan, kuwi turunané Siméon. ₁₅Anak-anaké Lévi, manut urutané lairé: Gèrson, Kéhat lan Mérari. Lévi umuré 137 taun. ₁₆Anak-anaké Gèrson: Libna lan Simèi, manut turunané. ₁₇Anak-anaké Kéhat: Amram, Yizhar, Hébron lan Usièl. Umuré Kéhat 133 taun. ₁₈Anak-anaké Mérari: Makli lan Musi. Ya kuwi turunané Lévi manut urutané.

₁₉Amram omah-omah karo Yokebèd, adiké bapaké, kuwi nglairké Harun lan Moses. Umuré Amram nyandak 137 taun. ₂₀Anak-anaké Yizhar: Korah, Nefek lan Sikhri. ₂₁Anak-anaké Usièl: Misaèl, Elsafan lan Sitri. ₂₂Harun omah-omah karo Eliseba, anaké Aminadab, seduluré Nahason, kuwi nglairké: Nadab, Abihu, Eléazar lan Itamar. ₂₃Anak-anaké Korah: Asir, Elkana lan Abiasaf, kuwi turunané wong Korah. ₂₄Eléazar anaké Harun, njupuk bojo salah sijiné anaké Putièl, sing terus nglairké: Pinéhas. Ya kuwi para turunané kulawargané wong Lévi manut turunané.

₂₅Ya Harun lan Moses kuwi sing pada dikongkon karo GUSTI: “Wong Israèl kuwi pada tuntunen metu sangka negara Egipte manut golongané.” ₂₆Ya kuwi sing pada ngomong marang Parao ratu ing Egipte, bab nuntun wong Israèl metu sangka negara Egipte. Ya Moses lan Harun kuwi.

₂₇Nalika GUSTI ngetokké tembung marang Moses ing negara Egipte, ₂₈tembungé GUSTI marang Moses mengkéné: “Aku iki GUSTI; kowé ngomonga marang Parao, ratu ing Egipte, bab kabèh sing Tak omongké marang kowé.” ₂₉Nanging Moses ngomong ing ngarepé GUSTI: “Kula iki wis ora bisa ngomong, kepriyé Parao enggoné bakal ngrungokké tembung kula?”