Yéhèskièl 8

₁Ing taun sing kaping enem, tanggal lima sasi enem, waktu aku ijik lungguh ing omahku, adep-adepan karo para pemimpiné Yéhuda, aku terus dikwasani karo pangwasané GUSTI. ₂Aku terus nampa wahyu: ana sing kétok rupané kaya sakwijiné wong lanang, wiwit bangkèkan tekan ngisor rupané kaya geni, sangka bangkèkané menduwur kétok semlorot, meling kaya tembaga. ₃Kuwi terus ngelungké sing kaya tangan, rambutku dityekel. Aku terus dijunjung karo Roh kuwi ing antarané langit lan bumi ing sak njeruhné kaweruhé Gusti Allah aku digawa menyang Yérusalèm, sak tyedaké gapurané plataran ing njeruh sing madep ngalor, sing ana retyané brahala, sing nukulké jalusu. ₄Ing kono kétok kamulyané Gusti Allahé Israèl, kaya wahyu sing tak deleng ing legokan. ₅Aku terus diomongi mengkéné: “Hé, anaké manungsa, ngewasna ngalor?” Aku terus ngewaské ngalor ing sak loré gapurané mesbèh, sak tyedaké dalan mlebu, ana retya sing nukulké jalusu mau. ₆Aku terus diomongi mengkéné: “Hé, anaké manungsa, apa kowé ndeleng apa sing pada ditindakké, ya kuwi penggawéan-penggawéan sing ala banget, sing digawé karo turunané Israèl ing kéné, terus Aku kepeksa ngedohi panggonan omah sutyi-Ku? Kowé ijik bakal weruh penggawé sing ala sing ngungkuli kuwi.”

₇Aku terus digawa menyang lawangé plataran; aku weruh ing témboké ana bolongané. ₈Tembungé marang aku mengkéné: “Hé, anaké manungsa, bolongan ing témbok kuwi ambakna!” Bareng bolongan kuwi wis tak ambakké, ing kono ana lawangé. ₉Aku terus diomongi: “Kowé mlebua lan delengen penggawéan-penggawéan sing njijiki lan sing ala, sing pada ditindakké ing kéné!” ₁₀Aku terus mlebu lan weruh ana gambaré sak kabèhé kéwan nggremet lan kéwan-kéwan liyané sing ngregeti lan kabèh brahalané turunané Israèl sing ukiran ing témbok ing sak ubengé. ₁₁Ing ngarepé kétok ana pemimpiné turunané Israèl pitung puluh sing pada ngadek, Yaasanya, anaké Safan ing sak tengahé wong-wong mau, kabèh pada nyekel bokor pedupan; kemebulé dupa sing apik kemebul. ₁₂Aku terus diomongi mengkéné: “Hé, anaké manungsa, apa kowé wis weruh apa sing ditindakké karo para pemimpiné turunané Israèl ing pepeteng ing sak njeruhné kamaré déwé-déwé sing ana gambaré ukir-ukiran? Awit pada ngomong mengkéné: GUSTI ora weruh kita; GUSTI wis ninggalké negara kéné.” ₁₃Tembungé menèh mengkéné: “Kowé bakal weruh penggawé ala sing ngungkuli gedéné menèh, sing pada digawé.”

₁₄Aku terus digawa menyang sak tyedaké lawang gapurané griyané GUSTI ing sisih lor, ing kono ana wong wadon sing pada nangisi déwa Tamus. ₁₅Aku terus diomongi mengkéné: “Hé, anaké manungsa, apa kowé wis weruh sing pada ditindakké? Kowé ijik bakal weruh penggawéan-penggawéan sing njijiki banget ngungkuli iki.”

₁₆Sakwisé mengkono aku terus digawa menyang platarané njeruh griyané GUSTI; ing sak tyedaké dalan mlebu ing omahé GUSTI, ing antarané griyané sutyi lan mesbèh ana wong lanang kira-kira selawé sing pada ninggal griyané GUSTI, lan pada madep mengétan karo sujut marang srengéngé ing sisih wétan. ₁₇Aku terus diomongi: “Apa kowé wis weruh kuwi, hé, anaké manungsa? Apa iki perkara ora kajèn, penggawéan-penggawéan ala sing digawé karo turunané Yéhuda ing kéné iki? Nanging negara iki malah terus dikebaki karo penggawé ala lan awit sangka mengkono terus waé enggoné nggawé nesuné ati-Ku. ₁₈Mulané bakal Tak wales karo bebendu-Ku. Aku ora bakal rumangsa éman lan ora bakal nindakké kawelasan lan senajan pada sambat marang Aku karo banter, ora bakal Tak rungokké.”