Ezra 6

₁Sakwisé mengkono Darius terus ngongkon mriksa ing gedong simpenan banda ing Babèl, panggonan simpenané tyatetan-tyatetan. ₂Banjur ing Ahmeta, pager watu ing propinsi Média, ketemu ana gulungan sing isiné mengkéné:

₃“Ing taun kaping pisan jamané Korèsy, Korèsy mréntahké préntah mengkéné: Bab griyané Gusti Allah ing Yérusalèm. Omah kuwi bangunen menèh kanggo panggonané wong masrahaké kurban sing dibelèh lan kurban bakaran, duwuré gedong suwidak éluh lan ambané suwidak éluh. ₄Lan kudu dipasangi watu gedé-gedé telung larik lan kayu selarik. Nanging ragaté kuwi dijukuk sangka gedong simpenané bandané kraton. ₅Uga piranti emas lan slaka sing sangka griyané Gusti Allah, sing pada dijaluk karo Nebukadnésar sangka omahé Gusti ing Yérusalèm lan terus digawa menyang Babèl, kuwi pada balèkna, supaya pada balia menèh menyang ing panggonané sing lawas, pada kok sèlèhna ing omahé Gusti Allah.”

₆“Kanggo kuwi kowé Tatnai, bupati ing bawah sabrangé kali Efrat, lan Syetar-Bosnai, uga kantya-kantyamu, para penggedé bawah sabrangé kali Efrat, pada ngedohana sangka kana. ₇Pegawéan mbangun griyané Gusti Allah kuwi jarké waé; gubernur wong Ju lan para pinituwané wong Ju bèn pada mbangun griyané Gusti Allah kuwi ing panggonané sing lawas. ₈Uga préntahku kanggo sing perlu kok tindakké marang pinituwané wong Ju kanggo pembangunané griyané Gusti Allah kuwi mengkéné: Sangka pametuné kraton, sangka pajek ing bawah sabrangé kali Efrat kuwi urusen karo tliti lan aja diulur-ulur wènèhna marang wong-wong kuwi. ₉Lan apa sing dibutuhaké, kayata sapi lanang nom, wedus gèmbèl lanang, tyempé kanggo kurban obongan ngadep marang Gusti Allahé swarga, mengkono uga gandum, uyah, anggur lan lenga, miturut pituduhé para imam ing Yérusalèm, kabèh kuwi kudu diwènèhké saben dina, aja nganti lali, ₁₀supaya pada bisa masrahaké kurban sing nggawé senengé atiné Gusti Allahé swarga lan ndedonga kanggo ratu uga para anaké. ₁₁Sak terusé aku ngumumaké préntah: Sapa sing nerak putusan iki, tyagaké omahé dijebol siji digawé nyunduki wong kuwi ing putyuké, uga omahé didadèkké ambruk awit sangka sing mengkono kuwi. ₁₂Nanging Gusti Allah sing wis ngarepké asmané manggon ing kono kuwi, supaya ngembrukné saben ratu lan saben bangsa sing ngelungké tangané arep nerak putusan iki, lan ngrusak griyané Gusti Allah ing Yérusalèm kuwi. Aku Darius, sing ngumumaké préntah iki. Kudu digatèkké tenan.”

₁₃Tatnai, bupati ing sabrangé kulon kali Efrat, Syetar-Bosnai lan sak kantyané terus ya pada nglakoni karo ati-ati miturut préntahé Darius. ₁₄Para pinituwané wong Ju pada nerusaké enggoné mbangun karo lantyar, disurung karo nubuaté Hagai lan Sakaria anaké Ido; kuwi ya nganti rampung miturut préntahé Gusti Allahé Israèl lan préntahé Korèsy lan Darius, uga Artahsasta, ratu ing negara Pèrsia. ₁₅Rampungé omah kuwi waktu tanggal kaping telu sasi Adar, ya kuwi ing taun sing kaping enem jaman pepréntahané Darius.

₁₆Wong Israèl, para imam lan para wong Lèwi lan wong liyané sing pada bali sangka pembuwangan, terus pada ngramèkaké enggoné ngresmèkké griyané Gusti Allah kuwi karo bungah-bungah. ₁₇Enggoné ngresmèkké griyané Gusti Allah mau nganggo masrahaké kurban rupa sapi lanang 100, wedus gèmbèl lanang 200 lan tyempé wedus gèmbèl 400, lan kanggo kurban ngluwari dosa kanggo wong sak bangsa Israèl kabèh rupa wedus lanang rolas, miturut tyatyahé taler Israèl. ₁₈Kejaba kuwi uga mernahké para imam ing golongané déwé-déwé lan para wong Lèwi ing panggonané déwé-déwé, gegandèngan karo enggoné pada nglakoni pangabekti marang Gusti Allah sing manggon ing Yérusalèm, tyotyok sing ketulis ing kitabé Moses.

₁₉Lan ing tanggal patbelas sasi kaping pisan wong sing pada bali sangka pemboyongan pada ngriyayakké Paskah. ₂₀Awit para imam lan para wong Lèwi kuwi pada nyutyèkké uripé bebarengan, mulané kabèh pada dadi sutyi. Terus pada mbelèh tyempéné Paskah kanggo kabèh wong sing pada bali sangka pembuwangan lan kanggo sedulur-seduluré, ya kuwi para imam, lan kanggo awaké déwé. ₂₁Nanging sing pada mangan ya kuwi wong Israèl sing pada mulih sangka pembuwangan lan uga saben wong sing misahké uripé sangka sing najis; para bangsa sing manggon ing kono lan terus dadi siji karo wong Israèl terus ngabekti marang GUSTI, Gusti Allahé Israèl. ₂₂Wong mau uga pada ngramèkaké Riyaya Roti tanpa ragi, suwéné pitung dina karo bungah-bungah, awit GUSTI wis nggawé bungahé; Panjenengané wis mbukakké atiné ratu ing negara Asyur marang wong-wong mau, nganti ratu terus ngekèki bantuan ing bab enggoné nggarap griyané Gusti Allah, ya kuwi Gusti Allahé Israèl.