Ezra 8

₁Iki daftaré para penggedéné kulawargané lan tyedak turunané sing pada bebarengan budal karo aku sangka negara Babèl, waktu jaman pepréntahané Artahsasta.

₂Turunané Pinéhas: Gérsom; sangka turunané Itamar: Danièl; sangka turunané Daved: Hatus; ₃anaké Sekanya; sangka turunané Paros: Sakaria, lan kantyané wong lanang sing pada ketulis ing kitab turunané wong 150; ₄sangka turunané pahat-Moab: Elyoenai anaké Serahya, lan kantyané wong lanang 200; ₅sangka turunané Satu: Sekanya, anaké Yahasiel, lan kantyané wong lanang 300; ₆sangka turunané Adin: Ebed, anaké Yonatan lan kantyané wong lanang sèket; ₇sangka turunané Elam: Yésaya, anaké Atalya, lan kantyané wong lanang pitung puluh; ₈sangka turunané Sefatya: Sebaja, anaké Mikaèl lan kantyané wong lanang wolung puluh; ₉sangka turunané Yoab: Obaja, anaké Yehièl lan kantyané wong lanang 218; ₁₀sangka turunané Bani: Selomit, anaké Yosifya lan kantyané wong lanang 160; ₁₁sangka turunané Babai: Sakaria, anaké Babai lan kantyané wong lanang wolulikur; ₁₂lan sangka turunané Asgad: Yohanan, anaké Hakatan lan kantyané wong lanang 110 sepuluh; ₁₃sangka turunané Adonikam, sing lairé kèri ya kuwi sing jenengé: Elifèlèt, Yehièl, lan Semaya, karo kantyané wong lanang suwidak; ₁₄uga sangka turunané Bigwai, Utai lan Sabud, karo kantyané wong lanang pitung puluh.

₁₅Wong mau pada tak klumpukké ing pinggiré kali sing mili tekan ing Ahawa, aku terus pada manggon ing kono telung dina. Bareng dipréksa, ketemu ana wong Israèl lumrah lan imam-imam, nanging ora ana wong-wongé turunané Lèwi. ₁₆Mulané aku terus kongkonan Elièser, Arièl, Semaya, Elnatan, Yarib, Elnatan, Natan, Sakaria, lan Mesulam, kabèh kuwi penggedéné, uga Yoyarib lan Elnatan, kuwi guru-guru, ₁₇kuwi pada tak weling supaya nemoni Ido, penggedéné bawah ing kuta Kasifya. Tutuké pada tak isèni tembung tumuju marang Ido lan para seduluré, para abdi ing griyané Gusti Allah ing kuta Kasifya kono supaya nggolèki wong sing pada nglakoni penggawéan ing griyané Gusti Allah kita. ₁₈Awit tangané Gusti Allah sing kebak kabetyikan ngayomi kita, terus pada dikirimi wong sing pinter-pinter sangka turunané Mahli, anaké Lèwi, anaké Israèl, ya kuwi Sèrèbya lan anak-anaké lan sedulur-seduluré, kabèhé wong wolulas, ₁₉uga Hasabia lan Yésaya sangka turunané Mérari, karo para seduluré lan anak-anaké, kabèhé wong rong puluh; ₂₀lan menèh tunggalé para abdi ing griyané Gusti Allah, sing wis pada dikèkké karo Daved lan para penggedéné sing pada ditetepaké ngladèni marang wong-wong Lèwi, tyatyahé 220 wong, kabèh pada ketulis jenengé.

₂₁Aku terus mréntahké pasa ing pinggiré kali Ahawa kono, bèn aku pada ngasorké urip ing ngarepé Gusti Allah kita lan njaluk keslametané mlakuku marang Panjenengané kanggo kita kabèh, anak-anakku uga kanggo sembarang duwèkku kabèh. ₂₂Awit aku isin yèn njaluk suradadu lan suradadu jaran marang ratu sing njaga marang kita kabèh lan sing ngadepi mungsuh ing dalan, mulané mengkono awit aku wis pada ngomong marang ratu: “Tangan-Né Gusti Allah kula kuwi ngayomi marang kabèh wong sing nggolèki Panjenengané, kanggo keslametané, nanging kabèh wong sing nyingkur Panjenengané kuwi pada ditibani karo pangwasa lan bebenduné.” ₂₃Dadiné aku terus pada pasa lan pada masrahaké bab kuwi marang Gusti Allah lan Gusti Allah uga nuruti penjalukku.

₂₄Aku terus milih pengarepé imam rolas, ya kuwi: Sèrèbya lan Hasabia karo para seduluré wong sepuluh. ₂₅Aku terus nimbangké slaka lan emas uga piranti-piranti, ya kuwi pisungsung-pisungsung kanggo omahé Gusti Allah kita, ya kuwi pisungsungé ratu, para jururembuké lan para penggedéné uga sak kabèhé para wong Israèl ing kana. ₂₆Aku uga nimbang terus lan tak pasrahké ing tangané: slaka 650 talénta, lan piranti slaka aji 100 talénta, emas 100 talénta, ₂₇tuwung emas rong puluh sing aji 1000 dirham, uga piranti tembaga murni sing meling lan apik kaya emas rong iji. ₂₈Lan aku terus ngomong marang wong-wong mau: “Kowé kuwi pada wong sutyi pasraha marang GUSTI lan piranti-piranti iki uga pada dadi sutyi, lan slaka lan emas iki dadi pisungsung kebungahan ngadep marang GUSTI, Gusti Allahé para leluhurmu; ₂₉kuwi rumaten lan jaganen, nganti tekan waktuné ditimbang, ing ngarepé para pengarepé imam lan para wong Lèwi lan para penggedéné brayaté wong Israèl ing Yérusalèm, ing gedong-gedong omahé GUSTI.” ₃₀Para imam lan para wong Lèwi kuwi terus pada nampani slaka lan emas lan piranti-piranti sing wis ditimbang kuwi, bakal digawa menyang ing Yérusalèm, menyang ing omahé Gusti Allah kita.

₃₁Sakwisé mengkono aku terus pada budal sangka pinggiré kali Ahawa menyang Yérusalèm, ya kuwi waktu sasi kaping pisan tanggal kaping rolas, nuju Yérusalèm, lan tangané Gusti Allah kita ngayomi marang kita, lan ngedohké kita sangka tangané mungsuhé lan bégalan. ₃₂Terus mlakuku wis tekan ing Yérusalèm, aku terus lèrèn telung dina. ₃₃Ing dina kaping papat slaka lan emas lan piranti-piranti mau terus pada ditimbangi ing griyané Gusti Allah kita diseksèni karo imam Merémot anaké Uria, karo diamping-ampingi imam Eléazar anaké Pinéhas lan dibantu karo wong Lèwi, ya kuwi Yosabad anaké Yésua lan Noaja, anaké Binui. ₃₄Kabèh mau pada diitung lan ditimbang menèh lan gunggungé boboté dityateti.

₃₅Ing waktu kuwi uga wong sing wis pada bali sangka tawanan, ya kuwi sing wis pada bali sangka pembuwangan mau terus pada masrahaké kurban obongan marang Gusti Allahé Israèl rupa sapi lanang rolas kanggo wong Israèl sak bangsa kabèh, wedus gèmbèl lanang sangang puluh enem, tyempé wedus gèmbèl pitung puluh pitu, lan wedus lanang rolas kanggo kurban ngluwari dosa, kabèh pada kanggo kurban obongan dipasrahké marang GUSTI. ₃₆Uga pada masrahaké layang préntahé ratu marang para wakilé ratu lan para bupati ing bawah sabrangé kulon kali Efrat, lan para penggedé mau pada ngekèki sumbangan marang bangsa kita lan marang omahé Gusti Allah.