Yésaya 36

₁Ing taun sing kaping patbelas ing jamané Hiskia, Sanherib, ratu ing negara Asyur teka lan nyerang kuta-kutané bèntèng negara Yéhuda, terus pada direbut. ₂Ratu ing Asyur mau terus ngutus penggedé tukang ombèn sangka Lakis menyang Yérusalèm nemoni Hiskia dibarengi suradadu okèh. Wongé kuwi terus mandek ing sak tyedaké ilèn-ilèné blumbang nduwur ing dalan gedé ing ara-ara Tukang Penatu. ₃Ing kono Elyakim, penggedéné kraton, Sebna, juru tulis negara lan Yoah, anaké Asaf, sing nata bandané negara, pada metu nemoni juru ombèn. ₄Penggedéné juru ombèn terus ngomong: “Sampéyan pada kula njaluk ngomong marang Hiskia: Mengkéné tembungé ratu gedé, ratu ing Asyur: Pertyaya apa ta sing kok gondèli iki? ₅Pangiramu mung tembung lambé waé wis bisa dadi rantyamané lan kekuwatané perang! Saiki, kowé nglawan marang aku kuwi, sapa sing kok jagak-jagakké? ₆Sing kok jagak-jagakké kuwi sejatiné teken pring sing wis tugel ndingkluk, ya kuwi Egipte sing bakal nyubles lan mbolong tangané wong sing tekenan kuwi. Kaya mengkono kuwi kahanané Parao, ratu ing Egipte, kanggo kabèh wong sing ngendelké dèwèké. ₇Lan yèn kowé ngomong marang aku: Sing pada kula endelaké kuwi GUSTI, Gusti Allah kula, apa Panjenengané kuwi duduk sing puntuk-puntuké pangurbanan lan mesbèh-mesbèhé sing wis disingkréhké karo Hiskia karo ngomong marang Yéhuda lan Yérusalèm: Kowé kabèh kudu sujut lan nyembah ing ngarepé mesbèh iki! ₈Mulané saiki hayuk pada adu karo ratu kula, ratu ing Asyur: Kula bakal ngekèki sampéyan jaran 2000, yèn sampéyan saguh ngekèki wong-wong sing numpaki.

₉Kepriyé enggèn sampéyan bisa ngalahké penggedéné ratu kula, sing endèk déwé? Nanging sampéyan ngendelké Egipte ing bab kréta lan prajurité! ₁₀Saiki, apa enggèn kula maju nglawan negara iki lan enggèn kula bakal ngentèkké negara iki, kuwi apa ora awit sangka karepé GUSTI? GUSTI wis ngomong marang kula: Budala, serangen negara kuwi lan entèkna!”

₁₁Elyakim, Sebna lan Yoah terus nyauri marang penggedéné juru ombèn kuwi mengkéné: “Hayuk kita njaluk ngomong nganggo basa Aram marang abdimu iki, awit kita pada ngerti; nanging aja ngomong marang kita nganggo basa Yéhuda, mengko dirungokké karo rayat ing sak nduwuré témbok.” ₁₂Nanging penggedéné juru ombèn ngomong: “Apa ratu kula anggèné ngutus kula ngabaraké tembungé iki mung marang ratu sampéyan lan marang sampéyan waé? Apa ora ya marang para wong sing pada lungguh ing nduwur témbok uga, sing pada mangan tainé lan ngombé uyuhé déwé bareng karo sampéyan kabèh kuwi?” ₁₃Sakwisé mengkono penggedéné juru ombèn mau terus ngadek lan mbengok karo swara banter nganggo basa Yéhuda, tembungé: “Pada rungokna tembungé: Pada rungokna tembungé ratu sing gedé, ratu ing negara Asyur! ₁₄Mengkéné tembungé ratu: Kowé pada kena diapusi karo Hiskia, awit kuwi ora bisa ngluwari kowé kabèh. ₁₅Aja pada gelem diajak Hiskia pertyaya GUSTI karo tembungé: GUSTI mesti bakal ngluwari kita: kuta iki ora bakal dipasrahké ing tangané ratu ing Asyur. ₁₆Aja pada ngrungokké tembungé Hiskia, awit mengkéné tembungé ratuné Asyur: Pada nganakna perjanjian karo aku kanggo tanda teluk lan pada metua tekaa ing ngarepku, terus saben wong sak panunggalmu bakal mangan wohé wité anggur lan wohé wité anjir déwé lan ngombé banyuné sumuré déwé, ₁₇nganti tekaku mboyongi kowé kabèh menyang negara sing kaya negaramu, negara sing murah gandum lan anggur, negara sing sugih roti lan kebon anggur. ₁₈Kowé aja pada nganti kena diapusi karo Hiskia karo tembungé: GUSTI bakal ngluwari kita! Apa tau kelakon para allahé bangsa-bangsa pada ngluwari negarané déwé-déwé sangka tangané ratuné Asyur? ₁₉Endi allah-allahé negara Hamat lan Arpad? Endi para allahé negara Sefarwaim? Apa wis pada nylametaké Samaria sangka tanganku? ₂₀Tunggalé para allahé negara-negara iki sapa sing wis ngluwari negarané sangka tanganku, lah kok GUSTI saguh ngluwari Yérusalèm sangka tanganku?” ₂₁Nanging kabèh pada meneng waé, ora nyauri senajan mung sak ketyap waé, awit préntahé ratu: “Kowé aja pada nyauri marang dèwèké!” ₂₂Elyakim, anaké Hilkia, penggedéné kraton lan Sebna, juru tulis negara lan Yoah, anaké Asaf, sing tukang nata bandané negara terus pada mundur karo nganggo sandangané sing suwèk lan pada nemoni Hiskia, terus ngekèki ngerti bab apa sing diomongké karo penggedéné juru ombèn.