Yésaya 43

₁Nanging saiki mengkéné tembungé GUSTI

sing nitahké kowé, hé Yakub,

sing mbangun kowé, hé Israèl:

“Kowé aja wedi, awit Aku wis nebus kowé,

Aku wis nyeluk kowé karo nyebut jenengmu,

kowé iki duwèk-Ku.

₂Yèn kowé nyabrang ing banyu,

Aku bakal nuntun kowé,

utawa ngliwati kali-kali, kowé ora bakal kèli;

yèn kowé mlaku liwat ing geni, kowé ora bakal gosong,

lan urupé geni ora bakal ngobong kowé.

₃Awit Aku iki GUSTI, Gusti Allahmu,

Sing Mahasutyi, Gusti Allahé Israèl, Juruslametmu.

Egipte Tak kanggokké nebus kowé,

lan Etiopia lan Syéba Tak wènèhké kanggo gantimu.

₄Awit kowé kuwi aji ing mripat-Ku

lan mulya lan Aku trésna marang kowé,

mulané Aku ngekèkké manungsa kanggo gantimu,

lan bangsa-bangsa kanggo gantiné nyawamu.

₅Kowé aja wedi, awit Aku sing nuntun kowé,

Aku bakal nekakké anak-putumu sangka wétan,

lan Aku bakal nglumpukké kowé sangka kulon.

₆Aku bakal ngomong marang lor: ‘Wènèhna!’

lan marang kidul: ‘Aja mbok gondèli!’

Para anak-Ku lanang pada gawanen sangka adoh,

lan para anak-Ku wadon sangka pojok-pojokané bumi,

₇ya kuwi kabèh wong sing jenengé nganggo asma-Ku,

sing Tak gawé kanggo kamulyan-Ku,

sing Tak bangun lan sing uga Tak dadèkké!”

₈Bèn wong nggawa bangsa sing lamur senajan ana mripaté,

sing budek senajan nduwé kuping!

₉Bèn pada nglumpuk bebarengan kabèh bangsa kuwi,

lan bèn pada nglumpuk kabèh taleré bangsa kuwi!

Tunggalé kuwi sapa sing bisa ngekèki kabar bab iki,

sing bisa ngomongké marang kita bab sing kelakon dèk mbiyèn?

Bèn pada nggawa seksi-seksiné, supaya nyata yèn ora salah;

wong bèn krungu lan terus ngomong:

“Bener mengkono!”

₁₀“Kowé iki pada dadi seksi-Ku,”

mengkono tembungé GUSTI,

“lan abdi-Ku sing wis Tak pilih,

supaya kowé pada weruh lan pertyaya marang Aku

lan ngerti, yèn Aku iki tetep Panjenengané.

Sak durungé Aku ora ana Gusti Allah sing ana,

lan sakwisé Aku bakal ora ana liyané menèh.

₁₁Aku, ya Aku iki GUSTI

lan ora ana Juruslamet kejaba Aku.

₁₂Aku iki sing ngekèki weruh, sing ngekèki keslametan lan kabar,

lan duduk allah mantya ing tengahmu.

Kowé kuwi pada dadi seksi-Ku,”

mengkono tembungé GUSTI,

“lan Aku iki Gusti Allah.

₁₃Uga sak terusé Aku iki tetep Panjenengané,

lan ora ana sing bisa luwar sangka tangan-Ku;

Aku sing nindakké, sapa sing bisa ngendek?”

₁₄Mengkéné tembungé GUSTI,

Juru Penebusmu, sing Mahasutyi,

Gusti Allahé Israèl:

“Awit sangka kowé Aku gelem kongkonan wong menyang Babèl

lan gelem nyingkirké slorok-sloroké lawangé paukuman kabèh,

lan Aku ngusir wong Kasdim mblayu karo sambat nang kapalé, sing diunggul-unggulké.

₁₅Aku iki GUSTI, sing Mahasutyi,

sing nitahké Israèl, Ratumu.”

₁₆Mengkéné tembungé GUSTI,

sing nggawé dalan ngliwati segara

lan ngliwati banyu sing ngidap-idapi,

₁₇sing wis préntah marang kréta lan jaran supaya pada mèlu perang,

uga para suradadu lan wong rosa-rosa

kuwi pada gemlétak, ora bisa tangi,

wis pada mati, wis mati kaya utyeng-utyeng.

₁₈Mengkéné tembungé: “Aja pada ngéling-éling bab sing wis kepungkur,

lan aja mikir marang bab sing wis kelakon dèk jaman mbiyèn!

₁₉Lah Aku gelem nggawé sing anyar,

sing saiki wis tukul, apa kowé durung weruh?

Malah Aku bakal nggawé dalan ing ara-ara samun

lan kali-kali ing ara-ara.

₂₀Kéwan ing alas bakal ngluhurké Aku,

asu alasan lan manuk unta,

awit Aku wis nggawé banyu sing muntyrat-muntyrat ing ara-ara samun

lan kali sing pada mili ing ara-ara,

kanggo ngombèni umat pilihan-Ku;

₂₁umat sing wis Tak gawé kanggo Aku

kuwi bakal ngabarké kaluhuran-Ku.”

₂₂“Tenan, kowé ora nyebut marang Aku, hé Yakub,

lan kowé ora perduli marang Aku, hé Israèl.

₂₃Kowé ora ngekèki kurban obongan wedus gèmbèl marang Aku,

lan ora ngluhurké Aku karo kurban sing dibelèh.

Aku ora ngebot-eboti kowé karo njupuk kurban panganan,

lan nyusahké kowé karo njupuk menyan.

₂₄Kowé ora njukukké Aku tebu wangi karo duwit,

utawa nggawé warek-Ku karo gajihé kurban sing dibelèh.

Nanging kowé ngebot-eboti Aku karo dosamu,

kowé nggawé susah-Ku karo kesalahanmu.

₂₅Aku, ya Aku kuwi Panjenengané sing ngilangi dosané mbruntakmu awit sangka Aku déwé,

lan Aku ora ngéling-éling marang dosamu.

₂₆Kowé ngélingana Aku, hayuk kita pada nganakké perkara,

ajokna samubarang kabèh supaya nyata enggonmu bener!

₂₇Para leluhurmu sing wiwitan wis dosa,

lan juru rembukmu wis nglawan marang Aku.

₂₈Dadiné Aku kepeksa najisaké para pemimpiné panggonan omah sutyi,

lan kepeksa ngekèkké Yakub supaya dientèkké

lan Israèl supaya dadi tyatyatan.”