Yérémia 2

Aku kèlingan marang katrésnanmu ing waktu nom-nomanmu,

marang katrésnanmu waktu kowé dadi mantèn,

enggonmu ngetutké Aku ing ara-ara samun,

ing negara sing ora ana tetukulané.

₃Ing waktu semono Israèl dadi sutyi kanggo GUSTI,

kanggo woh wiwitan sangka panènané.

Sak kabèhé wong sing mangan mesti kesalahan,

kena karo tyilaka,

mengkono tembungé GUSTI.

₄Hé tyedak turunané Yakub, rungokna tembungé GUSTI,

hé sak kabèhé brayaté tyedak turunané Israèl.

₅Mengkéné tembungé GUSTI:

Para leluhurmu nindakké ora bèrès apa awit sangka Aku

nanging pada ngedohi Aku,

lan terus ngetutké déwa sing tanpa guna

nganti pada ora olèh apa-apa?

₆Lan kok pada ora takon menèh: Ing ngendi GUSTI,

sing nuntun kita metu sangka negara Egipte;

sing nuntun kita ing ara-ara samun,

ing negara sing bongkor lan legak-legok,

ing tanah sing garing lan peteng,

ing tanah sing ora dilakoni wong

lan ora dipanggoni karo manungsa?

₇Kowé wis Tak tuntun menyang negara sing subur,

supaya ngrasaké wohé lan sak pametuné kabèh

sing betyik sangka kono.

Nanging bareng kowé wis mlebu ing tanah-Ku,

kuwi kowé najisaké,

tanah duwèk-Ku kowé ndadèkké rereget.

₈Para imam ora takon menèh:

GUSTI ing ngendi?

Para wong sing nyekel angger-angger wis ora kenal marang Aku menèh,

lan para pangon pada nyingkur Aku.

Para nabi pada nubuat kanggo Baal,

pada ngetutké mburi marang sing tanpa guna.

₉Mulané Aku bakal nganakké perkaran menèh karo kowé kabèh,

lan karo anak putumu Aku bakal nganakké perkaran,

mengkono tembungé GUSTI.

₁₀Nyabranga waé menyang tanah pinggiré segarané wong Kitim lan sawangen;

ngongkona wong menyang Kedar lan gatèkna tenan!

Titènana apa ana sing kelakon kaya mengkéné iki!

₁₁Apa ana bangsa sing ngijoli allahé,

senajan kuwi sak temené duduk allah?

Nanging umat-Ku pada ngijoli Kaluhurané

karo sing ora ana gunané.

₁₂Hé langit, pada nggumuna awit sangka sing kaya mengkono kuwi,

ndredeka lan gemetera sing luwih banget,

mengkono tembungé GUSTI.

₁₃Awit umat-Ku nglakoni dosa kaping pindo:

pada nyingkur Aku,

sing dadi sumberé urip,

arep ngeduk blumbang kanggo awaké déwé,

ya kuwi blumbang sing botyor, sing ora bisa ngadahi banyu.

₁₄Israèl kuwi batur tukon, apa anak-anaké batur?

Kenèng apa kok dadi rampasan?

₁₅Singa nom pada nggeruh marang bangsa kuwi,

karo swara banter,

negarané didadèkké bongkor,

kuta-kutané diobongi, ora dienggoni menèh.

₁₆Uga para wong Mèmfis lan Tapanhes

pada nggunduli batuké sirahmu.

₁₇Apa ora kowé déwé sing njalari kowé katekan

sing kaya mengkono kuwi,

awit kowé nyingkur GUSTI, Gusti Allahmu,

waktu Panjenengané nuntun kowé ing ndalan?

₁₈Lah saiki, apa olèh-olèhmu enggonmu lunga menyang ing Egipte,

apa arep ngombé banyuné kali Nil?

Lan apa batinmu enggonmu lunga menyang ing Asyur,

apa arep ngombé banyuné kali Efrat?

₁₉Penggawé alamu bakal ngrangkèt kowé,

lan awit nyingkur Aku, kuwi bakal nyèksa kowé!

Ngertia lan delengen, sak pira ala lan perihé

kowé nyingkur GUSTI, Gusti Allahmu kuwi;

lan ora gemeter wedi marang Aku,

mengkono tembungé Gusti, GUSTI sing ngwasani langit lan bumi.

₂₀Awit wiwit mbiyèn enggonmu nugeli pasanganmu

lan medoti taliné sing nalèni kowé,

lan omong: Aku emoh dadi batur menèh.

Malah ing saben puntuk-puntuk sing metongol,

lan ing sak ngisoré wit sing ngrembuyung,

kowé turu lan laku bédang.

₂₁Nanging kowé Tak tukulké dadi wit anggur pilihan,

lan dadi wiji sing murni.

Kenèng apa ta, nanging kowé kok malih dadi wit sing mambu penguk,

dadi wit anggur alasan!

₂₂Malah, senajan kowé adusa karo banyu awu

lan nganggo sabun okèh,

nanging blentongé kesalahanmu ora ilang

ing mripat-Ku,

mengkono tembungé Gusti Allah.

₂₃Kepriyé kowé kok wani ngomong: Aku ora tau najisaké awakku,

aku ora tau ngetutké mburi para Baal?

Delengen tindak-tandukmu ing legokan,

ngertènana apa sing wis kok lakoni;

hé, unta wadon sing èntèng sikilé lan mbloya-mblayu mbrana-mbréné,

₂₄sing mbedal mblayu menyang ara-ara samun,

awit kepéngin ngisis!

Sapa sing bisa ngendek enggoné gandrung?

Kabèh sing nggolèki dèwèké, ora perlu rekasa,

bakal pada ketemu ing waktu kawinan.

₂₅Jaganen, supaya sikilmu ora nganggo sepatu,

lan gorokanmu ngelak!

Nanging kowé ngomong: Tanpa guna! Tanpa guna!

Awit kula seneng marang wong-wong mantya,

mila kula bakal ngetutké nang mburiné wong-wong kuwi.

₂₆Kaya wirangé maling sing konangan,

mengkono enggoné turunané Israèl kewirangan,

ya kuwi para ratuné, penggedéné, para imamé lan nabiné,

₂₇sing ngomong marang kayu sak tengkel:

Sampéyan kuwi bapak kula!

lan marang watu: Sampéyan kuwi sing nglairké kula!

Tenan, pada nyingkur marang Aku

lan ora ngadepké praupané marang Aku,

nanging bareng katekan bebaya, terus ngomong:

Panjenengan supaya gelem mitulungi kula!

₂₈Ana ngendi para allahmu, sing kok nggawé kanggo awakmu déwé kuwi?

Bèn pada tangi, yèn bisa mitulungi kowé,

ing waktu kowé nemu tyilaka.

Hé Yéhuda, awit kaya okèhé kuta-kutamu,

ya semono kuwi uga okèhé allahmu!

₂₉Apa perlune kowé arep bantahan karo Aku?

Kowé kabèh wis pada mblénjani Aku,

mengkono tembungé GUSTI.

₃₀Tanpa guna enggon-Ku nggebuki anak-anakmu,

piwulang ora dianggep

pedangmu déwé wis mangan para nabimu nganti entèk,

kaya singa nom sing nubruk nyempali pangané.

₃₁Kowé kuwi tyedak turunané sapa?

Gatèkna tembungé GUSTI!

Apa Aku wis dadi ara-ara samun kanggo Israèl

utawa negara sing peteng ndedet?

Kenèng apa umat-Ku kok ngomong: Kula wis merdéka,

kula pada ora gelem nemoni menèh ing ngarepé Panjenengan?

₃₂Prawan apa bisa lali marang barang rerégané,

utawa pengantèn wadon lali marang patyakan mantèné?

Nanging umat-Ku lali marang Aku

wiwit ing waktu sing ora kena diitung suwéné.

₃₃Apik temen enggonmu nata dalanmu

kanggo nggolèki katrésnan!

Mulané kowé wis kulina nglakoni sing ala.

₃₄Nganti getihé para wong mlarat sing ora salah ketemu

ing jubahmu;

ora waktu pada mbobol arep maling enggoné pada kok konangi!

Senajan kabèh kuwi mengkono,

₃₅nanging kowé ngomong: Aku ora nggawé dosa!

Pantyèn bebenduné wis sumingkir sangka aku!

Aku arep nggawa kowé menyang pengadilan,

awit kowé ngomong: Aku ora nggawé dosa!

₃₆Entèng temen penganggepmu

ing bab ngowahi tindak-tandukmu kuwi!

Kowé bakal kisinan uga awit sangka Egipte,

kaya kowé ngalami kisinan awit sangka Asyur.

₃₇Sangka kana uga kowé bakal metu

karo ngangkat tanganmu,

awit GUSTI wis nampik para sing kowé endelaké,

lan kowé ora bakal olèh nggawé karo para wong kuwi.”