Yérémia 21

₁Tembungé sing dipréntahké GUSTI marang Yérémia, waktu Sedèkia ngutus imam Pashur anaké Malkia lan imam Sépanya anaké Maaséya, karo diweling mengkéné: ₂“Sampéyan supaya gelem takon marang GUSTI, awit Nebukadnésar, ratu ing Babèl merangi kita! Menawa GUSTI gelem nindakké mujijat kanggo kula kaya sing wis kedadian, nganti Nebukadnésar iki mundur ninggalké kula.” ₃Tembungé Yérémia marang para kongkonan mau: “Ngomonga marang Sedèkia mengkéné: ₄Tembungé GUSTI, Gusti Allahé Israèl mengkéné: Aku bakal malik gamané perang sing kok tyekel kuwi lan kok enggo ngadepi perangé ratu ing Babèl lan para wong Kasdim, sing ngepung ing sak njabané témbok: Aku bakal nglumpukké gamané kuwi ing njeruh kuta iki. ₅Aku déwé bakal perang nglawan marang kowé karo ngatungké tangan lan bau sing rosa, karo nesu lan panasé bebendu lan panasé-nesu sing gedé. ₆Aku bakal nibakké bebendu marang kuta iki, ya manungsa ya kéwan, bakal pada mati karo lelara pès sing ngidap-idapi. ₇Sakwisé kuwi mengkéné tembungé GUSTI, Sedèkia, ratuné Yéhuda, para pegawéné lan para wong ing kuta, sing ijik urip, ora kena ing lara pès, pedang lan patyeklik, kuwi kabèh bakal Tak pasrahké marang tangané Nebukadnésar, ratuné Babèl, ya kuwi mungsuhé, sing ngarah nyawané, terus pada dipatèni karo landepé pedang tanpa diéman, tanpa kawelasan lan ngapura.

₈Nanging para rayat ing kéné pada diomongi mengkéné: Tembungé GUSTI mengkéné: Aku nduduhké dalané urip lan pati. ₉Sapa sing tetep manggon ing kuta kéné, bakal mati karo pedang, patyeklik lan lelara pès, nanging sapa sing metu sangka kéné lan teluk marang Kasdim, sing ngepung kowé, kuwi bakal urip; nyawané bakal kanggo rayahané kanggo para wong kuwi. ₁₀Awit Aku wis nglawan kuta iki karo nekakké tyilaka lan ora ndadèkké kabekjané; mengkono tembungé GUSTI. Kuta iki bakal Tak pasrahké nang tangané ratu ing Babèl, sing bakal ngobong kuta iki nganti entèk.”

₁₁Marang brayaté ratu ing Yéhuda. Pada ngrungokna tembungé GUSTI: ₁₂Hé para tyedak turunané Daved, mengkéné tembungé GUSTI: