Ayub 12

₂“Lah ya kowé kuwi sing jenengé manungsa,

yèn kowé pada mati,

kawityaksanan ya mati bebarengan karo kowé.

₃Aku ya nduwé pikiran kaya kowé,

aku ora kalah karo kowé;

sapa sing durung tau weruh sing kaya mengkono kuwi?

₄Aku iki dadi guyonan sak pepadaku,

aku sing menawa sambat marang Gusti Allah terus dituruti,

wong sing apik lan bener dadi guyonan.

₅Sangka panemuné wong sing tentrem uripé,

wong sing sangsara kuwi pantesé dityatyat,

kuwi kaya gebuk kanggo wong sing sikilé kejengklok.

₆Tarupé wong sing tukang ngrusak pada tentrem

lan wong sing nangèkké nesuné Gusti Allah pada ngalami katentreman,

mengkono uga para wong sing arep nggegem Gusti Allah ing tangané.

₇Nanging takon ta marang kéwan, kuwi mesti pada didunungké marang kowé,

lan takon ta marang manuk ing awang-awang,

mesti kowé diduduhké,

₈utawa ngomonga marang bumi, kuwi mesti bakal ngekèki piwulang marang kowé,

uga iwak ing segara bakal nyritakné marang kowé.

₉Tunggalé kuwi kabèh sapa sing ora weruh,

yèn tangané Gusti Allah sing nindakké kuwi;

₁₀yèn nyawané kabèh sing urip

lan napasé saben manungsa kuwi manggon ing tangan-Né?

₁₁Kuping apa ora nguji tembung-tembung,

kaya tyetak enggoné ngrasakaké pangan?

₁₂Apa duduk para wong tuwa sing pada kanggonan kawityaksanan,

lan wong sing wis okèh umuré kuwi sing nduwé pangertèn?

₁₃Nanging Gusti Allah kuwi sing nduwé kawityaksanan lan pangwasa.

Ya Panjenengané kuwi sing dadi sumberé timbangan pikiran lan kapinteran.

₁₄Yèn Panjenengané mbungkar, ora ana sing bisa mbangun menèh.

Yèn Panjenengané nyekel wong, ora ana sing bisa ngluwari.

₁₅Yèn Panjenengané mbendung banyu, terus asat kabèh.

Yèn Panjenengané nglilani mili menèh, terus ngelepi bumi.

₁₆Panjenengané nggawa pangwasa lan kemenangan

ya sing ngwasani wong sing kesasar lan wong sing nasarké.

₁₇Panjenengané sing nggiring lan ngudani para mentri,

lan sing nggawé bodoné para rèkter.

₁₈Panjenengané sing ngutyuli tali banda sing dipasang karo para ratu,

sing terus pada ditalèni bangkèkané karo tali peniset.

₁₉Panjenengané sing nggiring lan ngglédahi para imam,

lan nggolingké wong sing kuwat.

₂₀Panjenengané sing mbungkem tyangkemé para wong sing dipertyaya,

lan para wong tuwa pada diilangi nalaré.

₂₁Panjenengané sing nekakké wirang para wong luhur

lan sing ngutyuli sabuké para wong sing kuwat.

₂₂Panjenengané sing mbukak wewadiné pepeteng

lan nekakké peteng ndedet ing pepadang.

₂₃Panjenengané sing ndadèkké tangkar-tumangkaré lan tumpesé para bangsa,

lan sing nggawé tambah-tambahé bangsa terus diboyong.

₂₄Panjenengané sing nggawé para penggedéné ndonya pada ilang akalé

lan kesasar ing ara-ara samun sing ora ana dalané,

₂₅pada gagap-gagap ing pepeteng sing ora ana pepadangé;

uga pada digawé gloyoran kaya wong mendem.”