Ayub 2

₁Ing sakwijiné dina, para anaké Gusti Allah pada teka nang ngarepé GUSTI, sétan terus ya teka uga ing sak tengahé para anak mau. ₂Pitakoné GUSTI marang sétan: “Kowé sangka ngendi?” Semauré sétan marang GUSTI: “Ijik tas sangka mubeng ndlajahi bumi.” ₃Tembungé GUSTI marang sétan: “Kowé apa ya nggatèkké marang abdi-Ku Ayub? Awit ing sak lumahé bumi ora ana wong sing madani bab enggoné jujur lan bener lan ngabekti marang Gusti Allah, uga enggoné ngedohi sing ala lan tetep enggoné nurut ing katemenané, senajan kowé wis ngojok-ojoki Aku supaya Ayub bakal tak entèkké tanpa sebab.” ₄Sétan terus nyauri GUSTI: “Kulit gantiné kulit; wong mesti gelem masrahké apa sing dadi duwèké kanggo gantiné nyawané. ₅Nanging yèn Panjenengan ngagakké tangan lan nggepok balung lan dagingé, mesti bakal nyepatani Panjenengan ing ngarepé Panjenengan.” ₆Préntahé GUSTI marang sétan: “Ayub kuwi wis ing tanganmu, nanging émanen nyawané!” ₇Sak lungané sétan sangka ngarepé GUSTI, Ayub terus diebyuki karo lara borok wiwit tlapakané sikil nganti tekan embun-embunané. ₈Ayub terus njupuk beling digawé ngeroki awaké lan nglésot ing pawuhan.

₉Ing kono tembungé bojoné: “Apa sampéyan ijik ngantepi ing kejujuranmu? Mbok disepatani waé Gusti Allahmu, terus matia!” ₁₀Nanging semauré Ayub: “Tembungmu kuwi kaya wong gemblung, sembarang pawèhé Gusti Allah sing apik pada tak tampani, sing ala apa ora kudu tak tampani uga?” Sak njeruhné kuwi kabèh Ayub ora nganti nggawé dosa karo lambéné.

₁₁Kantyané Ayub telu bareng krungu bab sak kabèhé tyilaka sing nekani dèwèkné, terus pada teka sangka panggonané déwé-déwé, ya kuwi: Elifas wong Téman, Bildad wong Suah lan Sofar wong Naama; kuwi wis pada setuju arep ngéndangi Ayub perlu ngomongké bélasungkawa lan nglipur. ₁₂Kedadiané, waktu weruh sangka kadohan, pada pangling marang Ayub, lan banter enggoné pada nangis; uga pada nyuwèk-nyuwèk jubahé lan nyawurké lebu menduwur ing sirahé. ₁₃Terus pada lungguh nglésot ing lemah ing ngarepé Ayub, suwéné pitung dina pitung mbengi, ora ana sing ngomong sak ketyap waé, awit pada weruh sangsarané Ayub sing luwih abot banget kuwi.