Ayub 37

₁“Nyata kuwi ndadèkké gemeteré atiku

nganti njingkat sangka panggonané.

₂Rungokna, rungokna gembluduké swarané,

gluduk sing metu sangka tutuké.

₃Sing diutyuli ing sak uruté jembaré langit

lan uga klélapé menyang pojok-pojokané bumi.

₄Sakwisé mengkono Panjenengané ditutké karo swara gemrubuk,

gembluduk swarané kaluhurané.

Yèn swara kuwi dirungokké Panjenengané ora ngéman bledèké.

₅Gusti Allah ngetokké swara gemleger sing ngidap-idapi.

Panjenengané nindakké penggawéané gedé sing ora kena digayuh karo kaweruh kita,

₆awit salju diomongi: Tibaa ing bumi!

Lan marang udan deres lan udan sing gembrojok préntahé: Deresa!

₇Saben wong tangané ketalènan lan dikèki ségel,

supaya kabèh wong weruh penggawéané.

₈Kéwan alasan pada mlebu ing panggonan pandelikané

lan mapan ing guwa-guwané.

₉Lésus njedul sangka gedongé,

lan hawa adem sangka lor.

₁₀Napasé Gusti Allah njalari kedadiané ès,

lan nduwuré banyu dadi kentel.

₁₁Mendung dimomoti banyu,

lan mendung nylorotké klélapé,

₁₂klélapé terus nyamber-nyamber menyang ngendi-endi miturut karo préntahé,

ing bumi nindakké kabèh sing dipréntahké;

₁₃Gusti Allah nggawé supaya bisa nggayuh tujuané

kanggo ngukum isiné buminé

apa kanggo njembarké katrésnan-Né.

₁₄Kuwi kabèh rungokna, hé! Ayub,

menenga lan gatèkna marang mujijat-mujijat Gusti Allah.

₁₅Apa kowé weruh kepriyé enggoné Gusti Allah ngekèki tugas marang kuwi kabèh

lan enggoné nylorotké padangé sangka mendung?

₁₆Apa kowé ngerti bab mlakuné mendung,

lan bab mujijat-mujijat sing maha weruh,

₁₇kowé, sing krasa marang angeté sandangan,

yèn bumi meneng awit kena panasé angin sangka kidul.

₁₈Apa kowé bisa nata mendung dadi sak dawané langit kaya Panjenengané,

nganti padet kaya pangilon tyitakan?

₁₉Kita diomongi, kepriyé kita kudu pada ngomong apa marang Panjenengané,

awit kita ora bisa ngomong apa-apa, jalaran kepetengan.

₂₀Apa ana sing bakal ngekèki ngerti, yèn aku arep nduwé tembung?

Apa wong tau omong, yèn kepéngin dientèkké.

₂₁Saiki pepadang ora kétok,

awit kepetengan karo mendung,

nanging mengko kena karo angin, terus resik padang.

₂₂Sangka sisih lor ana pepadang sing kaya emas,

Gusti Allah dikwasani karo kamulyan sing medèni.

₂₃Sing Mahakwasa, sing pada ora tak mengertèni,

kuwi gedé pangwasané lan keadilané;

senajan sugih kabeneran, senajan mengkono ora nindes,

₂₄mulané diwedèni karo wong,

lan saben wong sing rumangsa wityaksana, kuwi ora diperduli.”