Ayub 38

₂“Sapa ta sing nggawé petengé putusan

karo tembung sing tanpa pamikir?

₃Maraa kaya wong lanang!

Kowé Tak tyeluk, Aku omongana.

₄Kowé ana ngendi, waktu Aku nelesi bumi.

Ngomonga yèn kowé ngerti!

₅Sapa sing netepaké ukurané

kowé apa ora weruh?

Lan sapa sing mentèng tali ukurané?

₆Tyagak-tyagaké mantyep ing ngendi

lan sapa sing masang watu pojokan,

₇ing waktu lintang-lintang ésuk pada seneng-seneng bebarengan

lan para anaké Gusti Allah pada surak-surak?

₈Sapa sing mbendung segara karo lawang

waktu ijik kemrasak metu sangka wetengé,

₉waktu Aku nggawé mendung kanggo sandangané

lan pepeteng kanggo buntelé;

₁₀waktu Aku netepaké watesé,

lan masang slorok kantyingé lan lawang;

₁₁waktu Aku ngomong: Tekan ing kéné waé, aja kliwat,

ing kéné ombakmu sing gemunggung bakal pada diendek!

₁₂Ing sak njeruhné uripmu apa kowé tau ngundang marang tekané ésuk

lan mernahké ésuk wétan,

₁₃supaya pada nyekel pojokané bumi

lan ngebutké wong duraka?

₁₄Bumi mau terus salin rupa dadi lempung sing dityap,

samubarang kabèh rupa kaya klambiné.

₁₅Para wong duraka pada kélangan pepadangé,

tangan sing diatyungké ditugel.

₁₆Apa kowé wis bisa mudun nganti tekan sumberé segara

lan wis ndlajahi dasaré segara?

₁₇Apa gapurané pati wis pada kétok marang kowé

lan apa kowé wis weruh lawangé teleng palimengan?

₁₈Apa kowé ngerti jembaré bumi?

Tyeritakna, yèn kowé wis weruh kuwi kabèh!

₁₉Ing ngendi dalan sing tekan panggonané pepadang,

lan ing ngendi pernahé pepeteng,

₂₀supaya kowé terus bisa mernahké ing pangwasané déwé-déwé

lan weruh dalan-dalan sing tekan panggonané?

₂₁Mesti kowé wis weruh, awit waktu semono kowé wis lair,

lan wis okèh tyatyahé dinamu!

₂₂Apa kowé wis mlebu ing gedong simpenané salju,

lan apa wis weruh simpenané udan krikil,

₂₃sing Aku nyimpen kanggo dina kangèlan,

kanggo waktu gelut lan perang?

₂₄Ing ngendi dalané menyang panggonan sumberé pepadang,

lan panggonan pentyaré angin ing sak lumahé bumi?

₂₅Sapa sing nggawé ilèn-ilèné udan deres

lan dalan kanggo klélapé gluduk,

₂₆supaya tanah sing ora dienggoni karo wong

lan ara-ara sing suwung pada kudanan;

₂₇lan supaya ara-ara samun lan tanah sing ludes pada kewareken

uga suket-suket pada tukul seger?

₂₈Apa udan kuwi ana bapaké?

Lan sapa sing nganakké nètèsé ebun?

₂₉Es kuwi metu sangka wetengé sapa,

lan ebun sing kentel ing langit kuwi sapa sing nglairké?

₃₀Banyu kentel nganti kaya watu,

lan nduwuré segara dadi atos.

₃₁Apa kowé bisa mbundeli taliné lintang Wuluh,

lan ngutyuli bandané lintang Wluku?

₃₂Apa kowé bisa ngetokké lintang Bima sutyi ing waktuné,

lan nuntun mlakuné lintang Kapal lan anak-anaké?

₃₃Apa kowé weruh pernatané langit

lan netepké enggoné mréntah ing bumi?

₃₄Apa kowé bisa mbengokké swaramu nganti tekan mendung,

nganti kowé terus kebanjiran?

₃₅Apa kowé bisa ngetyulké klélap, nganti pada samber-samberan

karo ngomong marang kowé: kita nang kéné?

₃₆Sapa sing ngekèki weruh manuk ibis yèn kali Nil bakal banjir,

utawa sapa sing ngekèki ngerti marang jago yèn udan arep teka?

₃₇Sapa bisa ngitung mendung karo kawityaksanan,

lan sapa sing bisa nyuntak gentongé langit,

₃₈waktu lebu kentel dadi logam

lan prongkolan lemah pada kelèt dadi siji?