Ayub 8

₂“Nganti pira suwéné enggonmu nduwé tembung mengkono kuwi,

lan tembungé tutukmu kaya angin gedé kuwi?

₃Apa ya Gusti Allah mbéngkongké keadilan?

Apa ya sing Mahakwasa mbéngkongké sing bener?

₄Yèn anak-anakmu pada nggawé dosa marang Panjenengané,

mesti wis dipasrahké marang pangwasané paneraké déwé.

₅Nanging yèn enggonmu nggolèki Gusti Allah,

lan njaluk kawelasan marang sing Mahakwasa,

₆angger kowé resik lan temen,

Panjenengané mesti terus tangi lan mitulungi kowé,

lan ndandani omah sing dadi wewenangmu.

₇Terus kahananmu sing mbiyèn bakal kétok asor,

nanging kahananmu sing bakal klakon bakal dadi mulya banget.

₈Takona ta bab wong-wong jaman mbiyèn,

lan gatèkna apa sing wis dititipriksa karo para leluhuré.

₉Awit kita iki botyah dèk wingi soré, pada ora weruh apa-apa,

awit umur kita ing ndonya iki kaya ayang-ayang.

₁₀Para leluhur kita apa ora kudu mulangi lan ngomong marang kowé,

lan ngetokké tetembungan sing metu sangka atiné.

₁₁Bangsané suket glagah apa bisa tukul duwur, yèn ora ing rawa,

utawa glagah apa bisa tukul subur yèn tanpa banyu?

₁₂Senajan ijik arepé tukul, sak durungé waktuné wis dibatyok,

apa ora mesti terus gelis alum, tenimbang karo suket liyané.

₁₃Ora béda karo lelakoné sak kabèhé wong sing ora éling marang Gusti Allah;

kuwi entèk pengarep-arepé;

₁₄pengarep-arepé kaya jaring kemlandingan,

lan pengandelé kaya jaring kalamangga,

₁₅omahé dienggo sèndènan, nanging ora bisa terus ngadek,

digondèli, nanging ora kuwat.

₁₆Dèwèké kaya tetukulan sing ijik seger ing padangé srengéngé,

ngglolor rata ing petamanan.

₁₇Oyot-oyoté nggubet-nggubet ing tumpukan watu,

lan nlesep-nlesep ing sela-selané watu-watu kuwi.

₁₈Yèn dijebol sangka panggonané,

terus ora diakoni karo panggonan mau, semauré:

Aku durung tau weruh kowé.

₁₉Ya mengkono kuwi kabungahané uripé,

lan terus ana tetukulan liyané sing tukul sangka lemah.

₂₀Ngertia, Gusti Allah ora bakal nampik wong sing temen,

lan ora nuntun tangané wong sing nggawé ala.

₂₁Panjenengané ijik nggawé tutukmu ngguyu,

lan nggawé lambému surak-surak.

₂₂Mungsuhmu bakal ngalami kisinan,

lan tarupé wong ala bakal entèk.”