Yosua 10

₁Bareng Adoni-Sèdèk, ratu ing Yérusalèm krungu kabar yèn Yosua wis ngrebut lan ngentèkké kuta Ai, lan apa sing ditindakké marang kuta Yériko lan ratuné, uga ditindakké marang kuta Ai lan ratuné lan yèn wong kuta Gibéon wis pada nganakké perjanjian kekantyan karo wong Israèl lan manggon ing sak tengahé, ₂nganti wong pada wedi banget, awit Gibéon kuwi kuta sing gedé, kaya salah sakwijiné kuta kraton, malah luwih gedé tenimbang kuta Ai, lan wong-wongé kabèh kuwi perjurit. ₃Mulané Adoni-Sèdèk, ratu ing Yérusalèm mau kongkonan menyang ing ngarepé Hoham, ratu ing negara Hébron, Piream, ratu ing Yarmut, Yafia, ratu ing Lakis, lan Debir, ratu ing Eglon, tembungé: ₄“Sampéyan pada kula suruhi teka lan ngréwangi kula, ing waktu pada merangi Gibéon, awit wis kekantyan karo Yosua lan bangsa Israèl.” ₅Para ratu bangsa Amori lima mau terus pada ngumpul lan ngluruk bareng: ratu Yérusalèm, ratu ing Hébron, ratu ing Yarmut, ratu ing kuta Lakis lan ratu ing kuta Eglon, kabèh perjurité, pada ngedekké tarup ngepung kuta Gibéon lan nyerang perang. ₆Wong Gibéon terus pada kongkonan menyang ing ngarepé Yosua ing tarupé ing kuta Gilgal, tembungé: “Supaya aja nganti négakké para abdi sampéyan, gelis tekaa menyang panggonan kula, ngluwari lan mitulungi kula, awit kabèh ratu-ratuné bangsa Amori sing ana pegunungan pada bebarengan nglawan marang kula.”

₇Yosua terus budal sangka Gilgal, dèkné lan perjurité kabèh, lan kabèh penggedéné perjurit sing gagah lan rosa-rosa. ₈GUSTI ngetokké tembung marang Yosua: “Kowé aja wedi marang wong kuwi, awit wong kuwi wis pada Tak pasrahké ing tanganmu, nganti ora ana wong siji-sijia sing tetep urip ing ngarepmu.” ₉Yosua terus karo ndadak nyerang marang mungsuhé, sakwisé sewengi muput budal sangka Gilgal. ₁₀GUSTI terus nggawé késruh mungsuhé ing ngarepé wong Israèl, terus Yosua njalari mungsuhé pada kalah banget ing sak tyedaké Gibéon, terus pada diuyak ing dalan sing nuju menyang ing unggah-unggahan Bèt-Horon, digetyek mundur nganti tekan ing Azéka lan ing Makéda. ₁₁Waktu pada mblayu ing ngarepé wong Israèl, ijik ing èrèng-èrèngé Bèt-Horon, pada diudani watu gedé-gedé sangka langit karo GUSTI, nganti tekan ing Azéka, pungkasané pada mati. Sing mati ketiban watu kuwi luwih okèh tenimbang karo sing pada dipatèni wong Israèl karo pedang.

₁₂Terus Yosua ngomong marang GUSTI ing waktu GUSTI ngekèkké wong Amori marang wong Israèl; dèkné terus ngomong ing ngarepé bangsa Israèl: “Hé srengéngé, mandeka ing nduwuré Gibéon, lan kowé mbulan, ing nduwuré panggonan Ayalon!” ₁₃Srengéngé terus mandek, lan mbulan uga ora mingset, nganti tekan sak rampungé wong Israèl enggoné males nyerang marang mungsuhé. Bab kuwi wis ketulis ing Kitabé Wong Jujur? Srengéngé mandek ing tengahé langit lan alon-alon mingslep nganti tekan sedina muput. ₁₄Durung tau ana dina sing kaya mengkono mau, sakprana-sakpréné; nanging GUSTI nganti ngrungokké penjaluké manungsa sing kaya mengkono, awit GUSTI déwé sing mimpin perangé wong Israèl. ₁₅Yosua terus mulih menyang tarupé ing Gilgal ditutké perjurit Israèl kabèh.

₁₆Ratu lima kuwi mau pada mlayu lan ndelikké ing guwa Makéda. ₁₇Yosua terus dikèki kabar mengkéné: “Ratu lima kuwi pada ditemokké ndelik ing guwa Makéda.” ₁₈Yosua terus ngongkon: “Tyangkemé guwa kuwi glundungana watu gedé-gedé lan ing ngarepé dèlèhna wong sing jaga. ₁₉Nanging kowé aja mandek enggonmu ngoyak-oyak marang mungsuhmu lan buntuté barisané perjurit gepuken; aja nganti pada bisa mlebu ing kuta-kutané, awit GUSTI, Gusti Allahmu wis ngekèkké wong-wong kuwi marang kowé!” ₂₀Bareng Yosua lan wong Israèl wis rampung enggoné pada ngalahké mungsuhé nganti banget enggoné kalah, ya kuwi nganti lebur babar pisan, - mung siji-loro sing bisa utyul lan pada bisa mlebu ing kuta-kuta sing dikuwati ₂₁wong sak bangsa kabèh terus pada bali karo slamet ing ngarepé Yosua ing tarup ing Makéda, ora ana wong siji-sijia sing wani ngutyapké tembung ngantyam marang wong Israèl. ₂₂Yosua terus ngomong: “Tyangkemé guwa kuwi bukaken, lan ratu lima pada gawanen metu sangka guwa lan adepna marang aku mréné!” ₂₃Sing dikongkon terus pada nglakoni mengkono, ratu lima pada digawa metu sangka guwa, dipasrahké marang Yosua, ya kuwi: ratu Yérusalèm, ratu Hébron, ratu Yarmut, ratu Lakis, lan ratu Eglon. ₂₄Bareng ratu mau wis pada digawa metu dipasrahké marang Yosua, Yosua terus nyeluk nglumpukké wong Israèl kabèh lan mréntahké marang para penggedéné perjurit sing wis mèlu perang: “Pada majua, tlapakanmu antyikna ing gitoké para ratu iki.” Para penggedéné terus pada maju lan ngantyikké tlapakané ing gitoké para ratu kuwi. ₂₅Yosua terus ngomong menèh: “Aja pada wedi lan aja gemeter atimu, pada sing kendel lan tatak atimu, awit kaya mengkéné iki bakal ditandangi GUSTI marang sakkèhé mungsuhmu sing pada kok lawan perang.” ₂₆Sakwisé kuwi para ratu mau terus pada dipatèni karo Yosua, terus pada digantung ing kayu limang iji, nggantungé ing kayu mau nganti tekan ing wayah soré. ₂₇Bareng wayah ngarepké mingslepé srengéngé Yosua ngongkon ngedunké layoné sangka kayu mau lan pada dibuwang ing njeruh guwa, panggonané ndelik. Tyangkemé guwa mau terus ditutup watu gedé-gedé, lan ijik ana nganti sepréné.

₂₈Ing dina kuwi Yosua ngrebut kuta Makéda lan digetyek karo landepé pedang, uga ratu; kutané kabèh wong sak isiné kuta pada dientèkké, ora ana wong siji-sijia sing bisa utyul lan ratu ing Makéda kuwi ditandangi pada kaya sing wis ditindakké marang ratu ing kuta Yériko.

₂₉Sakwisé mengkono Yosua nerusaké ngluruk ditutké karo wong Israèl kabèh, sangka kuta Makéda menyang ing Libna, terus nyerang perang nglawan Libna. ₃₀Lan kuta kuwi uga dipasrahké GUSTI marang wong Israèl uga ratuné; kutané digetyek karo Yosua karo landepé pedang kabèh sakkèhé wong sak isiné kuta, ora ana wong siji-sijia sing bisa utyul, lan ratuné ditandangi pada kaya sing wis ditindakké marang ratu ing Yériko.

₃₁Yosua terus nerusaké mlakuné sangka Libna menyang ing Lakis, ditutké wong Israèl kabèh, kutané kuwi terus dikepung lan dilawan karo perang. ₃₂GUSTI ngekèkké Lakis mau marang wong Israèl. Ing dina kaping pindoné wis direbut karo Yosua. Kuta kabèh sak isiné digetyek karo landepé pedang, tyotyok kaya sing wis ditindakké marang Libna. ₃₃Hor, ratu ing Geser terus teka gelem ngréwangi kuta Lakis, nanging dipatèni karo Yosua kabèh rayaté, nganti ora ana wong siji-sijia sing bisa utyul.

₃₄Yosua terus nerusaké ngluruk ditutké wong Israèl kabèh sangka Lakis menyang ing Eglon: kuta kuwi terus dikepung lan dilawan karo perang. ₃₅Bareng sedina kuwi uga kutané wis bedah, lan digetyek karo landepé pedang, sakkèhé wong ing kono pada dipatèni bareng sedina kuwi uga, pada kaya sing ditindakké marang kuta Lakis.

₃₆Sakwisé mengkono Yosua terus ngluruk sangka kuta Eglon menyang ing kuta Hébron, ditutké karo wong Israèl kabèh, kuta kuwi terus dilawan karo perang. ₃₇Negara kuwi direbut lan kalah karo landepé pedang kabèh ratu lan kabèh kuta pangwasané lan kabèh wong sing manggon ing kono, ora ana siji-sijia sing bisa utyul tyotyok kaya sing wis ditindakké marang Eglon, kuta kuwi kabèh sakkèhé wong sak isiné pada dientèkké.

₃₈Yosua terus mulih menyang ing kuta Debir, ditutké wong Israèl kabèh, kuta kuwi uga kena ing perang, ₃₉negara kuwi kabèh ratu lan kabèh negara pangwasané, pada kerebut lan kalah karo landepé pedang. Kabèh wong kono pada dipatèni, ora ana siji-sijia sing bisa utyul; pada kaya sing wis ditindakké marang Hébron lan Libna lan ratuné, Debir sak ratuné uga ditandangi mengkono.

₄₀Kaya mengkono enggoné Yosua ngalahké negara kuwi kabèh, ing pegunungan, ing negara Negeb, ing bawah Pegunungan lan ing pèrèngané gunung uga ratuné, ora ana wong siji-sijia sing bisa utyul, kabèh sing ambekan pada dipatèni, kaya sing wis dadi préntahé GUSTI, Gusti Allahé Israèl. ₄₁Yosua enggoné merangi mungsuhé kuwi wiwit ing kuta Kadès-Barnéa nganti tekan ing Gaza, uga negara Gosèn nganti tekan ing Gibéon. ₄₂Sakkèhé ratu kuwi mau lan negarané pada dikalahké karo Yosua ing sak njeruhné mlaku sepisan waé, awit GUSTI, Gusti Allahé wong Israèl sing mimpin perangé Israèl. ₄₃Sakwisé mengkono Yosua terus mulih menyang ing tarupé ing kuta Gilgal, ditutké karo wong Israèl kabèh.