Panggonan sing durung dikalaké
1Bareng Yosua wis tuwa, wis okèh umuré, terus diomongi GUSTI: “Kowé wis tuwa, wis okèh umurmu, lan negara sing durung kok kalahké kuwi ijik okèh banget. 2Nanging negara sing ijik kèri ya kuwi: sakkèhé panggonané wong Filistèn lan sak kabèhé negara wong Gesur, 3wiwit sangka kali Sikor sak wétané negara Egipte tekan ing panggonané Ekron mengalor, kuwi diitung negarané wong Kanaan; penggedéné wong Filistèn kuwi lima, ya kuwi ing Gaza, Asdod, Askélon, Gad lan Ekron, uga bangsa Awi 4ing sisih kidul, lan sak kabèhé negara wong Kanaan lan Meara, duwèké wong Sidon, tekan ing Afèk, ya kuwi tekan ing panggonané wong Amori; 5sak terusé negarané wong Gebal lan kabèh bawah gunung Libanon ing sisih mletèkké srengéngé, sangka Baal-Gad ing sikilé gunung Hèrmon, nganti tekan ing dalan sing menyang ing Harmat; 6sak kabèhé wong sing manggon ing pegunungan, wiwit sangka gunung Libanon tekan ing Misrefot-Maim; sakkèhé wong Sidon, kuwi bakal Tak tundung déwé sangka ngarepé wong Israèl; mung waé negarané kok kèkké marang wong Israèl karo dilotré, kaya sing wis Tak omongké marang kowé,. 7Kanggo kuwi negara iki kok edum-edumna marang taler sing sanga lan marang separo taleré Manasé kanggo pandumané.”
Pandumané tanah ing sabrangé laut Yordan
8Bebarengan karo taleré Manasé sing separo, wong Rubèn lan wong Gad, wis pada dikèki panduman karo Moses ing sabrangé laut Yordan sisih wétané, kaya sing wis ditemtokké karo Moses, abdiné GUSTI, kanggo wong-wong mau, 9ya kuwi wiwit ing Aroèr ing pinggir kali Arnon, lan kuta sing peneré ing separoné kali kuwi, lan sak kabèhé lemah rata ing ngisoré pegunungan wiwit ing Médeba nganti tekan ing Dibon, 10uga kabèh kutané Sihon, ratu wong Amori, sing manggon ing Hèsbon, nganti tekan ing panggonané wong Amon, 11uga negara Giléad lan panggonané wong Gesur lan wong Maaka lan sak ratané gunung Hèrmon lan panggonané tanah Basan kabèh tekan ing Salka, 12ya sak kabèhé kratoné Og, ratu ing Basan, sing ngwasani ing Astarot lan ing Edrèi, kuwi déwé sing dadi turahé wong Réfaim, sing wis pada dikalaké lan ditundung karo Moses. 13Nanging wong Israèl ora nundungi wong Gesur lan wong Maaka mau, dadiné wong Gesur lan wong Maaka tetep pada manggon ing tengahé wong Israèl nganti tekan sepréné.
14Mung taleré Lévi sing ora dikèki panduman, GUSTI, Gusti Allahé Israèl, kuwi sing dadi panduman duwèké, kaya sing wis dijanjèkké marang dèwèké kabèh.
15Taleré turunané Rubèn kuwi wis pada dikèki karo Moses miturut turunané, panduman iki: 16panggonané sing dadi pandumané wiwit ing Aroèr ing pinggir kali Arnon kuta sing peneré ing separoné kali kuwi, lan lemah rata ing ngisoré pegunungan sak tyedaké Médeba kabèh; 17Hèsbon karo sakkèhé kuta panggonan pangwasané, sing peneré ing lemah rata ing ngisoré pegunungan mau, ya kuwi: kuta Dibon, Bamot-Baal, Bèt-Baal-Méon, 18Yahas, Kedémot, Mefaat, 19Kiryataim, Sibma, Seret-Hasahar ing ngisoré sak uruté gunung kuwi, 20Bèt-Péor, pèrèngané gunung Pisga, lan Bèt-Yerimot, 21sak terusé sakkèhé kuta ing tanah rata ing ngisoré pegunungan lan sak kabèhé kratoné Sihon; ratuné wong Amori, sing ngwasani ing Hèsbon, sing dikalaké Moses, uga para ratu ing Midian, ya kuwi Ewi, Rekem, Sur, Hur, lan Réba, para ratu sak ngisoré Sihon, sing pada manggon ing negara kono. 22Uga tukang tenung Biléam, anaké Béor wis dipatèni karo pedang karo wong Israèl, bebarengan karo wong sing pada mati dibabat karo pedangé.
23Dadi tapel watesé panggonané turunané Rubèn kuwi laut Yordan lan sak uruté pinggiré. Ya kuwi sing dadi tanah pandumané turunané Rubèn miturut turunané, ya kuwi kuta-kutané karo kabèh désa-désané.
24Taleré Gad, ya kuwi turunané Gad, wis pada dikèki karo Moses miturut turunané panduman iki: 25sing dadi duwèké ya kuwi: Yaéser lan kabèh kutané negara Giléad, lan separoné negarané wong Amon tekan ing Aroèr, sing peneré ing wétané Raba, 26ya kuwi wiwit ing Hèsbon tekan ing Ramat-Mispa lan ing Betonim, lan sangka Mahanaim tekan ing panggonané Debir, 27lan ing legokan Bèt-Haram, Bèt-Nimra, Sukot lan Safon, turahané kratoné Sihon, ratu ing Hèsbon; laut Yordan lan bawah pinggiré tekan ing pungkasané tlaga Kineret, ing wétané laut Yordan.
28Kuwi panggonan pandumané wong turunané Gad miturut turunané, ya kuwi kuta-kutané karo désa-désané.
29Separo taleré Manasé, ya kuwi kulawargané turunané Manasé sing separo wis dikèki karo Moses, miturut turunané, panduman iki: 30sing dadi panggonané: wiwit sangka Mahanaim: sak tanah Basan kabèh, kratoné Og kabèh, ratu ing negara Basan, lan panggonané wong Hawot-Yair kabèh, ing Basan kono, tyatyahé kutané suwidak, 31sak terusé separoné tanah Giléad, Astarot lan Edrèi, kuta-kutané kratoné Og ing Basan, kuwi dadi sing dadi pandumané turunané Makir, anaké Manasé, ya kuwi sing dadi pandumané separoné turunané Makir miturut turunané.
32Kuwi kabèh sing wis didum-dumké karo Moses kanggo pandumané waktu ing tanah rata ing Moab, ing wétané laut Yordan, ing sak tyedaké Yériko. 33Nanging taleré Lévi ora dikèki panduman karo Moses: GUSTI, Gusti Allahé Israèl déwé kuwi sing dadi pandumané kaya sing wis dijanjèkké marang dèwèké kabèh.
