Kidung Pesambat 5

₁Duh GUSTI, Panjenengan supaya éling

apa sing wis pada kita alami,

supaya Panjenengan gelem weruh

lan mangertèni marang kahanané kita sing asor iki.

₂Negara panduman kita wis tiba marang bangsa liya,

omah-omah kita marang wong mantya.

₃Kita pada dadi botyah lola, ora nduwé bapak,

ibu kita pada kaya randa.

₄Enggèn kita ngombé banyu karo tuku,

lan enggèn kita nganggo kayu karo mbayar.

₅Kita pada diuber-uber ing tyedakan,

pada kesel nanging ora olèh ngasuh.

₆Kita wis pada ngatungké tangan marang wong Egipte,

lan marang wong Asyur, supaya bisaa mangan warek.

₇Para leluhur kita sing pada nggawé dosa

wis ora ana,

kita sing nyangga dosané.

₈Réwang tukon pada mréntah kita,

ora ana sing ngluwari kita sangka tangané.

₉Enggèn kita golèk pangan karo antyaman,

awit sangka anané mungsuh ing ara-ara samun.

₁₀Kulit kita murup kaya prapèn,

awit panasé nemen sing kaliren.

₁₁Para wong wadon ing Sion pada dirujak,

mengkéné uga prawan-prawan ing kuta-kutané Yéhuda.

₁₂Para penggedéné pada digantung karo tangané mungsuh,

para pinituwa ora diajèni.

₁₃Wong nom-noman pada dikongkon mikul gilingan,

anak-anak lanang pada ambruk awit kabotan anggèné mikul kayu.

₁₄Para tuwa pada ora kumpulan menèh ing gapurané kuta,

para nom-noman mandek anggèné main harep

₁₅Kebungahané ati kita wis ilang,

jogètan kita pada malih dadi kasusahan.

₁₆Makuta wis tiba sangka sirah kita, oh memelas;

awit kita wis pada nggawé dosa!

₁₇Ya awit sangka mengkono kuwi ati kita lara,

ya awit sangka mengkono kuwi mripat kita terus dadi blawur.

₁₈Awit sangka gunung Sion sing wis ludes,

asu-asu alasan pada pating kluyur ing kono.

₁₉Duh GUSTI, Panjenengan kuwi langgeng,

dampar Panjenengan ora owah gingsir nganti turun-temurun.

₂₀Kenèng apa kok Panjenengan nganti ora éling

marang kita kabèh ing sak lawasé,

kenèng apa kok kita Panjenengan tégakaké nganti suwé?

₂₁Duh GUSTI, kita supaya pada Panjenengan balèkké marang Panjenengan,

sak nalika pada bakal mratobat,

kahanané kita supaya Panjenengan pulihké menèh

kaya waktu mbiyèn.

₂₂Utawa apa Panjenengan bakal nampik marang kita?

Apa Panjenengan nesu banget marang kita?