Lukas 3

₁Sak njeruhné pemrintahané kaisar Tiberius wis nyandak limalas tauné, nalika Pontius Pilatus dadi gubernur ing Yudéa, lan Hérodes dadi ratuné bawah Galiléa, Filipus seduluré dadi ratuné bawah Ituréa lan Trakonitis lan Lisanias dadi ratuné bawah Abiléné, ₂uga Hanas lan Kayafas dadi imam gedé, Gusti Allah ngekèki tembungé marang Yohanes, anaké imam Sakaria, ing ara-ara samun. ₃Yohanes terus ndlajahi sak kabèhé panggonan laut Yordan lan ngabaraké baptisan mratobat kanggo pangapurané dosa, ₄kaya sing ketulis ing kitab Yésaya, tembungé:

₇Yohanes terus ngomong marang wong okèh sing pada teka njaluk dibaptis: “Hé, turunané ula upas! Sapa sing ngongkon kowé nyingkiri bebendu sing bakal nibani? ₈Mulané pada ngetokna wohé mratobat sing sembada. Lan aja pada nduwèni pikiran: Abraham kuwi bapak leluhur kita! Awit aku ngomong marang kowé: Gusti Allah kwasa nggawé turunané Abraham sangka watu-watu iki! ₉Kampak wis tyumepak ing poké wit lan saben wit sing ora ngetokké woh sing betyik, bakal ditegor lan dityemplungké ing geni.”

₁₀Wong okèh mau terus pada takon: “Yèn mengkéné, apa sing kudu pada kita tandangi?” ₁₁Semauré: “Sapa sing nduwé klambi loro, supaya ngekèki wong sing ora nduwé lan sapa sing nduwé pangan, ya tumindaka mengkono.” ₁₂Ana juru pajek sing uga teka arep njaluk dibaptis, kuwi pada njaluk ngerti: “Guru, kita kudu pada nandangi apa?” ₁₃Semauré: “Aja pada nagih ngluwihi sing wis ditentokké kanggo kowé!” ₁₄Para suradadu uga pada njaluk ngerti: “Yèn kita, apa sing kudu pada kita lakoni?” Semauré Yohanes: “Aja ngrampas lan aja meres, tyukupna karo gajianmu déwé.”

₁₅Nanging awit wong okèh ijik pada ngentèn-entèni lan ngarep-arep Mésias, kabèh pada ngomong apa Yohanes kuwi Panjenengané, ₁₆Yohanes terus semaur, tembungé: “Aku iki mbaptisi kowé nganggo banyu, nanging Panjenengané sing kwasané ngungkuli aku, bakal teka lan ngutyuli taliné sepatuné waé, aku ora pantes. Panjenengané bakal mbaptisi kowé nganggo Roh Sutyi lan geni. ₁₇Panjenengané wis nggawa piranti kanggo ngresiki gandum lan panggonan penutoné; gandumé diklumpukké ing lumbungé, nanging merangé bakal diobong ing geni sing ora bisa disirep.”

₁₈Karo ngekèki pitutur liyané sing okèh Yohanes nggelarké Injil marang wong okèh. ₁₉Nanging bareng piyambaké melèhké Hérodes, ratuné bawah kono, bab lelakoné karo Hérodias, bojoné seduluré lan bab enggoné nindakké sak kabèhé sing ala liya-liyané, ₂₀ratu kuwi mundak tambah durakané, karo enggoné ngukum Yohanes.

₂₁Nalika wong okèh kuwi wis pada dibaptis lan nalika Yésus uga dibaptis lan ijik ndedonga, langit terus mbiyak, ₂₂terus kedunan karo Roh Sutyi rupa manuk dara. Terus ana swara sing nyuwara sangka langit ngéné: “Kowé kuwi Putra-Ku sing Tak trésnani, sing ndadèkké senengé ati-Ku.”

₂₃Nalika Yésus wiwit nyambutgawé, umuré kurang luwih telung puluh taun lan miturut pangirané wong-wong, Panjenengané kuwi anaké Yosèf, anaké Eli, ₂₄anaké Matat, anaké Lèwi, anaké Malki, anaké Yanai, anaké Yosèf, ₂₅anaké Matitya, anaké Amos, anaké Nahum, anaké Hèsli, anaké Nagai, ₂₆anaké Maat, anaké Matitya, anaké Simèi, anaké Yosèk, anaké Yoda, ₂₇anaké Yohanan, anaké Résa, anaké Sérubabèl, anaké Séaltièl, anaké Nèri, ₂₈anaké Malki, anaké Adi, anaké Kosam, anaké Elmadam, anaké Er, ₂₉anaké Yosua, anaké Elièsar, anaké Yorim, anaké Matat, tyedak turunané Lèwi, ₃₀anaké Siméon, anaké Yéhuda, anaké Yosèf, anaké Yoram, anaké Elyakim, ₃₁anaké Méléa, anaké Mina, anaké Matata, anaké Natan, anaké Daved, ₃₂anaké Isai, anaké Obèd, anaké Boas, anaké Salma, anaké Nahason, ₃₃anaké Aminadab, anaké Admin, anaké Arni, anaké Hèsron, anaké Pèrès, anaké Yéhuda, ₃₄anaké Yakub, anaké Isak, anaké Abraham, anaké Térah, anaké Nahor, ₃₅anaké Séruk, anaké Réhu, anaké Pèlèg, anaké Eber, anaké Sela, ₃₆anaké Kénan, anaké Arpaksad, anaké Sèm, anaké Noah, anaké Lamèk, ₃₇anaké Métusalah, anaké Hénokh, anaké Yarèd, anaké Mahalalèl, anaké Kénan, ₃₈anaké Enos, anaké Sèt, anaké Adam, Putrané Gusti Allah.