Matius 7

₁“Aja pada ngadili salahé wong, supaya kowé aja diadili. ₂Awit pepakon sing kok enggo ngadili, ya kuwi sing bakal dienggo ngadili kowé. Lan takeran sing kok enggo naker, ya kuwi sing bakal dienggo naker kowé. ₃Kepriyé kowé weruh kayu sak tyuwil ing mripaté sedulurmu, nanging kayu glondongan ing mripatmu déwé, kowé kok ora weruh? ₄Kepriyé kowé kok bisa ngomong karo sedulurmu: Maraa, kayu sak tyuwil ing mripatmu kuwi tak ilangané, nanging mripatmu déwé ana glondongan kayu? ₅Hé, wong lamis, ilangana ndisik kayu glondongan ing mripatmu, mengko kowé bakal karo jelas enggonmu ngilangi kayu sak tyuwil ing mripaté sedulurmu.”

₆“Barang sing sutyi aja kok wènèhaké marang asu, lan mutiaramu aja kok untyalké marang babi, supaya ora diidak-idak lan terus minger nyrongot kowé.”

₇“Pada njaluka, mesti bakal dikèki. Pada nggolèka, mesti bakal nemu. Pada totok-totoka, mesti bakal dibukakké. ₈Awit saben wong sing njaluk bakal nampa, sing nggolèk bakal nemu lan sing totok-totok kuwi bakal dibukakké lawang. ₉Apa ana tunggalmu sing dijaluki roti anaké, kok ngekèki watu, ₁₀utawa yèn dijaluki iwak, kok ngekèki ula? ₁₁Yèn kowé sing ala pada mengertèni bab pawèh sing betyik marang anak-anakmu, apa menèh Bapakmu ing swarga, mesti pawèh sing betyik marang wong sing pada ndedonga marang Panjenengané.”

₁₂“Mulané sembarang penggawé sing kok karepké ing bab tumindaké wong marang kowé, kuwi ya tindakna uga marang wongé, awit ya mengkono kuwi piwulangé Torèt lan kitabé para nabi.

₁₃Pada mlebua liwat ing lawang sing tyiut, awit amba lawangé lan jembar dalané sing tekan menyang karusakan, nanging okèh wong sing pada mlebu ing kono. ₁₄Kosok baliné rupek lawangé lan tyiut dalané sing nuju menyang urip, nanging mung setitik wong sing nemu kuwi.”

₁₅“Sing ati-ati marang para nabi palsu, sing pada nekani kowé nganggo nylamur kaya wedus gèmbèl, nanging sejatiné kuwi asu alasan sing galak. ₁₆Bakalé kowé bisa nitik marang bab mau sangka wohé. Apa ana wong ngunduh anggur sangka tetukulan eri, utawa woh anjir sangka rerungkutan? ₁₇Nanging wit sing betyik ngetokké woh betyik, wit sing gering wohé ya ora apik. ₁₈Wit sing betyik ora bisa ngetokké woh sing ala, lan wit sing gering ora bisa ngetokké woh sing betyik. ₁₉Sak rupané wit sing ora ngetokké woh sing betyik, mesti ditegor terus dityemplungké ing geni. ₂₀Nanging wong-wong mau bakal kétok sangka wohé.

₂₁Sing bakal mlebu ing Kratoné swarga kuwi duduk angger wong sing ngomong marang Aku: Gusti, Gusti, nanging mung wong sing nglakoni karepé Bapak-Ku ing swarga. ₂₂Ing dina pungkasan bakal okèh wong sing pada ngomong marang Aku: Gusti, Gusti, apa ora kula wis nubuat atas asma Panjenengan, lan wis nundungi demit atas asma Panjenengan, apa menèh wis nganakké mujijat okèh atas asma Panjenengan? ₂₃Ing waktu kuwi bakal pada Tak blakani mengkéné: Aku ora kenal karo kowé. Pada sumingkira sangka ngarep-Ku, hé, wong sing pada duraka.”

₂₄“Mulané saben wong sing ngrungokké tembung-Ku kuwi mau lan terus dilakoni, kuwi kaya wong wityaksana, sing ngedekké omahé ing sak nduwuré watu. ₂₅Bareng udan deres, terus banjir lan ana angin gedé, sing nyerang omah mau, nanging ora ambruk, awit dasaré watu atos. ₂₆Nanging saben wong sing ngrungokké tembung-Ku kuwi mau nanging ora dilakoni, kuwi kaya wong sing bodo, sing ngedekké omahé ing sak nduwuré wedi. ₂₇Bareng udan deres, terus banjir, lan ana angin gedé sing nyerang, omah mau terus ambruk lan banget rusaké.”

₂₈Kadung Yésus wis mungkasi tembungé kuwi mau, wong kabèh pada nggumun banget marang piwulangé, ₂₉jalaran enggoné mulangi nganggo pangwasa, ora kaya para juru Torèt.