Mika 5

₁Nanging kowé, hé, Bètléhèm ing Efrata,

senajan kowé klebu tyilik ing antarané turunané Yéhuda,

sangka kowé bakal lair sing ngladèni marang Aku,

ratu sing bakal ngwasani Israèl;

sing wis ana wiwit ing jaman mbiyèn,

wiwit ing jaman mbiyèn.

₂Mulané bangsa kuwi mung arep dijarké waé nganti tekan waktuné,

wong wadon sing pestiné nglairké anak wis kelakon nglairké,

terus turahané para seduluré

bakal pada bali ngantyani wong Israèl.

₃Panjenengané bakal nandangi lan ngengon wong-wong mau karo nganggo pangwasané GUSTI,

ya kaluhurané asmané GUSTI, Gusti Allahé;

para wong bangsané bakal pada manggon karo tentrem,

awit saiki Panjenengané kuwi dadi luhur nganti tekan pungkasané bumi;

₄lan Panjenengané bakal dadi sing kanggonan katentreman.

Yèn Asyur mlebu ing negara kita,

lan mlaku ing negara kita,

terus kita pada ngedekké pangon pitu sing nglawan,

malah pemimpin manungsa wolu.

₅Kuwi bakal pada nyukur negara Asyur karo pedang,

lan negarané Nimrod karo pedang tanpa rangka,

lan ratu bakal nylametaké kita sangka Asyur

yèn dèwèké mlebu ing negara kita

lan mlaku ing panggonané kita.

₆Turahé Yakub bakal

manggon ing antarané bangsa okèh,

kaya ebun sangka GUSTI,

kaya nètèsé udan ing tetukulan,

sing ora njagakké marang wong,

lan ora ngarep-arep marang anak-anaké manungsa.

₇Uga turahé Yakub kuwi bakal ing antarané para taleré bangsa, lan ing tengahé para bangsa okèh,

kaya singa ing antarané kéwan galak alasan,

kaya singa nom ing tengahé kumpulan wedus gèmbèl;

menyanga ngendi waé parané,

mbanting lan nubruk,

lan ora ana sing bisa nylametaké.

₈Tanganmu bakal ngungkuli para lawanmu,

lan sak kabèhé mungsuhmu bakal dientèkké.

₉Tembungé GUSTI:

Dina kuwi bakal kelakon,

Aku bakal ngentèkké jaranmu sangka tengahmu,

lan bakal ngrusak krétamu.

₁₀Aku bakal ngentèkké kuta-kutané negaramu,

lan bèntèngmu bakal pada Tak gempuri.

₁₁Aku bakal ngentèkké pirantimu sulap,

lan tukang tenung bakal ora ana menèh ing tengahmu.

₁₂Mengkono menèh retya-retyamu,

uga tugu-tugu brahalamu

bakal Tak gempuri sangka tengahmu,

nganti kowé bakal ora sujut menèh

marang gawèané tanganmu.

₁₃Uga tyagak-tyagaké brahala bakal Tak jeboli sangka tengahmu,

lan brahalamu bakal Tak entèkké.

₁₄Ngertia para bangsa

sing ora nggatèkké tembung-Ku,

bakal Tak wales karo bebendu lan nesu-Ku.