1GUSTI terus ngetokké tembung marang Moses: 2“Kowé ngomonga marang wong Israèl lan tuturana mengkéné: Yèn kowé pada mlebu ing negara Kanaan, terus sing mesti bakal dadi duwèkmu ya kuwi negara Kanaan miturut tapel watesé. 3Nanging watesé negaramu sing sisih kidul kuwi wiwit sangka ara-ara samun Sin ing sak uruté negara Edom; dadi watesé sing sisih kidul kuwi ing sisih wétané wiwit ing pungkasané segara Uyah. 4Sangka kono tapel watesé negaramu ménggok ing sak kidulé unggah-unggahan ing Akrabim, terus tekan ing Sin, lan mandek ing sak kidulé Kadès-Barnéa, banjur terus menyang ing Hasar-Adar, lan terus nganti tekan ing Asmon. 5Sangka Asmon, watesé terus ménggok menyang ing kali Egipte, terus nganti tekan ing segara. 6Kanggo tapel watesé negaramu sing sisih kulon segara gedé kabèh pinggiré segara, ya kuwi sing dadi tapel watesé sing sisih kulon. 7Nanging tapel watesé sing sisih lor kuwi: wiwit sangka segara gedé watesé nuju tekan ing gunung Hor, 8sangka gunung Hor nuju tekan ing Hamat, lan terus nganti tekan ing Sédad. 9Tapel watesé mau terus tekan ing Sifron, nganti notok ing Hasar-Enan; kuwi tapel watesé sing sisih lor. 10Nanging tapel watesé sing sisih wétané kuwi nuju sangka Hasar-Enan mau tekan ing Séfam. 11Sangka Séfam kuwi terus medun menyang Ribla ing wétané Ain; watesé terus medun menèh nganti tekan ing pinggir tlaga Kinèrèt ing sisih wétané. 12Watesé kuwi terus medun menèh nganti tekan ing laut Yordan lan terus nganti tekan ing tlaga Uyah. Ya kuwi negaramu miturut tapel watesé mubeng.”
13Moses terus ngongkon marang wong Israèl: “Kuwi mau negara sing bakal dadi duwèkmu karo dilotré, sing dipréntahké karo GUSTI supaya dikèkké marang taler sing sanga setengah kuwi. 14Awit golongané taleré Rubèn lan golongané taleré turunané Gad wis pada nampa negara panduman, mengkono uga separo taler Manasé ya wis pada nampa panduman. 15Loro setengah taler kuwi wis pada nampa tanah panduman ing sabrangé laut Yordan ing sak tyedaké Yériko bawah wétan.”
16GUSTI ngetokké tembung menèh marang Moses: 17“Iki jenengé wong sing kudu pada ngedum tanah mau marang kowé kanggo tanah panduman, ya kuwi imam Eléazar lan Yosua anaké Nun. 18Uga menèh sangka saben taler ngangkat penggedéné siji sing mèlu ngedum tanah kuwi dadi tanah panduman. 19Iki jenengé wong-wong mau: sangka taler Yéhuda: Kalèb anaké Yéfuné; 20sangka taler turunané Siméon: Samuèl anaké Amihud; 21sangka taler Bényamin: Elidad anaké Kislon; 22sangka taler turunané Dan sakwijiné penggedéné: Buki anaké Yogli; 23sangka turunané Yosèf, sing sangka taler turunané Manasé sakwijiné penggedéné: Hanièl anaké Efod; 24lan sangka taler turunané Efraim sakwijiné penggedéné: Kemuèl anaké Siftan; 25sangka taler turunané Sébulon sakwijiné penggedéné: Elisafan anaké Parnak; 26sangka taler turunané Isakar sakwijiné penggedéné: Paltièl anaké Asan; 27sangka taler turunané Asyèra sakwijiné penggedéné: Akihud, anaké Sélomi; 28sangka taler turunané Naftali sakwijiné penggedéné: Pédaèl anaké Amihud. 29Kuwi mau wong-wong sing pada dikarepké karo GUSTI ngedum tanah panduman marang wong Israèl ing negara Kanaan.”
