Masmur 17

Duh GUSTI, supaya gelem ngrungokké marang perkara sing bener,

supaya gelem nggatèkké marang sambat kula;

lan supaya gelem ngrungokké marang pandonga kula,

sangka lambé sing ora goroh.

₂Supaya kula olèh keadilan sangka Panjenengan:

mripat Panjenengan supaya weruh apa sing bener.

₃Yèn Panjenengan nguji marang ati kula,

tlitinen kula ing wantyi wengi,

lan nitipriksa kula

Panjenengan ora bakal nemokké sing ala,

ing tutuk kula ora ana panerak.

₄Tegesé penggawéané wong,

miturut pitutur-pitutur sing Panjenengan omongaké,

kula ora mèlu-mèlu karo tandangé wong sing pada nglakoni duraka;

₅mlaku kula tetep mèlu mlakuné Panjenengan

lan sikil kula ora gloyoran.

₆Kula nyebut marang Panjenengan, awit Panjenengan nyauri kula, duh Gusti Allah;

supaya Panjenengan gelem mbukakké kuping Panjenengan marang kula supaya gelem ngrungokké tembung kula.

₇Supaya Panjenengan gelem ngétokké kawelasan Panjenengan sing nggumunaké,

Panjenengan sing ngluwari wong sing pada ndelik ing pangayomané tangan Panjenengan sing tengen

awit sangka anané para wong sing pada mbruntak.

₈Supaya kula dirumati Panjenengan kaya irengé mripat,

lan Panjenengan delikké ing swiwi Panjenengan:

₉awit ana wong duraka sing pada ngupaya marang karusakan kula,

ya satru bebuyutan sing pada ngepung kula.

₁₀Wong iki pada ora ngétokké kawelasan,

pada ngumbar gemunggungé;

₁₁wong pada mèlu ing jangkah-jangkah kula, saiki pada ngrubung kula,

mripaté ngupaya arep nglelepké kula ing bumi.

₁₂Rupané kaya singa sing bakal ndekep,

kaya singa nom sing ndekem ing delikané.

₁₃Duh GUSTI supaya gelem ngadek, gelem metuki wong-wong iki lan Panjenengan ambruké,

Panjenengan supaya gelem ngluwari kula sangka wong duraka karo pedang Panjenengan.

₁₄Duh GUSTI, Panjenengan supaya gelem ngluwari kula karo tangan-Mu,

sangka wong-wong kadonyan kuwi sing pandumané ing urip saiki,

wetengé warekana karo simpenan Panjenengan,

terus anaké pada warek,

lan turahané ditinggalké marang bayi-bayiné.

₁₅Nanging kula, bakal nyawang praupan Panjenengan ing njeruhné kabeneran;

lan ing tanginé kula, kula bakal warek karo praupan Panjenengan.