Masmur 33

₁Hé para wong bener, pada surak-suraka ing GUSTI!

Awit wis sak mestiné, yèn wong tulus atiné pada memuji.

₂Pada pasraha maturkesuwun marang GUSTI karo siter,

kidungna masmur karo harep senar sepuluh.

₃Kidungna kidungan anyar;

sing titis tabuhanmu karo swara sing ramé!

₄Sebab tembungé GUSTI kuwi nyata,

samubarang kabèh ditindakké karo setia tuhu.

₅Panjenengané seneng marang sing bener lan adil;

bumi kebak karo katrésnané GUSTI.

₆Kabèh langit pada digawé karo pitutur-pituturé GUSTI,

kabèh lintangé karo napasé tutuké GUSTI.

₇Banyuné segara diklumpukké kaya bendungan,

segara gedé dilebokké ing wadah.

₈Sak lumahé bumi bèn pada wedi marang GUSTI,

wong sak isiné ndonya bèn pada gemeter ing ngarepé!

₉Awit Panjenengané ngetokké tembung, kabèh terus dadi;

Panjenengané préntah, kabèh terus ana.

₁₀GUSTI nggagalké rantyamané para bangsa;

murungké rantyamané para taleré bangsa;

₁₁nanging karepé GUSTI kuwi tetep selawasé,

lan rantyamané ati-Né kuwi turun-temurun.

₁₂Rahayu bangsa sing nganggep GUSTI dadi Gusti Allahé,

lan taleré bangsa sing dipilih kuwi dadi duwèké!

₁₃GUSTI nyawang sangka swarga,

lan weruh kabèh anaké manungsa;

₁₄sangka omahé weruh

kabèh isiné bumi.

₁₅Kabèh pada dibangun atiné,

lan digatèkké apa sak penggawéané.

₁₆Keslametané ratu kuwi ora jalaran sangka gedéné pangwasané;

suradaduné kuwi ora bakal ditulungi awit sangka gedéné kekuwatané.

₁₇Jaran kuwi muspra yèn marakké menang,

lan kekuwatané sing ngidap-idapi ora njalari bisa utyul.

₁₈Lan mripaté GUSTI weruh wong sing pada wedi marang Panjenengané,

lan ngentèn-entèni marang katrésnané,

₁₉supaya nyawané utyul sangka pati,

lan pada diuripi ing waktu patyeklik.

₂₀Nyawa kita ngentèn-entèni marang GUSTI.

Panjenengané kuwi pitulungan lan tamèng kita.

₂₁Tenan ati kita bungah awit sangka Panjenengané,

awit kita pertyaya marang asmané sing sutyi.

₂₂Duh GUSTI, kawelasan Panjenengan mbarengi kita,

kaya pengarep-arep kita marang Panjenengan.