Wahyu 3

₁“Kowé nulisa marang mulékaté pasamuan ing Sardis: Iki tembungé Panjenengané, sing nduwé Rohé Gusti Allah pitu lan lintang pitu kuwi: Aku weruh sak kabèhé penggawéanmu; kowé diarani urip, nanging sak temené mati! ₂Kowé tangia, lan nguwatké apa sing ijik kèri sing wis arep mati, awit penggawéanmu kuwi ora ana siji-sijia sing Tak temokké sampurna ing ngarepé Gusti Allah-Ku. ₃Awit sangka kuwi kowé élinga, kepriyé enggonmu nampani lan krungu; kuwi tetepana lan mratobat! Awit yèn kowé ora jaga-jaga, Aku bakal nekani kowé kaya maling, lan kowé ora bakal mangertèni wantyi apa enggon-Ku nekani kowé. ₄Nanging ing Sardis kono uga ana wong sing ora ngregeti sandangané; wong-wong kuwi bakal mèlu mlaku karo Aku nganggo salin putih, awit pada wis pantes.

₅Sapa sing menang, kuwi bakal dienggoni sandangan putih kaya mengkono; Aku bakal ora ngilangi jenengé sangka kitab panguripan, nanging aku bakal ngakoni jenengé ing ngarepé Bapak-Ku lan ing ngarepé para mulékaté.

₆Sapa sing nduwé kuping, rungokna apa sing dadi tembungé Roh marang pasamuan-pasamuan.”

₇“Kowé nulisa marang mulékaté pasamuan ing Filadèlfia: Iki tembungé sing Sutyi, sing Tenan, sing nggawa kuntyiné Daved; yèn Panjenengané ngengakké, ora ana sing bisa nutup, yèn Panjenengané nutup, ora ana sing bisa ngengakké. ₈Aku weruh sak kabèhé penggawéanmu: Ngertia, kowé wis Tak bukaké lawang sing ora bisa ditutup karo wong. Aku weruh yèn kekuwatanmu ora sepiraa, nanging kowé netepi tembung-Ku lan ora nyélaki asma-Ku. ₉Ngertia, wong sangka tunggalé sétan, ya kuwi sing pada ngaku-aku Ju, nanging sejatiné duduk, nanging goroh, kuwi bakal Tak pasrahaké marang kowé. Sak temené Aku nekakké wong-wong kuwi, supaya pada nyembah sujut ing ngarepé sikilmu lan pada mangertèni, yèn Aku trésna kowé. ₁₀Awit kowé wis netepi tembung-Ku, supaya karo sabar mantep ngentèn-entèni marang Aku, mulané Aku ya bakal njaga kowé ing dina pantyoba sing bakal nekani sak jagat kabèh kanggo nliti wong-wong sing pada manggon ing bumi. ₁₁Aku bakal gelis teka. Rumaten, apa sing kok duwèni, supaya aja ana wong sing ngrebut makutamu.

₁₂Sapa sing menang, kuwi bakal Tak dadèkké tyagak ing griya sutyiné Gusti Allah-Ku, lan bakal ora metu menèh sangka kono; uga bakal Tak tulisi jenengé Gusti Allah-Ku, jenengé kutané Gusti Allah-Ku, ya kuwi Yérusalèm anyar, sing mudun sangka swarga sangka Gusti Allah-Ku, lan asma-Ku sing anyar.

₁₃Sapa sing nduwé kuping, rungokna apa sing dadi tembungé Roh marang pasamuan-pasamuan.”

₁₄“Lan kowé nulisa marang mulékaté pasamuan ing Laodikia: Iki tembungé Sang Amin, Seksi sing setia tuhu lan tenan, sumberé sembarang sing digawé karo Gusti Allah: ₁₅Aku weruh sak kabèhé penggawéanmu: kowé kuwi ora adem lan ora panas. Tenan betyiké yèn kowé adem utawa panas. ₁₆Awit kowé kuwi manget-manget, ora adem lan ora panas, mulané Aku bakal nglepèh kowé sangka tutuk-Ku. ₁₇Awit kowé nduwé tembung: Aku iki sugih lan aku wis ngupaya kasugihan lan ora kekurangan apa-apa, sak temené kowé ora mangertèni, yèn kowé kuwi mlarat lan memelas, lamur lan wuda, ₁₈mulané Aku mréntah kowé, supaya kowé tuku emas sing wis dietus karo geni marang Aku, supaya kowé dadi sugih; lan uga sandangan putih, supaya kok enggo, banjur aja nganti kétok enggonmu wuda, sing ngisin-isini; uga lenga kanggo mblonyohi mripatmu, supaya kowé bisa ndeleng. ₁₉Sapa wong sing Tak trésnani, kuwi Tak welèhké lan Tak ajar; awit sangka kuwi, sing temen lan mratobata!

₂₀Ngertia, Aku ngadek ana ngarep lawang lan totok-totok; yèn ana wong sing krungu swara-Ku lan mbukakké lawang, Aku bakal mlebu nemoni wong kuwi lan mangan pésta bareng karo wong kuwi lan wong kuwi karo Aku.

₂₁Sapa sing menang, kuwi bakal Tak jagongké bareng karo Aku ing dampar-Ku, kayadéné Aku uga wis menang lan terus njagong bareng karo Bapak-Ku ing damparé.

₂₂Sapa sing nduwé kuping, rungokna apa sing dadi tembungé Roh marang pasamuan-pasamuan.”