Yeunossak kon Wotokoyi 15

₁Tùulon kon kàyik yamùk uyàpùppù màlà Judea poi Antioch pona molopai tok wepyattàppù ailon tawonnan Jesus pàk yenupa pàk, “Ewepùikattàsak kon pen màlà Jew yamùk yattàtok yeselu yawà ausattàsak kon pùla iwechi yau Moses uya wa tetok kasa,” tukaik. ₂Paul molopai Barnabas tawonnan wesseippàtùppù kulu tok pokonpe sàlà pàk. Màlàpàk tok wekkupùppù Paul, Barnabas molopai tùulon kon kappon yamùk Antioch pon kon utàtoppe Jerusalem pona yeunossak kon molopai eke ton tùnamasan yense, sàlà pàk.

₃Sochi tawon kon uya tok yeunossak wechippù màlà, molopai tùutài'ma'nokon Phoenicia molopai Samaria yawàlà tok uya Jew yamùk pen welattàsak Katù winàkaik yekamappù. Sàlà itekale uya eke pe tamù'nawolon kon utauchinpatok nepùppù màlà. ₄Tok welepansak Jerusalem pona yau, Sochi uya, yeunossak kon uya, molopai eke ton tùnamasan uya tok yanùmùppù tùutauchinpaik. Mùkyamlo pàk tok uya tamù'nawàlà Katù nùkupùppù tùpokon pe'nokon yekamappù. ₅Tùse tùulon kon ailon tawonnan Pharisee yamùk winon kon wà'mùssakkappù molopai tok uya, “Jew yamùk pen yattà màlà, Jew yamùk yattàtok yawàlà molopai Moses winàpaino law yawàlà tok wettoppe yekama,” teppù.

₆Yeunossak kon molopai eke ton tùnamasan wepilipùppù tamùkke sàlà yamùk yekamapposak lùppù pàk eselupase. ₇Tachin pe tùuselupa kon pàk tùwechi kon tùpo, Peter wà'mùssakkappù molopai, “Utonpa yamùk, mùttuyatàik pena Katù uya uyanùmùppù àkklottapai'nokon Wakù Itekale yekama toppe uya Jew yamùk pen pàk, yeta toppe tok uya molopai ailon te toppe tok uya. ₈Molopai Katù, kappon yamùk yewan ittunài uya, tok yanùnsak tùuya yenpoikappù, Wakù Akkwalù ke tok tùlepase, ikupùppù tùuya kùpàkù'nokon kasa làma. ₉Tùpatalà'ne là ku'nàsak ya pùla man tok winàpai, esuken tok yewan konekappù ya màlà ailon tetok tok uya yai. ₁₀Yà'là pe ken uchi iwechi pàk màlà Katù tùlùiche ewechi kon ittutok yak eme'nek tùnonkase ailon tawonnan mùpona kùtamo kon yamùk là wapùla kùmyamlo là uya yalà yentaino? ₁₁Kane. Ailon tesak màlà molopai wepùikattànsak man wakù pe Itepulu Jesus wettok winà tok wepùikattàsak kasa,” teppù Peter uya tok pàk.

₁₂Tamù'nawolon kon wechippù màlà eppana Barnabas molopai Paul tawonnan uya tamù'nawàlà tensan yekkwa ton pen enumenkan nan, kupùppù Katù uya tai'nokon Jew yamùk pen kùlottau, yekama yeta tùuya'nokon yau. ₁₃Tok wenukassak tùuselupa kon pàk yau, James uselupappù, “Kùyetatàk kon, utonpa yamùk! ₁₄Simon nekamapàssan Katù uyàpùppù wapiya Jew yamùk pen piyak, tok kùlottapai kappon yamùk mokka tùuya tùponalok pe winà. ₁₅Katù Maimu yenpoikannan maimuppù uya wa teppù lùppù ekkaichalà man. Iwe'menukasak kasa,

₁₉“Màlàpàk usenumenkatok man, Jew yamùk pen Katù winàkàik tùwelattàsan wanittàpa pen sàlà. ₂₀Tùse, kaleta menukapai'nokon man tok pàk yekamape, Kùyali napù tok uya tukaik tùulon katù yemyak itùsak lùppù. Àli imakuyippù kuttok esak ke winàpai tok wettoppe; kamo i'mùtùntàsak yanù tok uya tukaik wapùla mùn yeme tok uya tukaik. ₂₁Masapùla law yeneppù molopai ittuppù màlà Jew yamùk wepilittok itak yamùk tau tachin pe Jew yamùk wàlàkkattok weyu yattai'ne, molopai yekamappù màlà tamù'nawàlà pata yamùk yau,” tukaik James uselupappù.

₂₂Màlàyau yeunossak kon, molopai eke ton tùnamasan yamùk, usenumenkappù tamùkke sochi tawon kon pokonpe kàyik yamùk yanùmù pàk tùklottapai'nokon molopai tok yeunottoppe Antioch pona Paul molopai Barnabas tawonnan ya'là. Tok uya Judas, Barsabbas tukaik tesassen, molopai Silas tawonnan, asa'lon kon kàyik yamùk tùnamasan kulu ailon tawonnan nùnama ton yanùmùppù. ₂₃Sàlà kaleta menukasak yeunokoppù màlà tok uya tok yemyau.

“Yeunossak kon, eke ton tùnamasan, ailon tawonnan Jesus pàk. ‘Wakù pe na' messatàu,’ tetok yeunossan, tamù'nawolon kon tùtonpa kon yamùk, Jew yamùk pe pùla iwentusak kon Antioch, Syria molopai Cilicia pon kon piyak. ₂₄Ina netatai tùulon kon kappon yamùk, ina tonpa yamùk utàppù molopai awanittàpa eusenumenkatok kon yaimelunpappù tok uya tùuselupa kon ke, sàlà kuttoppe tùuya'nokon tapyontàtok kon yepolo tok uya pùn ina winàpai. ₂₅Màlàpàk ina wepilichak man molopai tamù'nawàlà tewin itewan tùwenaik mayin yekaman nan yanùmù tesak ina uya man molopai tok yeunoko ina uya sàlà apyakù'nokon. Tok utà màlà ina pùnùn ton ina tonpa yamùk Paul molopai Barnabas ya'là. ₂₆Mùkyamlo uya tùwettalipaik pùla tùwemattok kon tùsak man Itepulu Jesus Christ wotokoyi yak. ₂₇Judas molopai Silas yeunossan ina, àpàkù'nokon tok uya yekama màlà sàlà ina nùmenukayai'nùk. ₂₈Masapùla Wakù Akkwalù pokonpe ina usenumenkasak man wakù pe iwechi màlà yà'làlà yalà yentaino tùlù ina uya àpona'nokon tukaik, tùse sàlà yamùk yawàlà we'nàtok kon pokonpe. ₂₉Kùyali kù'nattàu itùsak lùppù tùulon kon katù yamùk yemyak tok nama pe, mùn kùsemetàu, kamo i'mùtùntàsak kùsantàu, molopai àli ànkupai we'nàtok esak ke winàpai ettàk kon. Wakù pe ewechi kon màlà sàlà yamùk kupù auya'nokon pùla iwechi yau. Màlà neken.” tukaik.

₃₀Mayin yekamannan yeunokoppù màlà molopai tok utàppù Antioch pona, molo sochi tawon kon pilipùppù tok uya molopai kaleta imenukasak lùppù tùlùppù tok uya tok yemyak. ₃₁Kaleta yensak tùuya'nokon yau, kappon yamùk utauchinpappù meluntàpanpe uselupantok yekale winà. ₃₂Judas molopai Silas mùkyamlo, Katù Maimu yenpoikannan tùmàlà'nokon pe uselupappù tachin pe ailon tawonnan pokonpe, tok lepa pe tok meluntàlù ke meluntà pe tok wettoppe. ₃₃Molo malalà tok wechi tùpo, tok yeunokoppù màlà ailon tawonnan Jesus pàk uya wakù pe molopai tok wennapoppù teuno'nàinannùssan piyak. ₃₄[Tùse Silas wekkupùppù molo tùwà'nàmà pàk.]

₃₅Paul molopai Barnabas wemapùppù màlà Antioch po. Tamùkke tukke tùulon kon pokonpe, tok uya Itepulu Maimu pàk enupa'nàppà molopai yekamappù.

₃₆Màlà tùpo, Paul uya Barnabas pàk, “Wennapponpai ailon tawonnan kùtonpa kon yamùk kaklanpapai, Itepulu yekale yekamappù lùppù ipàk lùssan tamù'nawàlà pata yamùk yawon kon atta là tok wechi yense,” teppù. ₃₇Barnabas wechippù John Mark anapai ta'là'nokon. ₃₈Tùse Paul wechippù anapai pùla, masapùla tùpyau'nokon iwessak wotoko wenukappù ponalà pùla iwechi pàk, tùse iwennapoppù molopai tùnàmàppù kon ya Pamphylia po pàk. ₃₉Tok useippàtùppù màlà àsà pe molopai tok wepantakappù echippyapai. Barnabas uya Mark yalàppù ta'là molopai tok utàppù tuna po Cyprus pona. ₄₀Paul uya Silas yanùmùppù molopai tok utàppù. Tok utà yau ailon tawonnan uya tok tùlùppù wakù pe Katù wettok yak. ₄₁Iitàppù Syria yawà molopai Cilicia yawàlà sochi yamùk meluntàpa pe.