1 Kownu 22

₁Dri yari langa feti no ben de fu Aram nanga Israel. ₂Ma ini a di fu dri yari, kownu Yosafat fu Yuda go luku a kownu fu Israel. ₃Dan a kownu fu Israel, teki a okasi dati fu taigi den knekti fu en taki: “Un sabi dati Ramot ini Gilead na fu unu. Wi mus du wani sani fu teki a foto dati baka fu a kownu fu Aram.” ₄Dan Akab aksi Yosafat taki: “Yu o go nanga mi go feti na Ramot ini Gilead?” Yosafat piki en taki: “Mi nanga yu na wan, a legre fu mi na a legre fu yu èn den asi fu mi tnapu klar'klari gi yu.” ₅Ma Yosafat taigi a kownu fu Israel taki: “Ma mi e begi yu, suku fu sabi fosi san MASRA e taki.” ₆Ne a kownu fu Israel kari den profeiti kon na wan, sowan fo hondro man, dan a aksi den taki: “Mi sa hari go feti nanga Ramot ini Gilead noso mi no mus go?” Den piki taki: “Yu kan go. MASRA sa gi yu a foto.” ₇Ma Yosafat aksi: “Wan profeiti fu MASRA de dyaso ete di wi kan aksi?” ₈A kownu fu Israel piki en taki: “Wan man de ete di wi kan aksi. A man dati na Mika, a manpikin fu Yimla. Ma mi no lobi en srefsrefi, bika a no e taigi mi bun sani, ma soso ogri a e taki tak' o miti mi.” Ma Yosafat piki en taki: “Yu no mus taki so.” ₉Dan a kownu fu Israel kari wan spesrutu knekti fu en, dan a taigi en taki: “Go wantron go teki Mika, a manpikin fu Yimla, kon.” ₁₀A kownu fu Israel nanga kownu Yosafat fu Yuda ben sidon na tapu kownusturu nanga ala den moi krosi, na wan presi pe sma e masi a buba puru na a graan, krosbei fu a bigi doro na a bigin fu Samaria. Ala den profeiti ben e tan gi boskopu nomo. ₁₁Wan fu den, di ben nen Sidkia, a manpikin fu Kenana, ben poti tu isri tutu tapu en ede, dan a taki: “Na so MASRA e taki: Nanga den tutu disi yu o dyuku den Arameesma te leki den dede.” ₁₂Ala den tra profeiti ben e taki den srefi sani disi tu. Den taki: “Hari go na Ramot ini Gilead. Sani sa waka bun gi yu. MASRA o gi kownu a foto.”

₁₃A boskopuman di ben go kari Mika kon, taigi en taki: “Ala den profeiti taigi kownu bun sani. Mi howpu taki den sani di yu sa taki sa de bun sani leki di fu den.” ₁₄Ma Mika piki en taki: “Mi e sweri na a libilibi MASRA, tak' na soso san MASRA taigi mi, mi o taki.” ₁₅Di a doro na kownu, kownu aksi en taki: “Mika, wi sa hari go feti nanga Ramot ini Gilead noso wi no mus go?” Mika piki taki: “Yu kan hari go. Sani sa waka bun. MASRA o meki kownu teki a foto abra.” ₁₆Ma kownu taigi en taki: “Omeni leisi kba mi meki yu sweri gi mi tak' yu no mus kibri den tru sani gi mi san MASRA e taigi yu fu taigi mi?” ₁₇Ne Mika taigi en taki: “Mi si fa ala den srudati fu Israel e waka panyapanya tapu den bergi, leki wan grupu skapu sondro skapuman. Dan MASRA taigi mi taki: ‘Den no abi fesiman moro, meki den tapu a feti èn drai go baka na den oso.’ ” ₁₈Ne a kownu fu Israel taigi Yosafat taki: “Yu si san mi ben taigi yu! No wan bun sani a e si fu taigi mi, ma soso ogri.” ₁₉Ma Mika piki en taki: “Arki san MASRA e taigi yu ete: Mi si MASRA sidon na tapu en kownusturu. A heri legre fu heimel ben tnapu na let'sei nanga kruktusei fu En. ₂₀Dan MASRA aksi taki: ‘Sortu wan fu unu wan go kori Akab fu go feti na Ramot ini Gilead, fu a lasi en libi?’ Dan a wan ben e taki disi, a trawan ben e taki dati. ₂₁Te fu kba wan yeye kon tnapu na fesi MASRA, dan a taki: ‘Mi sa go kori en.’ Dan MASRA aksi en taki: ‘Fa yu o du dati?’ ₂₂A yeye piki taki: ‘Mi o meki ala den profeiti fu en taigi en soso sani di no tru.’ Ne MASRA taigi en taki: ‘Yu kan go kori en, yu o man du en tu.’ ₂₃Na dati meki MASRA meki ala den profeiti fu yu dyaso taki soso sani di no tru. Bika A teki a besroiti kba fu puru yu na pasi.” ₂₄Ne Sidkia, a manpikin fu Kenana, waka go na Mika, a naki en ini en fesi, dan a taigi en taki: “Yu wani taigi mi taki a Yeye fu MASRA gwe libi mi fu taigi yu now san Gado wani?” ₂₅Mika piki en taki: “Dati yu o si tapu a dei pe yu o suku wan kibripe te ini wan baka kamra.” ₂₆Dan a kownu fu Israel komanderi taki: “Un grabu Mika, dan un tyari en go na Amon, a edeman fu a foto, nanga gi Yoas, a boi fu mi. ₂₇Un taigi den taki: ‘Kownu komanderi taki un mus sroto en, èn taki un mus gi en pikinso brede nanga watra nomo fu a tan na libi, te leki a drai kon bun baka.’ ” ₂₈Ma Mika piki kownu taki: “Efu yu drai kon baka trutru, dan a no MASRA meki mi taki.” Mika taigi den sma drape tu taki: “Un alamala di dyaso, un arki san mi taki!”

₂₉Dan a kownu fu Israel nanga kownu Yosafat fu Yuda hari go feti nanga Ramot ini Gilead. ₃₀Ma a kownu fu Israel taigi Yosafat taki: “Mi o kenki mi krosi fu den no man si tak' na mi, ma yu kan tan nanga yu kownu-krosi.” Dan a kownu fu Israel weri so wan fasi tak' den feyanti no ben o man si tak' na en, dan a go ini a feti. ₃₁A kownu fu Aram ben komanderi den dritenti-na-tu edeman fu den fetiwagi fu en taki: “Un no feti nanga no wan srudati, ma soso nanga a kownu fu Israel.” ₃₂Fa den edeman fu den fetiwagi si Yosafat, na so den prakseri tak' na en ben de a kownu fu Israel. So den go feti nanga en. Ma Yosafat bari trangatranga. ₃₃Fa den edeman si taki a no ben de a kownu fu Israel, den drai gwe libi en. ₃₄Ma wan fu den srudati fu Aram sutu wan peiri sondro taki a ben e luku spesrutu fu Akab. A peiri sutu a kownu fu Israel leti mindri tu pisi fu a isri bosroko di a ben weri. Dan kownu Akab komanderi a srudati di ben e tyari a fetiwagi fu en taki: “Drai a wagi, puru mi ini a feti, bika mi kisi mankeri!” ₃₅Ma a momenti dati a feti ben kon so hebi taki den ben abi fu hori kownu fu a ben kan tan tnapu ini a wagi fu si den Arameesrudati. A neti dati, kownu dede. A brudu fu a mankeri fu en, ben e lon ini a wagi fu en. ₃₆Di a son e saka, den bari ini a legre fu Israel taki: “Un drai gwe! Un go na un oso baka!”

₃₇Dededede den tyari kownu Akab kon ini Samaria èn den beri en. ₃₈Di den e wasi a fetiwagi fu en na a peti fu Samaria, dagu ben e leki a brudu fu en, èn uma di e seri den skin ben e wasi na a peti leki fa MASRA ben taki tak' a ben o psa. ₃₉Den tra sani di psa ini a libi fu Akab, ala den sani di a du, a kownu-oso di a bow fu ivoor nanga ala den foto di a meki, skrifi poti ini a buku fu a historia fu den kownu fu Israel. ₄₀Akab dede èn en manpikin Akasya teki en presi leki kownu.

₄₁Yosafat, a manpikin fu Asa, tron kownu fu Yuda, di kownu Akab fu Israel, ben de fo yari na makti. ₄₂Yosafat ben abi dritenti-na-feifi yari di a tron kownu, èn a tan tutenti-na-feifi yari na makti ini Yerusalem. En m'ma ben nen Asuba èn a ben de a umapikin fu Silki. ₄₃Yosafat tan du san en p'pa Asa ben e du. A no ben e du tra sani. A ben e du san bun ini MASRA ai. ₄₄Ma den presi pe den sma ben e tyari ofrandi ben tan. Den sma ben tan e srakti meti leki ofrandi èn bron wierook na den presi dati. ₄₅Yosafat ben e libi ini freide tu nanga a kownu fu Israel. ₄₆Den tra sani di psa ini a libi fu Yosafat, den feti di a feti nanga den feti di a wini, skrifi poti ini a buku fu a historia fu den kownu fu Yuda. ₄₇Kownu Asa ben yagi den man nanga den uma di ben e seri den skin na den presi pe den sma ben e tyari ofrandi, puru ini a kondre. Kownu Yosafat ben yagi den wan puru di ben tan na baka ete.

₄₈A pisten dati Edom no ben abi wan kownu fu tiri a kondre. Wan komsarsi ben e tiri a kondre.

₄₉Yosafat ben meki sipi tu fu go teki gowtu na Ofir, ma den sipi sungu na Esyon-Geber. ₅₀Dan Akasya, a manpikin fu Akab, taigi Yosafat taki: “Meki den knekti fu mi go nanga den di fu yu.” Ma Yosafat no ben wani.

₅₁Yosafat dede èn den beri en na den afo fu en ini a foto fu David. En manpikin Yoram teki en presi leki kownu.

₅₂Akasya, manpikin fu Akab, tron kownu fu Israel, di kownu Yosafat fu Yuda ben de tin-na-seibi yari na makti. A ben e libi na Samaria èn a tan tu yari na makti ini Israel. ₅₃A ben e du san no ben bun ini MASRA ai èn a ben e du den srefi sani di en p'pa ben du, di en m'ma ben e du nanga di Yerobeam, a manpikin fu Nebat, ben e du, fu meki Israel sondu. ₅₄A ben e dini Baal èn a ben e boigi gi en. Neleki en p'pa a ben e wiki a atibron fu MASRA, a Gado fu Israel.