1 Kownu 21

₁Nabot, wan man fu Yisreel, ben abi wan droifidyari na Yisreel sei a kownu-oso fu Akab, a kownu fu Samaria. ₂Dan Akab aksi Nabot taki: “Gi mi a droifidyari fu yu. Fu di a de let' sei a oso fu mi, mi kan prani gruntu na en tapu. Mi o gi yu wan moro bun droifidyari na a presi fu en, noso efu yu wani mi kan pai yu fu en.” ₃Ma Nabot piki Akab taki: “MASRA kibri mi. Mi no o man gi yu a dyari disi di den bigisma fu mi libi gi mi na baka.” ₄Akab ben firi broko saka èn nanga atibron a drai go na en oso, fu di Nabot fu Yisreel ben taigi en taki: “Mi no o gi yu a dyari di den bigisma fu mi libi na baka gi mi.” Di a doro na oso, a go didon, a drai en fesi èn a no ben wani nyan noti. ₅Dan en wefi Isebel go na en go aksi en taki: “Fa a du kon taki yu de so brokobroko èn taki yu no wani nyan?” ₆Akab piki en taki: “Mi ben abi wan taki nanga Nabot èn mi aksi en fu a gi mi a droifidyari fu en. Mi taigi en taki mi wani pai en fu en noso efu a wani, mi e gi en wan tra droifidyari. Ma a no wani gi mi a droifidyari fu en.” ₇Ne Isebel piki en taki: “Na yu abi a makti leki kownu ini Israel? Opo kon nyan èn no broko yu ede. Mi sa sorgu tak' yu kisi a droifidyari fu Nabot.” ₈Dan Isebel skrifi wantu brifi. A poti Akab nen nanga a stampu fu en na den tapu, dan a seni den gi den tiriman nanga den tra heihei man fu a presi pe Nabot e libi. ₉A skrifi ini den brifi taki: “Un poti wan dei pe un e kari ala sma kon makandra fu faste. Te un kon makandra, un mus meki Nabot sidon na fes'sei. ₁₀Dan un mus poti tu man, tu takru-ati man, fu sidon leti na abrasei fu en leki ketoigi fu taki tak' a fluku Gado nanga kownu. Dan un mus tyari en gwe, èn fringi ston na en tapu te leki a dede.” ₁₁Den tiriman nanga den tra heihei man fu a presi pe Nabot ben e libi, du san Isebel taigi den ini den brifi. ₁₂Den poti wan dei fu faste, èn di a pipel ben kon makandra, den poti Nabot sidon na fes'sei. ₁₃Dan den tu man, tu takru-ati man, go sidon leti na abrasei fu en, èn den taki fesi ala den sma taki den na ketoigi tak' den yere fa Nabot fluku Gado nanga a kownu. Baka dati den tyari Nabot go na dorosei fu a foto èn den fringi ston kiri en. ₁₄Dan den seni taigi Isebel taki: “Nabot dede. Un fringi ston kiri en.” ₁₅Fa Isebel kisi a boskopu tak' den fringi ston kiri Nabot, na so a taigi Akab taki: “Yu kan opo go teki a droifidyari di Nabot fu Yisreel no ben wani seri gi yu. Bika Nabot no de na libi moro, a dede.” ₁₆Di Akab yere tak' Nabot dede, a opo fu go na Yisreel fu go teki a droifidyari fu Nabot.

₁₇Dan MASRA taigi Elia fu Tisbe taki: ₁₈“Go na kownu Akab, a kownu fu Israel, di e libi na Samaria. Nownowde a de na a droifidyari fu Nabot. A go drape fu teki a dyari gi ensrefi. ₁₉Yu mus taigi en taki: ‘Na disi MASRA e taki: Yu kiri wan sma, fu teki wan sani di ben de fu en.’ ” Taigi en taki: “Tapu a srefi presi pe den dagu leki a brudu fu Nabot, den o leki a brudu fu yu tu.” ₂₀Di Akab si Elia a taigi en taki: “Mi feyanti feni mi baka.” Elia piki en taki: “Iya, bika a gersi leki yu poti yusrefi fu du sani di no bun ini MASRA ai. ₂₁Dat' meki Mi o meki bigi ongoloku miti yu. Mi o figi yu puru na pasi èn Mi o kiri ala den manpikin ini yu famiri tu. Bigiwan nanga pikinwan. ₂₂Mi o meki den srefi sani di miti a famiri fu Yerobeam, a manpikin fu Nebat nanga den sani di miti Basa, a manpikin fu Akia miti yu tu. Bika yu wiki a atibron fu Mi fu di yu meki Israel sondu. ₂₃Fu Isebel MASRA e taki tak' dagu o nyan a dedeskin fu en na a skotu fu Yisreel. ₂₄Dagu o nyan den famiri fu yu di o dede ini a foto, èn tingifowru o nyan den wan di o dede ini a wei.” ₂₅Noiti ete wan sma ben de di ben poti ensrefi so fu du sani di no bun ini MASRA ai, leki Akab. Èn na en wefi Isebel, ben e poti en fu du den sani. ₂₆A du wan groskin sani fu dini den kruktu gado, leki fa den Amoritisma ben e du, di MASRA yagi kmoto ini a kondre gi den Israelitisma. ₂₇Di Akab yere san Elia taki, a priti en krosi, a weri lowkrosi dan a faste. A ben e sribi srefi nanga lowkrosi, èn a ben e waka brokobroko. ₂₈Ne MASRA taigi Elia fu Tisbe taki: ₂₉“Yu si fa Akab saka ensrefi gi Mi? Fu di a du dati, Mi no sa meki a bigi ongoloku di Mi pramisi en, psa te a de na libi. A bigi ongoloku sa miti a manpikin fu en.”