1Dan Samuel taigi ala den Israelitisma taki: “Luku, mi du ala sani san un ben aksi mi èn mi poti wan kownu fu tiri unu. 2We dan, a kownu o tiri un now. Mi kon owru èn mi edewiwiri kon weti. Ma den boi fu mi de nanga unu. Mi ben tiri unu sensi di mi ben yongu te kon miti a dei fu tide. 3Dyaso mi de. Un abi a okasi fu krutu mi fesi MASRA nanga a wan di A poti leki kownu: efu mi ben teki wan sma kaw, efu mi ben teki wan sma buriki, efu mi ben bedrigi wan sma noso puru wan sani nanga tranga na en anu noso efu mi ben teki tyuku fu tapu mi ai gi a leti. Efu dati de so, dan mi sa gi baka san mi ben teki.” 4Ma a pipel piki taki: “Yu no bedrigi wi, yu no puru noti nanga tranga na wi anu èn yu no teki tyuku fu no wan fu wi tu.” 5Dan Samuel piki taki: “Dan MASRA nanga a kownu di A poti de leki kotoigi tide taki un no kan sori no wan finga na mi tapu.” Den sma piki taki: “Iya, na so a de.” 6Dan Samuel taigi a pipel moro fara taki: “Na MASRA ben poti Moses nanga Aaron fu puru den afo fu wi na Egipte. 7We dan, un tnapu, dan leki tiriman mi sa sori un fesi MASRA, ala den bun sani di MASRA du gi wi nanga den afo fu wi. 8Baka di Yakob go na Egipte, den afo fu wi kari MASRA na ini begi fu A yepi den. Dan MASRA seni Moses nanga Aaron, di puru den na Egipte tyari kon tan dyaso. 9Ma den afo fu wi fergiti MASRA, den Gado. Dat' meki MASRA gi den abra na Sisera, a edeman fu a legre fu Hasor, na den Filistijnsma èn na a kownu fu Moab. Den sma disi feti nanga den. 10Dan den kari MASRA baka na ini begi fu A yepi den. Den ben taigi En taki: ‘MASRA, wi sondu. Wi ben gwe libi Yu fu go dini den Baal nanga Astarte. Now wi e begi Yu, ferlusu wi fu a makti fu wi feyanti, dan wi sa dini Yu baka.’ 11Dan MASRA seni Yerubaal, Barak, Yefta nanga Samuel, fu ferlusu unu puru ini a makti fu wi feyanti, fu wi ben kan libi sondro frede. 12Ma di un si taki kownu Nakas fu den Amonitisma, ben kon feti nanga unu, un taigi mi taki: ‘Nono, wi wani wan kownu fu tiri wi.’ Ma na MASRA un Gado, na wi kownu. 13We dan, luku a kownu dyaso di un ben wani, a kownu di un ben angri fu abi. MASRA gi unu wan kownu. 14Ma un mus tan abi lespeki gi MASRA, èn un mus tan dini En. Un mus arki En, èn un no mus tranga un yesi gi den sani di A e komanderi unu fu du. Unu nanga a kownu fu unu mus tan waka baka MASRA, un Gado! 15Ma efu un no arki MASRA, èn efu un no wani du san A komanderi, dan A o strafu unu leki fa A ben strafu den afo fu unu. 16Un tan tnapu, MASRA o du wan bigi wondru di un o si nanga un eigi ai. 17Na a ten fu koti tarwe. Ma mi o begi MASRA fu A meki dondru bari èn fu A meki alen fadon. A sani dati o meki un ferstan taki MASRA e si a aksi di un aksi fu wan kownu, leki wan bigi ogri.”
18Dan Samuel begi MASRA, èn MASRA meki dondru bari èn alen fadon a dei dati. A sani dati meki a heri pipel kisi lespeki gi MASRA nanga gi Samuel. 19Dan den aksi Samuel taki: “Begi MASRA, yu Gado, gi wi fu wi no dede. Bika wi du someni sondu kba, èn wi meki en moro ogri now di wi aksi fu wan kownu.” 20Ne Samuel piki den taki: “Un no abi fu frede. A tru tak' san un du no bun. Ma now un mus tan dini MASRA wawan, èn un mus dini En nanga un heri ati. 21Un no mus gwe libi MASRA fu go waka baka sani di no de noti èn di no man yepi unu. Den no de noti. 22Bika noiti MASRA sa poti En pipel na wan sei. A no sa du dati fu En nen ede, bika MASRA ben teki unu leki En eigi folku. 23Mi fu mi sei, no o sondu tu fu tapu fu begi gi unu. Efu mi du dati, mi no e du a wani fu MASRA. Mi sa tan sori un tu tapu a bun nanga a leti pasi. 24Na MASRA wawan un mus lespeki èn un mus tan dini En nanga un heri ati. Bika unu srefi sabi den bigi sani di A du gi unu. 25Ma efu un e tan du ogri, A o puru unu nanga a kownu fu unu na pasi.”
