1Manase ben abi twarfu yari di a tron kownu. A tan feifitenti-na-feifi yari na makti ini Yerusalem. En m'ma ben nen Hefsiba. 2Manase ben e du san no bun ini MASRA ai. A ben e du den groskin sani fu den folku di MASRA ben yagi puru fu a kondre gi den Israelitisma. 3A meki den presi baka pe sma ben e tyari ofrandi, den presi di en p'pa Hiskia ben broko puru. A meki altari gi Baal èn a poti postu tnapu gi kruktu gado soleki fa kownu Akab fu Israel ben du. A ben e boigi tu gi a son, a mun nanga den stari èn a ben e dini den. 4A meki altari gi kruktu gado ini a oso fu MASRA, aladi MASRA ben taki: “Yerusalem na a foto di Mi teki leki a presi pe sma kan anbegi Mi.” 5A meki altari tu gi a son, a mun nanga den stari tapu den tu pren fu a oso fu MASRA. 6Iya, a bron en eigi manpikin leki ofrandi, a ben e du tofruwroko, a ben e koti luku fu sabi sani èn a ben poti sma di ben man aksi yeye fu dedesma noso tra yeye rai. A du furu sani di no bun ini MASRA ai, èn a afrontu MASRA nanga den sani dati. 7A meki wan popki fu Asyera tu poti ini a oso, aladi MASRA ben taigi David nanga en manpikin Salomo taki: “Na ini a oso disi, dyaso na Yerusalem a foto di Mi teki na mindri ala den lo fu Israel, sma kan anbegi Mi fu têgo. 8Efu den Israelitisma du fin'fini ala san Mi komanderi den, èn hori a heri wèt di Mi meki Mi knekti Moses gi den, Mi no sa gi no wan sma pasi moro fu puru den fu a kondre disi di Mi ben gi den afo fu den.” 9Ma den no ben wani arki bika Manase ben e kori den fu den du moro ogri leki den folku di MASRA ben puru na pasi gi den Israelitisma. 10Na dat' meki MASRA ben meki den knekti fu En, den profeiti, taki disi: 11“Nanga den groskin sani di kownu Manase fu Yuda du, a du moro ogri leki ala den sani di den Amoritisma du di ben libi fosi den Israelitisma ini a kondre. A meki den sma fu Yuda sondu tu nanga den popki fu den kruktu gado fu en. 12Fu den sani disi ede, meki MASRA, a Gado fu Israel, e taki disi: Luku, Mi o tyari bigi ongoloku kon abra Yerusalem nanga Yuda, tak' no wan sma di yere san psa, o wani bribi. 13Den srefi sani di Mi teki fu krutu Samaria, Mi o teki fu krutu Yerusalem, èn a srefi strafu di Mi gi den famiri fu Akab, Mi o gi den. Mi o figi den sma fu Yerusalem puru na pasi leki te wan sma e figi wan preti puru a doti, dan a drai en tapu. 14Mi o puru den wan di tan abra fu Mi eigi pipel, na Mi tapu, èn Mi o gi den abra ini a makti fu den feyanti, fu den feyanti fufuru den sani fu den èn teki ala san den abi tyari gwe. 15Bika sensi a dei di den afo fu den kmoto fu Egipte, te tide, den e du soso sani san no bun ini Mi ai èn den sani dati wiki a atibron fu Mi.”
16Boiti a sondu di Manase ben meki den sma fu Yuda du, fu du san no bun ini MASRA ai, Manase meki someni brudu lon fu soso tu taki a ben e lon fu a wan sei fu Yerusalem go na a tra sei. 17Den tra sani di psa ini a libi fu Manase, ala den sani di a du nanga den sondu fu en, skrifi poti ini a buku fu a historia fu den kownu fu Yuda. 18Manase dede èn den beri en tapu a dyari fu a kownu-oso fu en, a dyari fu Usa. En manpikin Amon teki en presi leki kownu.
19Amon ben abi tutenti-na-tu yari di a tron kownu, èn a tan tu yari na makti ini Yerusalem. En m'ma ben nen Mesulemet, wan umapikin fu Harus, èn a ben de fu Yotba. 20Amon ben e du san no bun ini MASRA ai, neleki en p'pa Manase. 21A du den srefi sondu di en p'pa ben du. A ben e dini den kruktu gado di en p'pa ben e dini èn a ben e boigi gi den. 22A drai en baka gi MASRA, a Gado fu den afo fu en, èn a no ben e libi leki fa MASRA wani. 23Den knekti fu Amon meki mofo fu kiri en, èn den kiri en ini en kownu-oso. 24Ma den sma fu a kondre, kiri ala den sma di ben meki mofo fu kiri kownu. Dan den poti en manpikin Yosia leki kownu ini en presi. 25Den tra sani di psa ini a libi fu Amon nanga den sani di a du, skrifi poti ini a buku fu a historia fu den kownu fu Yuda. 26Den beri en ini a grebi fu en tapu a dyari fu Usa. En manpikin Yosia teki en presi leki kownu.
