Boskopuman 26

₁Agripa taigi Paulus taki: “Yu abi a okasi now fu sori taki yu no fowtu.”

Ne Paulus opo en anu dan a taki: ₂“Kownu Agripa, mi breiti taki mi kan tnapu tide na yu fesi fu sori taki no wan fu den sani tru fu san den Dyusma e kragi mi. ₃Bika yu sabi ala den gwenti fu den Dyusma nanga den sani pe den no man feni densrefi. Fu dat'ede mi e begi yu fu arki mi nanga pasensi.

₄Ala den Dyusma sabi fa mi ben libi na mindri fu mi eigi pipel di mi ben yongu, nanga fa mi ben libi ini Yerusalem. ₅Den sabi mi bun langa kba. Efu den wani, den srefi kan taki tak' mi ben de fu a grupu fu den Fariseiman. Fu ala den Dyusma, den man dati e hori a wèt tapu a moro tranga fasi. ₆Now mi e tnapu dya na fesi krutu fu di mi abi a howpu taki Gado o du san a pramisi den afo fu wi. ₇Den twarfu lo fu wi pipel e tan dini Gado dei nanga neti fu di den e howpu a srefi sani tu. Mi kownu, na fu a howpu disi den Dyusma tyari mi kon kragi. ₈Fu sanede un no man bribi taki Gado kan meki dedesma kon na libi baka?

₉Mi fu mi sei ben prakseri taki mi mus meki ala muiti fu feti Yesus fu Nasaret. ₁₀Na dati mi ben du tu ini Yerusalem. Nanga a makti di mi ben kisi fu den prenspari priester, mi poti furu fu den sma fu Gado na straf'oso. Èn te den ben kiri den, mi ben taki tak' a bun. ₁₁Ini ala den kerki mi ben e fon den bribisma. Tapu sowan fasi mi ben e pruberi fu meki den drai den baka gi Yesus. Nanga bigi atibron mi ben de na den baka fu du den ogri te na den dorosei foto srefi. ₁₂Na dati mi ben e du tu a leisi di mi go na Damaskus. Den prenspari priester ben seni mi go èn den ben gi mi a makti fu grabu den bribisma. ₁₃Mi kownu, di mi ben de na pasi, bigibigi dei, mi si wan faya di ben krin moro a son. A fadon fu heimel kon na tapu mi nanga den sma di ben de nanga mi. ₁₄Wi alamala fadon na gron. Dan mi yere wan sten aksi mi na ini Hebrewtongo taki: ‘Saul, Saul, fu sanede yu de na Mi baka fu du Mi ogri? Na yusrefi yu e du nanga a kaka di yu e tan kaka yu futu.’ ₁₅Dan mi aksi taki: ‘Masra, suma na Yu?’ Masra piki mi taki: ‘Mi na Yesus, di yu e du ogri. ₁₆Ma opo tnapu na tapu yu futu, bika Mi sori Misrefi na yu fu di Mi teki yu leki Mi wrokoman. Yu mus ferteri sma den sani san yu si tide èn san Mi o sori yu ete. ₁₇Mi sa puru yu na anu fu den Dyusma nanga den sma di no de Dyu, pe Mi o seni yu go. ₁₈Yu sa opo den ai, fu den drai den libi kmopo fu a dungru kon ini a leti, èn fu kmopo ondro a makti fu Satan kon na Gado. Dan den sa kisi pardon fu den sondu, èn den o kon mindri den sma fu Gado fu di den bribi ini Mi.’

₁₉Kownu Agripa, fu dat'ede mi no tranga mi yesi gi san Masra ben sori mi kmopo fu heimel. ₂₀Mi go fosi na Damaskus. Dan mi go na Yerusalem nanga heri Yudea. Baka dati mi go na den sma di no de Dyu. Mi taigi den taki den mus drai den libi kon na Gado, èn taki den mus du sani san e sori taki den drai den libi trutru. ₂₁Na fu den sani disi den Dyusma grabu mi ini a tempel, èn den suku fu kiri mi. ₂₂Ma Gado yepi mi te leki a dei fu tide. So mi tnapu dyaso e ferteri bigiwan nanga pikinwan noti moro leki san Moses nanga den profeiti ben taki tak' o psa. ₂₃Den ben taki tak' a Mesias o nyan pina, èn taki A o de a fosi sma di o opo baka na dede, fu tyari leti kon gi En eigi pipel nanga gi den sma di no de Dyu.”

₂₄Ma ini a taki di Paulus e taki fu sori tak' a no fowtu, Festus bari taki: “Paulus, na lawlaw sani yu e taki! Yu leri so furu taki yu lasi yu ferstan.” ₂₅Ma Paulus taigi en taki: “Mi lespeki Festus, a no lawlaw sani mi e taki. Mi de bun na mi ferstan. Mi e taki sani di tru. ₂₆Fu di kownu sabi fu san mi e taki, meki mi e taki sondro frede nanga en. Mi sabi taki a sabi den sani disi heri bun, bika den no psa na wan bakabini.” ₂₇Dan Paulus aksi kownu Agripa taki: “Kownu Agripa, yu e bribi san den profeiti taki? Mi sabi taki yu e bribi den!” ₂₈Ma kownu Agripa piki en taki: “Yu prakseri taki na so esi yu kan meki mi tron wan Kristensma?” ₂₉Paulus piki en taki: “Mi kownu, mi no sabi efu na her'esi noso baka wan pisten, ma mi e begi Gado taki yu nanga ala den trawan di yere mi tide sa kon leki mi, ma sondro den bui disi.”

₃₀Dan kownu Agripa, granman Festus nanga Bernisa opo tnapu. Ala den tra sma di kon nanga den opo tu. ₃₁Di den kmopo drape, den taigi makandra taki: “A man disi no du noti fu a dede noso fu a kisi strafu.” ₃₂Dan kownu Agripa taigi Festus taki: “Un ben kan lusu a man disi efu a no ben aksi fu a grankownu krutu a tori fu en.”