Masra e drai kon baka na En tempel
1Baka dati a man tyari mi go na a doro fu oostsei. 2Èn drape mi si a Gado fu Israel e kmopo na oostsei e kon nanga ala En glori. Wan glori di ben meki grontapu brenki. Wan babari di ben gersi leki te a se e rigeri ben de fu yere tu. 3A sani di Gado ben e sori mi, ben gersi a sani di mi ben si di A ben kon fu broko a foto, èn den ben de leki den sani di A ben sori mi na a Kebarliba. Mi fadon na tapu mi fesi. 4Dan MASRA psa na doro fu oostsei go ini a oso fu En nanga ala a glori fu En. 5Ne a Yeye fu En opo mi tyari go na ini sei pren. Drape mi fa a glori fu MASRA furu a oso fu En. 6Dan mi yere fa A taki nanga mi kmopo fu a tempel aladi a man ben tnapu na mi sei. 7A taigi mi taki: “Manpikin fu libisma, disi na a presi fu a kownusturu fu Mi, a presi pe Mi e poti Mi futu. Na dyaso Mi o libi fu têgo mindri den Israelitisma. A pipel fu Israel nanga den kownu fu den no sa pori a santa nen fu Mi moro. Den no sa dini den kruktu gado èn kon beri den kownu fu den dyaso moro. 8Den ben poti a stupu fu den sei a di fu Mi, èn a doro postu fu den sei a doro postu fu Mi. Na a skotu wawan ben prati unu. Den ben e pori a santa nen fu Mi nanga den groskin sani di den ben du, èn na dat' meki Mi kiri den ini a faya atibron fu Mi. 9Now den o hori den kruktu gado nanga den dedeskin fu den kownu fu den fara fu Mi. So Mi o man libi fu têgo na den na mindri.
10Manpikin fu libisma, ferteri den Israelitisma fu a tempel di Mi sori yu. Taigi den fa a tan èn san na a prakseri fu en, fu den kan syen fu den kruktudu fu den. 11Dan te den e syen fu ala den sani di den du taigi den fa a tempel meki, fa a prati, den presi pe sma kan go na dorosei nanga den presi pe den kan kon na inisei, fa sani e waka drape, ala den fasi nanga ala den wèt fu en. Skrifi den sani disi gi den, leti na den fesi, fu den hori densrefi fin'fini na den. 12Disi na a moro prenspari wèt fu a oso fu Mi: a heri kontren na en lontu, drape na tapusei fu a bergi, sa santa trutru. Dati na a moro prenspari wèt fu a oso fu Mi.”
A altari
13Na so a altari marki nanga den pisi fu a markitiki. Wan fu den pisi ben de wan el, moksi nanga wan pisi di ben langa leki fa wan libisma anu bradi. A gotro lontu a altari ben dipi wan el, èn a ben bradi wan el. A ben abi wan lantyi di ben hei leki fa wan libisma anu bradi. Na so a altari ben meki fu ondrosei: 14Fu a gotro ini a gron go miti a fosi lantyi di ben de lontu a altari ben de tu el. A lantyi ben bradi wan el. Fu a fosi lantyi go miti a wan na mindrisei ben de fo el, èn a lantyi dati ben bradi owktu wan el. 15A pisi fu a altari pe a faya ben e leti, ben hei fo el moro a mindri lantyi èn wan tutu ben de na iniwan fu den fo uku fu a pisi pe a faya ben e leti. 16A pisi pe a faya ben e leti ben de wan fokanti, fo sei fu twarfu el. 17A tapusei lantyi ben de wan fokanti tu fu tin-na-fo el na iniwan sei. A gotro lontu a altari ben dipi wan el, èn a lantyi fu en ben hei wan afu el. A trapu fu a altari ben de na a oostsei fu en.
A fasi fa den priester mus bigin wroko tapu altari
18Dan Gado taigi mi taki: “Manpikin fu libisma, na disi Masra MASRA e taki: disi na den wèt gi a altari. Tapu a dei di a kba, te a de klar'klari fu her'heri meti bron na en tapu leki ofrandi èn fu brudu fringi na en skin, 19yu mus gi den lefiti priester, den wan fu a famiri fu Sadok, den wan di kan kon na Mi fesi te den e wroko ini a oso fu Mi, wan yongu bulu leki wan ofrandi fu kan kisi pardon fu sondu. 20Dan yu mus teki pikinso fu a brudu fu a bulu dan yu e lobi en na den fo tutu, na den fo uku fu a bigi lantyi fu a altari nanga na a hei lantyi fu a tapusei lantyi. Na a fasi dati yu o krin a altari èn meki dati a fiti fu tyari ofrandi na en tapu fu meki sma kon bun baka nanga Mi. 21Baka dati yu mus teki a bulu fu a ofrandi fu kisi pardon fu sondu dan yu e bron en dorosei fu a santa presi, na a presi pe dati musu psa.
22Tapu a di fu tu dei yu mus tyari wan yongu bokoboko leki ofrandi fu kisi pardon fu sondu gi a priester. A bokoboko no mus abi no wan mankeri noso siki na en skin. Dan a priester mus krin a altari nanga en leki fa a ben krin en nanga a bulu. 23Te yu kba krin a altari yu mus tyari wan yongu bulu nanga wan man skapu gi a priester. Den meti no mus abi no wan mankeri noso siki na den skin. 24Tyari den kon na Mi fesi, dan den priester sa fringi sowtu na den tapu èn bron den leki ofrandi gi MASRA. 25Ala dei, seibi dei langa, yu sa tyari wan bokoboko leki ofrandi fu krin a altari. Den priester sa du a srefi sani nanga wan yongu bulu èn nanga wan yongu skapu. Noti mus du den meti dati. 26Seibi dei langa den sa krin a altari èn meki en klari fu tyari ofrandi na en tapu fu meki sma kon bun baka nanga Mi. 27Dan baka den seibi dei dati, tapu a di fu aiti dei nanga den dei na en baka, den priester sa bron den ofrandi fu unu tapu a altari tyari freide-ofrandi. Dan Mi sa abi prisiri nanga unu, Masra MASRA e taki.”
