Lees verschillende vertalingenLees verschillende vertalingen
Vergelijk verschillende vertalingenVergelijk verschillende vertalingen
Maak uw notitiesMaak uw notities
Kopieer en markeer BijbeltekstenKopieer en markeer Bijbelteksten
Uitproberen
Krutubakra 14
Simson nanga a uma fu Timna
1Wan leisi Simson go na Timna. Drape en ai fadon tapu wan Filistijnuma. 2Di a drai go na oso, a taigi en p'pa nanga en m'ma taki: “Mi si wan Filistijnuma na Timna. Un go aksi gi mi efu a wan trow nanga mi.” 3Ma en p'pa nanga en m'ma aksi en taki: “Fu sanede yu mus go teki wan uma fu den Filistijnsma di no besnei? Na feni yu no man feni wan uma ini a lo fu unu noso mindri un eigi pipel?” Ma Simson piki en p'pa taki: “Go aksi gi mi, bika mi lobi en.” 4Ma en p'pa nanga en m'ma no ben sabi dati na MASRA ben wani en so, fu di A ben e suku wan fasi fu bigin wan feti nanga den Filistijnsma. Bika a ten dati den Filistijnsma ben abi a makti ini Israel.
5Na so Simson go nanga en p'pa nanga en m'ma na Timna. Ma di den ben de ini a birti fu den droifidyari fu Timna, wan yongu lew lon kon na Simson tapu nanga bigi babari. 6Dan a Yeye fu MASRA gi Simson krakti, èn nanga en soso anu a priti a lew leki na wan pikin bokoboko a e priti. Ma a no ferteri en p'pa noso en m'ma san a du. 7Baka dati a waka go moro fara èn a go taki nanga a uma, bika a ben lobi en. 8No langa baka dati a drai go baka fu trow now nanga a uma. Ondropasi a kmoto fu a pasi fu go luku a dede lew. Ne a si taki waswasi ben meki den nesi ini a dedeskin èn oni ben de tu. 9Ne a teki oni èn a ben e nyan en di a e go moro fara. Di a doro na en p'pa nanga en m'ma a gi den fu nyan tu. Ma a no taigi den taki na ini a dedeskin fu wan lew a puru a oni.
10Dan en p'pa go na a oso fu den bigisma fu a uma. Baka dati Simson gi wan fesa, soleki fa den yonkuman ben gwenti du. 11Di den famiri fu a uma si Simson den teki dritenti yonkuman fu de makandra nanga en na a fesa. 12Dan Simson taigi den taki: “Mi o gi un wan raitori. Efu un puru en ini den seibi dei fu a fesa, mi o gi un dritenti ondrokrosi nanga dritenti tapuseikrosi. 13Ma efu un no man puru a raitori, dan unu mus gi mi dritenti ondrokrosi nanga dritenti tapuseikrosi.” Den man piki Simson taki: “A bun, yu kan gi yu raitori.” 14Ne Simson taigi den taki:
“Nyanyan e kmopo fu a nyanman,
sukru e kmopo fu a trangawan.”
Dri dei baka dati den no ben man puru a raitori ete. 15Tapu a di fu fo dei den taigi a uma fu Simson taki: “Yu mus kori a man fu yu fu a taigi yu san a raitori wani taki. Efu yu no du dati wi o bron yu nanga den famiri fu yu. Na kari yu kari un kon na yu fesa fu kon pina.” 16Dan a uma fu Simson go krei na en. A taigi Simson taki: “Yu no lobi mi. Yu no e firi noti gi mi. Yu gi den kondreman fu mi wan raitori, ma yu no taigi mi san a raitori wani taki.” Ne Simson piki en taki: “Mi p'pa nanga mi m'ma srefi mi no ferteri san a wani taki. Dan fu sanede mi mus ferteri yu?” 17Ma ala den tra dei fu a fesa a uma tan krei na Simson yesi. Tapu a di fu seibi dei Simson taigi en fu di a ben e tan dwengi. Dan a uma go taigi den kondreman fu en san a raitori wani taki. 18Tapu a di fu seibi dei fu a fesa, fosi a son ben saka, den man go taigi Simson taki:
“San sukru moro oni,
san tranga moro wan lew?”
Ne Simson taigi den taki: “Un baka mi ini mi eigi fatu, tra fasi un no ben o man puru en.” 19Dan a Yeye fu MASRA gi Simson krakti: a go na Askelon, a naki dritenti man kiri drape, dan a teki den krosi tyari gi den man di ben puru a raitori. Nanga hebi atibron a drai go baka na en p'pa oso. 20Den meki a uma nanga san Simson ben o trow, trow nanga a yonkuman di bo yepi en tapu en trowdei.
