1A pisten di Israel no ben abi kownu, wan Lefitiman ben libi dipi ini a bergikontren fu Efraim leki wan doroseisma. Wan fu den tra uma nanga san a ben e libi tu ben de fu Betlehem ini Yuda. 2Ma baka di a uma waka gi en, a uma gwe na a oso fu en p'pa ini Betlehem. Di a tan fo mun drape, 3a man meki ensrefi klari fu go na en. A man ben wani taki nanga en fu a ben kan drai go baka nanga en. A man ben abi en knekti nanga tu buriki na en. Di a doro drape, a uma meki a kon na inisei èn di a p'pa fu a uma si en, a waka miti en nanga prisiri. 4A p'pa fu a uma no ben wani a man gwe wantron. So a man tan dri dei nanga en. A man nyan, a dringi èn a tan sribi drape. 5Ma tapu a di fu fo dei, a man opo frukufruku fu meki ensrefi klari fu gwe. Dan a p'pa fu a uma taigi en taki: “Nyan wan sani fosi fu yu kisi krakti, dan yu kan gwe baka dati.” 6So a man tan èn den nyan èn dringi makandra. Baka dati a p'pa fu a uma taigi en taki: “Mi e begi yu, tan sribi tide neti ete èn meki prisiri.” 7A man no ben wani tan. Ma di a e opo fu gwe, a p'pa fu a uma dwengi en te leki a tan sribi baka. 8Tapu a di fu feifi dei, a opo frukufruku baka fu gwe. Dan a p'pa fu a uma taki: “Nyan wan sani fosi fu yu kisi krakti, dan yu e tan pikinso ete te leki a son saka.” Dan den nyan makandra baka. 9Di a man opo fu gwe nanga en uma nanga en knekti, a p'pa fu a uma taigi en taki: “Luku, pikinso ete dan neti e tapu kba. Mi e begi yu, tan sribi. Luku, a son e saka kba. Tan wan neti ete èn meki prisiri. Dan tamara mamanten yu kan opo frukufruku fu go baka na yu oso.” 10Ma a man no ben wani tan sribi moro. A meki ensrefi klari dan a gwe. Makandra nanga en uma nanga den tu buriki di ben e syow den lai, a kon doro krosbei fu Yebus, dati na Yerusalem. 11Fu di den ben de krosbei fu a foto èn fu di a son ben e saka kba, a knekti fu en taigi en taki: “Luku a foto fu den Yebusitisma drape. A ben o bun efu un beni go drape fu psa a neti.” 12Ma en basi piki en taki: “Un no o koti go na wan foto di un no sabi, fu sma di no de Israelitisma. Un o hari go na Gibea. 13Kon, meki un meki muiti fu doro Gibea noso Rama, dan un kan psa a neti na wan fu den presi dati.” 14Na so den hari psa a foto dati gwe moro fara. A son ben e saka kba di den doro na Gibea, wan foto ini a kontren fu a lo fu Benyamin. 15Den koti go ini a foto fu psa a neti drape. Di den doro, den go sidon tapu a pren fu a foto. No wan sma kari den fu psa a neti na en oso. 16Ma neti yuru, wan owru man ben e kmoto fu en pranigron e kon. A man dati ben de fu a bergikontren fu Efraim, ma a ben libi leki wan doroseisma ini Gibea. Den sma fu Gibea ben de Benyaminitisma. 17Di a owru man opo en ede, a si den sma dati di ben de na waka, tapu a pren fu a foto. Ne a aksi a man taki: “Pe yu e go èn pe yu kmoto?” 18A man piki en taki: “Un kmoto na Betlehem ini Yuda èn un e go dipi ini a bergikontren fu Efraim. Na drape mi e libi. Mi ben go na Betlehem ini Yuda èn now mi e go na oso. Ma no wan sma kari mi kon na en oso. 19Un abi ala un sani: grasi nanga nyanyan gi den buriki, brede nanga win gi misrefi, gi mi uma nanga gi mi knekti.” 20Dan a owru man taki: “Un kon na mi oso. Mi o sorgu tu gi ala san un abi fanowdu. Ma dyaso tapu a pren un no mus sribi.” 21Dan a man tyari den go na en oso èn a gi den buriki nyanyan. Den sma wasi den futu dan den go nyan èn dringi.
22Ma di den ben e nyan, den man fu a foto, takru-ati man, lontu a oso. Den naki tranga tapu a doro èn den taigi a owru man di ben abi a oso taki: “Tyari a man di kon ini yu oso kon na dorosei. Un wani go na bedi nanga en!” 23Ne a man di abi a oso go na den na dorosei, dan a taigi den taki: “Nono brada fu mi, mi e begi unu, un no du a ogri dati. Un no du a don èn syen sani dati nanga a man di kon ini mi oso. 24Luku, mi o tyari a umapikin fu mi, di noiti sribi nanga wan man ete, nanga a uma fu a man, kon na dorosei. Un sribi nanga den nanga tranga èn un du san un wani nanga den. Ma nanga a man un no mus du a don èn syen sani dati.” 25Ma den man no ben wani arki en. Ne a Lefitiman grabu a uma fu en dan a tyari en gi den man na dorosei. A heri neti den man sribi nanga a uma nanga tranga èn den du san den ben wani nanga en. Di dei ben e broko fosi den meki a gwe. 26Di dei e krin a uma srepi ensrefi go na a oso fu a owruman, pe a masra fu en ben de. A fadon na a mofodoro dan a tan didon drape te leki dei krin. 27Di a masra fu en opo mamanten, a opo a doro fu a oso go na dorosei fu gwe moro fara. Ne a si a uma fu en, a uma nanga san a ben e libi tu, didon drape. A ben didon mofo a doro nanga en anu tapu a stupu. 28A man taigi en taki: “Opo, meki un gwe.” Ma a uma no piki. Ne a man poti en tapu a buriki fu en, a meki ensrefi klari dan a go na en oso. 29Di a man doro oso, a teki wan nefi dan a koti a dedeskin fu a uma na ini twarfu pisi. A seni wan pisi go na iniwan fu den kontren fu den lo fu Israel. 30Iniwan sma di si a sani, taki: “Noiti ete sowan sani psa! Noiti ete un si sowan sani, sensi di un kmoto fu Egipte te leki tide! Un no kan meki den sani disi psa. Un mus taki fu a sani disi èn teki wan besroiti san un o du!”
