Den tra lo fu Israel feti nanga a di fu Benyamin
1Dan ala den Israelitisma hari kmoto fu den tanpresi fu kon makandra na a santa presi fu MASRA ini Mispa. Leki wan man den ben kmopo fu Dan na noordsei te leki Berseba na zuidsei. Fu Gilead srefi den hari kon. 2Den edeman fu a heri folku, fu ala den lo fu Israel, ben e go na fesi fu a folku fu Gado. Fo hondro dusun man di ben sabi feti bun nanga deigri. 3Den Benyaminitisma yere taki den tra Israelitisma ben hari kon na Mispa. Drape na Mispa den Israelitisma aksi taki: “Suma kan taigi unu fa a ogri dati du psa?” 4Dan a Lefitiman, di uma ben kon lasi libi, taki: “Mi nanga wan fu den uma fu mi nanga san mi e libi tu, ben doro na Gibea, ini a kontren fu den Benyaminitisma. Un ben wani psa a neti drape. 5Ma den sma fu Gibea ben wani du mi ogri. Neti yuru den kon lontu a oso pe un ben de. Den taigi mi taki den bo kiri mi èn den sribi nanga a uma fu mi nanga tranga, tapu sowan fasi, taki a kon dede. 6Ne mi teki a dedeskin fu en, mi koti èn mi seni den go na ala sei fu a kondre fu den Israelitisma. Bika na wan don èn syen sani, wan bigi sondu, den man du ini Israel. 7Dat' meki, fa un kon dyaso makandra, Israelitisma, un mus teki wan besroiti san musu psa!” 8Dan a heri pipel opo leki wan man, èn den taki: “No wan fu unu e drai gwe baka na en tenti noso en oso. 9Na disi un o du nanga Gibea: Un o hari go feti nanga en. Un o hari lot fu sori suma o go na a feti. 10Fu ibri hondro man, wi o teki tin, fu ala dusun, wi o teki wan hondro man èn fu ibri tin dusun wi o teki dusun man. Den man disi mus sorgu gi a nyanyan fu a legre di o strafu den man fu Gibea tapu wan fasi di fiti fu a don èn syen sani di den du ini Israel.” 11Na so ala den man fu Israel bondru leki wan man fu hari go feti nanga Gibea.
12Dan den lo fu Israel seni boskopuman go lontu ini a heri kontren fu a lo fu Benyamin nanga a boskopu taki: “Fa un meki sowan ogri psa na un mindri. 13We dan, un gi den man abra na wi, den takru-ati man fu Gibea. Dan wi o kiri den, fu a ogri kmoto ini Israel.” Ma den Benyaminitisma no ben wani arki san den brada fu den, den tra Israelitisma, ben e taki. 14Prefu dati, den Benyaminitisma fu ala den tra foto, kon makandra na Gibea fu go feti nanga den tra Israelitisma. 15Den Benyaminitisma fu den tra foto ben de tutenti-na-siksi dusun, di ben man feti nanga deigri. Den sma fu Gibea ben de seibi hondro man. 16Ini a legre dati yu ben abi seibi hondro kruktu-anu man, di no ben e misi te den ben e fringi ston nanga slinger. Awinsi na wan edewiwiri srefi den ben mus naki nanga a ston. 17Israel tyari den man fu en kon na wan tu: Sondro den di fu Benyamin, den ben de fo hondro dusun man. Den ben sabi feti bun nanga deigri èn iniwan fu den ben de bun fetiman.
18Dan a legre fu Israel hari kmopo fu pe den ben de, go na Betel, fu aksi Gado rai. Den aksi En taki: “Suma fu unu sa hari go fosi fu feti nanga den Benyaminitisma?” MASRA piki taki: “Yuda sa hari go fosi.” 19A tra mamanten den man fu Israel opo èn den go meki den kampu abrasei fu Gibea. 20Baka dati den hari fu go feti nanga den man fu Benyamin. Den ben den seti densrefi èn den ben tnapu klar'klari fu feti. 21Dan den man fu Benyamin hari kmoto ini Gibea èn den kiri tutenti-na-tu dusun man fu Israel a dei dati. 22Ma den srudati fu Israel teki dek'ati baka. Den seti densrefi èn den go tnapu klar'klari baka na a srefi presi pe den ben tnapu a fosi dei. 23Baka a fosi feti den ben go na Betel go krei gi MASRA te leki neti tapu. Dan den ben aksi MASRA taki: “Un sa hari go feti baka nanga den bakapikin fu un brada Benyamin?” MASRA piki den taki: “Iya, un hari go feti nanga den.” 24Ma a di fu tu dei di den Israelitiman ben doro krosbei fu den man fu Benyamin, 25den man fu Benyamin hari kmoto ini Gibea go miti den. Den kiri ete tin-na-aiti dusun srudati fu Israel, di ben sabi feti bun nanga deigri. 26Dan ala den man fu Israel, a heri legre, hari go na Betel. Den tan krei drape gi MASRA èn den faste te neti. Dan den bron meti leki ofrandi èn den tyari freide-ofrandi na MASRA fesi. 27Baka dati den aksi MASRA san den ben mus du. A ten dati a santa kisi fu a ferbontu fu Gado ben de ini Betel, 28èn Pinekas, a manpikin fu Eleasar èn granpikin fu Aaron, ben e du a wroko leki priester fu MASRA. Den Israelitisma aksi MASRA taki: “Un sa hari go baka fu feti nanga den bakapikin fu un brada Benyamin, noso un mus tapu a feti?” MASRA piki den taki: “Un hari go, bika tamara Mi o gi den abra na unu.”
29Dan den man fu Israel seti grupu man fu kibri lontu Gibea. 30Tapu a di fu dri dei den srudati fu Israel hari go fu feti nanga den di fu Benyamin. Den ben seti densrefi èn den ben tnapu klar'klari fu feti Gibea, leki den fosi leisi. 31Dan den srudati fu Benyamin hari kon miti den di fu Israel. Ma den man fu Israel ben e sorgu taki den man fu Benyamin ben e gwe moro nanga moro fara fu a foto. Den srudati fu Benyamin kiri dritenti man fu Israel, pe a pasi e prati ensrefi fu go na Gibea nanga Betel 32Den ben prakseri taki den ben o wini baka leki den fosi leisi. Ma den man fu Israel ben meki mofo taki den ben o du leki den e lon gi den man fu Benyamin. Den ben o meki den man fu Benyamin lon na den baka go te na den bradi pasi, soso taki den man fu Benyamin ben kan de fara fu den foto. 33A moro bigi grupu man fu Israel ben e hari go nanga baka èn den ben seti densrefi klar'klari na Baal-Tamar fu feti. A pisten dati den grupu di ben kibri lontu Gibea broko kon na doro, 34dan den hari go na a foto. Tin dusun fu den moro bun srudati fu Israel. Dan wan hebi feti broko na baal-Tamar, ma den Benyaminitisma no ben sabi sortu ogri ben o miti den. 35A dei dati MASRA meki Israel wini Benyamin. Den srudati fu Israel kiri tutenti-na-feifi dusun nanga wan hondro man fu Benyamin di ben man feti bun nanga deigri. 36Den Benyaminitisma ben kon si taki den lasi. Den man fu Israel ben hari gwe nanga baka, bika den ben e bow tapu den wan di ben kibri ini a birti fu Gibea. 37Dan den man di ben kibri lontu Gibea hari go na a foto èn den kiri ala sma drape nanga deigri. 38Den man fu Israel ben meki mofo nanga den wan di ben kibri lontu Gibea, taki den ben o meki furu smoko kmoto ini a foto. 39Na dat' meki den man fu Israel, di ben e feti nanga den di fu Benyamin, ben e hari go nanga baka èn den Benyaminitiman ben kisi a okasi fu kiri dritenti fu den. Den man fu Benyamin ben prakseri taki den ben wini a feti baka leki den fosi leisi. 40Ma a srefi momenti dati blaka smoko bigin opo fu a foto. Di den man fu Benyamin drai luku, den si fa a heri foto ben teki faya. 41A srefi momenti dati tu den man fu Israel di ben e hari go nanga baka, bigin broko kon na den tapu. Dan man fu Benyamin bigin e frede di den kon ferstan sortu ogri ben o miti den. 42Den lowe gi den man fu Israel. Den lon go na a sei fu a bigi dreisabana, ma den no ben man lon gi a feti, bika den man fu Israel di ben e kmopo fu Gibea kon, ben tapu a pasi gi den èn den kiri den. 43Den ben lontu den man fu Benyamin èn den lon na den baka, sondro fu gi den bro. Den lon fara na den baka te na a oostsei fu Gibea. 44Tin-na-aiti dusun man fu Benyamin lasi den libi, iniwan fu den ben de bun fetiman. 45Den trawan meki muiti fu lon go na a sei fu a bigi dreisabana, na a bergiston Rimon. Ma den man fu Israel lon miti den tapu a bradi pasi èn den kiri feifi dusun fu den. Krosbei fu Gidom den feni ete tu dusun fu den kiri. 46Tutenti-na-feifi dusun man fu Benyamin di ben man feti bun nanga a deigri, dede a dei dati. Iniwan fu den ben de bun fetiman. 47Siksi hondro nomo ben kan lowe go na a bigi dreisabana, na a bergiston Rimon. Den tan fo mun drape. 48A legre fu Israel drai go na den tra Benyaminitisma di no ben go na a feti. Den hari fu a wan foto go na a trawan èn den kiri libisma nanga meti. Ala sani di den miti den kiri. Den sutu faya tu gi ala den foto ini a kontren dati.
