1Priester Paskur, a manpikin fu Imer, ben de edeman fu den waktiman fu a oso fu MASRA. A yere di Yeremia ben taki san Masra ben gi en fu taki. 2Dan a meki waktiman naki a profeiti Yeremia nanga tiki. Den fasi en ede, anu nanga futu na ini wan pisi udu fu a no beweigi dan den poti en na a hei Benyaminpoort na a oso fu MASRA. 3Ma di Paskur meki den lusu Yeremia a tra mamanten, Yeremia taigi en taki: “MASRA no e kari yu Paskur moro, ma Magor-Misabib. 4Bika na disi MASRA e taki: ‘Luku, Mi e meki yu tron wan frede gi yusrefi nanga gi ala den mati fu yu. Den feyanti fu den o kiri den na ini feti èn yu o abi fu luku fa dati e psa. Mi e gi ala sma fu Yuda abra na a kownu fu Babel di o tyari den go na Babel, noso a o kiri den. 5Ala den gudu fu a foto, ala den sani gi san den sma naki den skin, ala den diri sani, makandra nanga den gudu fu den kownu fu Yuda, Mi o gi ini a makti fu den feyanti. Den sa fufuru den teki èn tyari den go na Babel. 6Yu Paskur, yu nanga ala den ososma fu yu den o tyari go nanga tranga na Babel tu. Drape yu o dede èn na drape den o beri yu. Yu nanga ala den mati fu yu gi san yu ben lei taki na Masra ben taigi yu sani.’ ”
Yeremia e kragi na Masra
7“Yu kori mi MASRA, èn mi meki Yu kori mi.
Yu tranga moro mi èn Yu kisi mi poti leki fa Yu wani.
Heri dei sma e lafu mi,
ala sma e teki mi e meki spotu.
8Ala leisi te mi e taki mi mus bari taki:
Den e naki mi,
den e gi mi mankeri!
Bika ibri dei den wortu fu MASRA e meki mi kisi syen,
èn den e meki sma e teki mi meki spotu.
9Ma te mi e prakseri taki:
Yu sabi san, mi no o prakseri Masra moro,
mi no o taki moro ini a nen fu En,
dan a boskopu fu Yu e bron leki wan faya ini mi ati,
wan faya di e bron te na ini den bonyo fu mi.
Mi e meki ala muiti fu hori a boskopu,
ma mi no man.
10Mi e yere fa furu sma e tak' safrisafri taki:
‘Luku a man di e taki: Soso ogri na alasei!
Meki un luku wan fasi fu tyari en go kragi.’
Ala den mati fu mi srefi e luku oten mi o lasi skin gi den.
Den e taki: ‘Kande a o meki un kisi en,
dan un kan grabu en,
dan un kan pai en baka.’
11Ma MASRA de na mi sei leki wan dyadya fetiman.
dat' meki den sma di de na mi baka o fadon,
den no o man du mi noti.
Na den o kisi bigi syen,
wan syen di den no o fergiti,
wan syen di o tan fu têgo,
bika den no man du san den ben wani du.
12Iya, MASRA fu ala sani,
A e ondrosuku ala sani tapu wan leti fasi,
A sabi a ati nanga a prakseri fu libisma.
Mi o si fa Yu o pai den baka,
bika a tori fu mi de na ini Yu anu.
13Singi gi MASRA, gi MASRA grani,
bika A e ferlusu a libi fu a wan di no de noti,
a e ferlusu en fu a makti fu takru-ati sma.
14Mi e fluku a dei di mi gebore.
A dei di mi m'ma kisi mi no mus de wan blesi dei.
15Mi e fluku a man di tyari a bun nyunsu gi mi p'pa,
a man di ben bari taki:
‘Yu kisi wan pikin, na wan boi!’
16Meki a man dati kon de leki den foto di MASRA drai tapu,
sondro fu a ben hati en taki A du en.
Meki a yere te mamanten fa sma e bari e suku yepi,
èn babari fu feti te bakadina.
17Bika a no meki mi dede ini a bere fu mi m'ma,
dan mi m'ma ben o tron a grebi fu mi,
èn a ben o tan nanga bere fu têgo.
18Fu sanede mi kmopo ini a bere fu en?
Na soso sari nanga problema e miti mi,
mi e psa den dei fu mi nanga syen.”
