Yeremia e taki na fesi san o miti Yerusalem
1MASRA taki nanga Yeremia. A taki nanga en baka di kownu Sedekia ben seni Paskur, a manpikin fu Malkia, nanga priester Sefanya, a manpikin fu Maaseya, go na en nanga a boskopu disi: 2“Yu sabi dati kownu Nebukadnesar fu Babel kon feti nanga unu. Taki nanga MASRA gi unu. Kande A sa du wan wondru gi unu baka, dan a feyanti sa hari gwe.” 3Yeremia piki den man taki: “Un mus taigi Sedekia taki: 4Na disi MASRA, a Gado fu Israel, e taki: ‘A kownu fu Babel nanga den Kaldeasma lontu a foto na alasei. Ma Mi o dwengi unu fu un no feti na dorosei moro nanga den, ma fu un hari go ini a foto. 5Misrefi o feti nanga unu nanga ala Mi makti, èn na ini bun hebi atibron. 6Mi o kiri ala sma nanga ala meti ini a foto. Mi o meki wan bun takrusiki di o panya drape kiri den. 7Baka dati, na so MASRA taki, Mi o gi kownu Sedekia fu Yuda, den man di e wroko nanga en, nanga ala sma ini a foto disi, di a takrusiki, a bigi feti noso a angriten no kiri, abra na kownu Nebukadnesar fu Babel. Iya, Mi o gi den abra na a feyanti fu den di wani kiri den. A o kiri den nanga en deigri èn a no o abi no wan dropu sari-ati nanga den, a no o gi den pardon èn a no o firi noti gi den.’ ”
8MASRA taigi mi taki: “Taigi a pipel taki: Na disi MASRA e taki: Un yere, Mi e poti libi nanga dede na un fesi, un kan teki wan fu den tu: 9A sma di tan ini a foto o dede ini a feti, o dede fu angri noso fu a takrusiki di o panya drape. Ma a sma di kmoto ini a foto èn gi ensrefi abra na den Kaldeasma di lontu unu, sa tan na libi. 10Bika Mi drai baka gi a foto disi: Mi no sa ferlusu en, ma Mi sa meki a broko, na so MASRA taki. Mi sa gi en abra ini a makti fu a kownu fu Babel di o sutu faya gi en.”
Masra o strafu den kownu fu Yuda
11“Gi a kownu fu Yuda nanga ala sma di o tron kownu na en baka.
Un Arki a boskopu fu MASRA.
12Bakapikin fu David, na disi MASRA taki:
‘Meki sani waka her'esi na tapu wan leti fasi,
no meki sma e bedrigi trawan moro
fu puru sani na a trawan anu.
Noso Mi o lusu a faya atibron fu Mi
tapu unu fu den takru sani di un e du,
èn no wan sma no o man kowru en.
13Yere, Mi o strafu yu,
Na so MASRA taki,
yu di e libi tapu den bigi plata bergiston ini a dal.
Yu di e taki:
Suma sa man kon feti nanga un dyaso?
Suma o man kon ini den tranga presi fu unu?
14Na Mi na a wan di o strafu yu,
wan strafu di fiti den sani di yu du,
na so MASRA taki.
Mi o sutu faya gi a busi fu yu.
A o bron a heri kontren.’ ”
